Kisah Para Rasul 19

1Gij mona ongga Apolos eker gij kota Korintus ros, beda Paulus ecira rejrej monuh Galatia jera monuh Frigia. Beda ofa eja jah kota Efesus. Beda ofa orodosu jera rusnok rineya ongga ruroru Allah gij kota koma. 2Beda ofa ejeka gu rua oida, "Gij mona ongga iwa iroru Allah oga fob, beda iwa isma Efena Ebsi Allah fob ei?" Beda rua ruroun oida, "Guru. Noba memef menejginaga rot Efena Ebsi Allah koma enesi." 3Erek koma beda Paulus ejeka gu rua deika oida, "Jefeda gij mona ongga iwa ita baptis fob, beda iwa iroru mar jeska idu?" Beda rua ruroun oida, "Memef mororu mar ongga Yohanes Pembaptis omftuftu rot sis fob." 4Beda Paulus agot gu rua oida, "Yohanes eita baptis gu rusnok erek orocunc oida rua rimeesa joug rerin mar ongga oska fob. Tina gij mona insa koma bera Yohanes oftuftu rua jeskaseda rua ruroru osnok egens ongga omotoij ofa gij mona kahma. Osnok egens insa koma bera Yesus." 5Nou ongga rua ringg mar insa koma fob, beda rua ruis gu Paulus jeskaseda ofa eita baptis gu rua erek rurocunc oida rua tein ruroru Tuhan Yesus. 6Beda Paulus aha etma esij rua, noba ainsa koma tein Efena Ebsi Allah enjeker gij rudou efesi noba eita owesa efek gu rua. Jefeda rua ragot mar gij oga enjgineg ongga rua risinsa rinejginaga rot enesi. Noba rua ragot mar ongga Allah ocunc gu rua gij rudou efesi tein. 7Rua insa koma nomnaga erek runer rufok setka kungkob erfeka. 8Gij mesta rara ortomu fob bera Paulus oftuftu mar rot odou ongga enemeesa oskiyai tein guru gu rusnok gij mod ongga rua rum riteij gij. Noba ofa tein eseda rusnok ongga Yahudi ruga ofoukou jera oftuftu gu rusnok rot teinefa Allah ofoka ereij keingg rusnok erek raja. 9Tina rineya jeska rua ongga ribirfaga ombrera, jefeda rua runororu mar ongga Paulus omftuftu gu rua guru. Noba rua ruga oruh rot mar ongga Paulus omftuftu osok gij Yesus tein. Jefeda Paulus eja jeska rua, noba ofa oroun rusnok ongga ruroru Yesus fob jah Tiranus efen mod. Noba gij orofosut mona bera rua rifesij mar noba rijeka moguma osok gij Allah efen oga. 10Paulus otunggom mar erek koma gij tahun egeka onjoros rusnok ongga Yahudi jera rusnok ongga Yahudi guru ongga ringker gij monuh Asia insa koma nomnaga ringg rot Tuhan Allah oga fob. 11Allah eita owesa efek gu Paulus fogora ofa otunggom mar onswos ofoukou. 12Erek rusnok rurka meifeti ongga Paulus anggei era enrakid tumu okumfoj skoita rusnok ongga marenir, beda rua rita eskeira fob. Noba efena ofogog ongga engker gij rudou efesi tein orogna jeska rua. 13- 14Rusnok Yahudi rineya ongga rirek mendersi rija rejrej monuh insa koma jeskaseda rikemeji efena ofogog jeska rusnok. Rineya jeska rua insa koma bera erek rumokosema rufok cinja erfeka ongga ebirfaga imam egens ongga ofoka Skewa efen efeser. Gij mona juens beda rua rira Tuhan Yesus ofoka rireneni jeskaseda rikemeji efena ofogog ongga engker gij rusnok rudou efesi. Rua ragot oida, "Oisouska Yesus ofoka ongga Paulus emfesij rot bera dikemeji bua jeska ojgomu!" 15Tina efena ofogog insa koma agot gu rua oida, "Didif dijginaga rot Yesus fob, noba dijginaga rot Paulus tein fob, tina bua bera erek idu fogora bikemeji didifo?" 16Beda ainsa koma tein osnok egens ongga efena ofogog engker gij odou efesi osoka ebeirens noba oskotu rua. Beda ofa obu rua noba ekris rua rot ofora efek eteb onjoros rerin meisoufa nomnaga ebga fob. Jefeda rua ruku rot rifera okora eteb. 17Rusnok ongga Yahudi nomnaga jera rusnok enjgineg tein ongga ringker gij kota Efesus rig rot mar insa koma, jefeda rua rimeesa doska rot Yesus efen owesa efek. Jefeda rua nomnaga ragot mar ongga oufamofa rot Tuhan Yesus. 18Noba rusnok rufoukou ongga ruroru Yesus fob rifesij gu rusnok rot tomnomna osok gij mar ongga oska ongga rua runtunggom sis fob. 19Noba rua ongga mendersi rurka rerin buku-buku ongga orocunc rot teinefa rita mar skoita rusnok. Noba rua ris mah gij buku-buku insa koma nomnaga jah rusnok rufoukou rudou. Noba buku-buku insa koma nomnaga efen efera osok eteb erek fifi perak juta setka cinja. 20Beda rusnok ongga ringg rot Allah oga bera rugun odudu dokun deika. Noba rusnok rufoukou tein ongga ruroru Yesus fob bera risma owesa efek ojgomuja 21Gij mona ongga mar insa koma nomnaga oisa fob, beda Paulus odou os eja jah monuh Makedonia jera monuh Akhaya fogora ecira jah kota Yerusalem. Ofa agot oida, "Gij mona ongga didif dincira jah kota Yerusalem fob, beda didif dimeja jah kota Roma tein si." 22Beda ofa obk gosnok gegeka ongga gomfij ofa jeskaseda geja gokag ofa jah monuh Makedonia. Gosnok gegeka insa koma bera Timotius jera Erastus. Beda Paulus eker nou mona ofoukou deika gij monuh Asia. 23Gij mona insa koma bera rusnok rufoukou gij kota Efesus rutkonu oska eteb noba ruga ofoukou rot mar ongga rusnok enjgineg rumftuftu osok gij Yesus fob. 24Osnok egens ongga ofoka Demetrius eker gij kota koma. Ofa odou efesis eteb rot otunggom mar jeska perak ongga erek mod ofokai nou mega efebr egens ongga rijeka Artemis. Noba rusnok rufoukou gij kota insa koma bera rugif gu Artemis koma. Jefeda Demetrius jera efen mohujir tein risma fifi ofoukou jeska mod ofokai insa koma ongga rua rutunggom fogora ruhu gu rusnok. 25Beda Demetrius ohoturu efen mohujir nomnaga ongga rerin rifarur gij mar insa koma tein, noba ofa agot gu rua oida, "Edohuji, iwa nomnaga ijginaga rot oida ebeibeyaif mimif misma fifi ofoukou jeska mod ofokai ongga mimif mutunggom kef fob. 26Tina iwa ingk noba ingg gu isinsa fob rot mar ongga Paulus koma oftuftu noba ontunggom fob. Ofa agot oida mar efena ongga rusnok runtunggom jeskaseda rugif gu bera erek mar ongga oska ojgomu. Jefeda rusnok rufoukou gij kota kef jera rejrej monuh Asia nomnaga tein bera ruroru efen oga fob. 27Noba ongga erek oska ekirsa bera mifmin mod ofokai ongga mutunggom kef bera rusnok rinengk mar koma deika guru. Noba erek dektek deika guru, beda rusnok rimeita rudou ongga oska rot Artemis efen mod ongga eteb tein. Noba onjoros deisef tein bera rusnok rejrej monuhif bera rugif gu Artemis ojgomu. Tina gij mona kahma deika, beda rusnok runougif gu Artemis morototuma jera mimif deika guri. Noba koma erek rua rumoh mojen gu Artemis tein fob!" 28Nou ongga rusnok insa koma ringg rot mar ongga Demetrius anggot gu rua fob, beda rua rutkonu oska eteb, noba rua ruis rot ruga eteb oida, "Artemis! Bua bebin bufoka aksa ojgomu! Memef mougif gu bua ojgomu!" 29Rua ruis erek koma onjoros rusnok rufoukou gij kota insa koma rutkonu oska eteb tein noba ragot mar ofoukou. Beda rusnok rufoukou insa koma ragei Gayus jera Aristarkhus ongga gororu Paulus jeska monuh Makedonia. Beda rua rikris goga jah mod eteb ongga rusnok rumohoturuma gij fob. 30Paulus odou os oira gij mod eteb insa koma jeskaseda agot mar gu rusnok insa koma, tina rusnok ongga ruroru Yesus jah suma ragei ofa joug ojgomu. 31Noba ebirfager monuh Asia ongga ringker gij kota insa koma bera rirek Paulus efen mohujir. Rua rubk rusnok skoita Paulus jeskaseda ragot gu ofa oida, 'Bunoira gij mod eteb koma guru.' 32Ainsa koma tein, rusnok nomnaga ongga rumohoturuma gij mod eteb insa koma bera rudou erebibei eteb. Rineya ruis mar egema toga jeska rineya. Rua ruis mar erek koma jeska rusnok rufoukou rinejginaga rot teinefa fogora rumohoturuma jah suma guru. 33Rusnok Yahudi rineya ongga riker jah suma rik, tina Aleksander ot gu rusnok riskembemba insa koma rifekesa. Jefeda rua rukoja ofa jeskaseda ot jah rusnok nomnaga rudou. Beda rusnok rineya ruftuftu ofa rot meidu ongga ofa agot gu rusnok rufoukou insa koma. Beda ofa etma ereni gu rua jeskaseda riker toumou fogora ofa emagot mar gu rua. 34Rua rik, tina Aleksander bera osnok egens ongga Yahudi, jefeda rua ruis morototuma rot ruga eteb oida, "Artemis! Bua bebin bufoka aksa! Memef ongga Efesus mougif gu bua ojgomu!" Rua ruis mar erek koma ojgomuja gij aras ongkas egeka. 35Beda ebirfaga egens gij kota koma ois gu rua rot oga eteb, jefeda rua nomnaga riker toumou. Beda ofa agot gu rua oida, "Orofosut rusnok nomnaga rijginaga rot oida mimif ongga mingker gij kota Efesus kef bera ongga mut joug mod ongga Artemis efen jera mamu ofog egens ongga ensiri jeska mebaga noba ongga efen owesa efek eteb. 36Rusnok egema tein runokoja mar insa koma guru. Erek koma jefeda iwa iker toumou, noba inotunggom mar ongga ofogog ebeirens guru. 37Gosnok gegeka ongga iwa ingkris jah sif bera gonoukoreka mar jeska mod ongga Artemis efen guru. Noba goga gonoga oruh Artemis tein guru. 38Noba mod pengadilan onotuma fob. Jefeda erek Demetrius jera efen mohujir rudou os rucunc osnok egens kef erek oska, beda rua rija skoita hakim rot mar insa koma ojgomu. 39Noba mar egema tein ongga iwa idou os yanggot rot, beda iwa yagot rot mar insa koma gu ebirfager rudou ojgomu. 40Mar ongga mimif muntunggom deisef bera omorka mar okum skoita mimif si. Jeska erek raja Kaisar efen rusnok ebirfager rimek mar okum ongga mimif muntunggom deisef beda rua rumofra okum keingg mimif rot si!" 41Nou ongga ebirfaga egens koma anggot rot mar insa koma nomnaga fob, beda ofa obk rua nomnaga rija jah rerin mod ojgomu.

will be added

X\