Kisah Para Rasul 14

1Gij mona ongga Paulus jera Barnabas genjeker gij kota Ikonium fob, beda goga tein goira gij mod egens ongga Yahudi rum riteij gij. Beda goga goftuftu rot iskusk jah suma. Jefeda rusnok Yahudi rufoukou jera rusnok ongga erek Yahudi guru tein ruroru Yesus gij mona insa koma. 2Tina rusnok Yahudi rineya ongga rudobu joug rua ongga ruroru Yesus bera rusos rusnok rufoukou ongga erek Yahudi guru jeskaseda rua tein rutkonu oska skoita rua ongga ruroru Yesus fob. 3Jefeda Paulus jera Barnabas geker dektek gij kota koma. Goga goftuftu mar osok gij Tuhan oga rot godou ongga enemeesa tein guru. Jefeda Tuhan ofij goga fogora eita owesa efek gu goga jeskaseda gotunggom mar onswos jera mar enjgineg tein ongga eita rusnok rudou oubsaha rot. Beda koma tein orocunc gu rusnok oida mar ongga goga gemfesij rot Allah oga koma bera erek tenten ojgomu. 4Tina rusnok ongga ringker gij kota koma bera rimekebema rot mar ongga goga goftuftu gu rua fob. Rineya ruroru Yahudi rerin erebent ros, noba rineya ruroru mar ongga Paulus jera Barnabas goftuftu gu rua. 5Jefeda rineya ongga rusnok Yahudi jera rerin ebirfager tein jera rineya ongga erek Yahudi guru tein rudou egens nou rufra mar okum keingg Paulus jera Barnabas. Jefeda rua rinsejah nou rira mamu rimeredi goga jeskaseda goga gagos ojgomu. 6Tina gij mona ongga Paulus jera Barnabas gengg rot mar insa koma, beda goga goku jah kota Listra jera kota Derbe ongga angh gij monuh Likaonia. Beda goga gecira rejrej monuh koma nomnaga tein. 7Noba goga gefesij rot Allah oga ongga oufamofa deika gij monuh insa koma. 8Osnok orna egens ongga aki ofumbohah sis mona ongga ofa onjuj jeska efen mosu bera eker gij kota Listra. Ofa enecira oskiyai tein jinaga guru jeska efen aki eriaga ojgomu. 9Gij mona ongga Paulus emfesij rot Allah oga, beda osnok egens insa koma eker jah suma noba oj osu nou mar nomnaga ongga Paulus enagot. Beda Paulus ohobut ofa noba ofa ejginaga gij odou efesi oida osnok egens koma osujohu rot oida Allah efen owesa efek ongga adaij nou eita eskeira gu ofa. 10Jefeda Paulus ois gu ofa oida, "Bua but aharuka ojgomu!" Beda ainsa koma tein osnok egens koma ongga aki ofumbohah edebecki rot ebeirens noba ecira. 11Nou ongga rusnok rufoukou jah suma ringk mar insa koma beda rua ruis gij rerin ruga Likaonia oida, "Mar ongga mimif mugif gu, ongga ringker jah mebaga ejmeg, bera runjuj en jah mebif erek rusnok fob!" 12Jefeda rua rijeka Barnabas ofoka erek Zeus noba rua rijeka Paulus ofoka erek Hermes, jeska Paulus bera ongga efesij mar gu rusnok. 13Beda ebirfaga egens ongga erek imam rot mar egens koma ongga ofoka Zeus bera enofoguma. Rerin mod Zeus angh jah mebah jeska kota koma. Nou ongga ofa engg rot mar insa koma beda ofa orka sapi ongga rusnok rira marfok ruroumna fob gij kota koma. Beda ofa jera rusnok enjgineg tein rudou os riris sapi koma erek mar ongga rurougif gu Paulus jera Barnabas. 14Nou ongga Barnabas jera Paulus gengk mar ongga rua rudou os runtunggom nou goga, beda goga gekris gegan meisoufa erek gorocunc gu rusnok insa koma oida mar ongga rua rudou os rutunggom bera onoufa guru. Beda goga gofof skoita rusnok insa koma rifekesa noba gois rot goga eteb oida, 15"Ei, iwa ineris sapi koma erek mar ongga irougif gu magef jinaga guru. Jeska magef tein masnok giskini erek iwa ojgomu. Magef manojuj jeska mebaga guru. Magef man jah sif jeskaseda manggot rot Allah oga ongga oufamofa gu iwa jeskaseda iwa ikikif jeska mar ongga iwa yugif gu gij mebaga insa koma ojgomu. Jeska mar koma ongga iwa yugif gu bera eneita oufamofa gu iwa jinaga guru. Tina ongga oufamofa ekirsa bera, iwa yugif gu Allah ongga tenten ojgomu. Jeska Ofa bera ongga otunggom mebaga ni, mebi ni, mei mojumu efei ni, jera mar enjgineg nomnaga tein. 16Gij mona ongga sismeni bera Allah oin keingg odou efesi fogora orons rot rusnok nomnaga ruroru mar meidu ongga risinsa rudou os ojgomu. 17Tina Allah otunggom mar ongga oufamofa gij rifekesa ongga orocunc rot Ofa ojgomuja. Mar insa koma erek, Ofa eita mos ongga ens jeska mebaga ni, Ofa eita maat efej ongga rirefa gu mekeni fogora er rot oufamofa ni, Ofa eita maat efema ofonon jeska mekeni koma gu rusnok ni, Ofa eita mar nomnaga gu rusnok ongga otunggom rudou erirei eteb rot ni." 18Barnabas jera Paulus gemfesij rot mar insa koma gu rua, tina rua rudou os riris sapi egens erek mar ongga rurougif gu Paulus jera Barnabas ojgomu. 19Beda rineya ongga erek rusnok Yahudi rin jeska kota Antiokhia jera kota Ikonium tein. Beda rua rusos rusnok riskemba insa koma jeskaseda rudou oska skoita Paulus jera Barnabas tein. Jefeda rusnok insa koma rira mamu riredi Paulus noba rikris ofa jah mebah jeska kota koma. Rua rusujohu rot oida ofa agos fob. 20Tina nou ongga rua ongga ruroru Yesus fob rut rejrej ofa, beda ofa edebecki noba oira gij kota insa koma sons. Erek monog beda ofa jera Barnabas geja jeska kota koma noba gecira jah kota Derbe. 21Paulus jera Barnabas gefesij rot Allah oga ongga oufamofa gij kota Derbe tein. Jefeda rusnok rufoukou ruroru Yesus gij kota koma tein. Beda goga goksons jah kota Listra. Nou ongga goga geja jeska kota Listra beda goga gecira jah kota Ikonium. Beda goga goksons jah kota Antiokhia. 22Gij mona ongga goga goira gij kota insa koma nomnaga fob, beda goga goftuftu rusnok ongga ruroru Yesus jah suma noba geisisi joug rua tein jeskaseda rua ruroru Yesus rot ahais ojgomu. Goga gagot gu rua oida, "Mimif ongga muroru Yesus bera mimeita mifera okora eteb si. Noba gij mona ongga Yesus ongksons, beda mimif mumoira jera rusnok ongga Allah ofoka ereij keingg si." 23Noba Paulus jera Barnabas gocunc rusnok rineya erek ebirfager rot rusnok ongga ruroru Yesus gij kota insa koma nomnaga. Beda gij mona juens bera goga genet maat guru jeskaseda gom geiteij gu Allah rot ebirfager Kristen insa koma ongga goncunc fob. Beda goga gois gu Tuhan jeskaseda Ofa omot joug rua insa koma ongga rufij Ofa ojgomu. 24Beda Paulus jera Barnabas geja jeska monuh Pisidia noba gecira jah monuh Pamfilia. 25Jah suma bera goga goftuftu rot Allah oga gij kota Perga. Beda goga geja jeska kota Perga noba gecira jah kota Atalia. 26Nou ongga genja jeska Atalia, beda goga geifef meg meifeni egens sons jah kota Antiokhia. Sis fob rusnok gij kota Antiokhia insa koma rum riteij gu Allah jeskaseda Ofa omofij Paulus jera Barnabas gij mar ongga gomotunggom rejrej monuh ofoukou. Beda ebeibeyaif goga gemfarur gij monuh insa koma oisa fob noba goksons en jah kota Antiokhia. 27Nou ongga goga gensaga kota Antiokhia fob, beda goga gohoturu rusnok nomnaga ongga ruroru Yesus gij kota koma. Beda goga gefesij gu rua rot mar nomnaga ongga Allah ontunggom gij kota-kota ofoukou fob. Goga tein gefesij gu rua rot teinefa Allah onghoda moroju jeskaseda rusnok ongga erek Yahudi guru ruroru Yesus tein. 28Beda Paulus jera Barnabas geker morototuma jera rua ongga ruroru Yesus jah suma gij mona ofoukou.

will be added

X\