1 Yesus efen ruforoker jera rusnok nomnaga ongga ruroru Yesus rejrej monuh Yudea rig oida rusnok ongga Yahudi guru bera ruroru Allah oga ongga oufamofa fob. 2 Gij mona ongga Petrus ongksons jah Yerusalem fob, beda rusnok Yahudi ongga ruroru Yesus fob, tina ongga ruroru Yahudi erebent rot ahais ros, bera rudou okum rot ofa. 3 Rua ragot gu ofa oida, "Petrusa. Teinefa fogora bua binekirsa rot mifmin agama erebent fogora bingker morototuma jera rusnok ongga erek oska erek komo! Jeska rua enerek Yahudi guru. Noba ongga oska ekirsa bera bua bit maat morototuma jera rua tein!" 4 Erek koma jefeda Petrus efesij gu rua rot koisoisa osok gij mar nomnaga ongga rua rinjeka gu ofa rot. 5 Ofa agot mar erek kef: "Gij mona juens bera didif dingker gij kota Yope. Beda didif dujom diteij jah skida mod monggosum ofos ongga edeider. Beda ainsa koma tein Tuhan Allah ocunc mar gu didif gij dudou efesi. Didif dik mar erek mohkowu eteb ongga rimein fogora onsorora jah mebi. Mohkowu koma en noba ah doida didif. 6 Nou ongga didif dik gij mohkowu efesi insa koma, beda didif dik marska ofoukou erek mar ongga efen aki tohkuru, jera mar ongga era otkonu erecira erek magosu, noba dik mem ofoukou jera mar enjgineg tein ongga angh gij mohkowu efesi insa koma. 7 Beda didif dig oga egens ongga agot oida, 'Petrus, bidebecki noba buina marska koma beda bit ojgomu.' 8 Tina didif duroun gu Ofa oida, 'Tuhan guru, jeska maat koma bera erek mar ongga oska. Jefeda didif dinet maat ongga ebireira erek koma guru! Jeska mefmen runa ensis riyahehir joug memef jeskaseda menet maat erek koma guru.' 9 Tina oga insa oroun gu didif oida, 'Enadaij nou bua bijeka maat insa koma erek oska guru. Jeska Allah bera oncunc oida maat koma bera oufamofa ojgomu.' 10 Didif dik mar insa koma gij dudou efesi rot ofosma juomu, beda dinek mar insa koma deika guru. 11 Gij mona insa koma tein rusnok rugomu ongga erek Yahudi guru rinjesaga keingg mod ongga dingker gij insa koma. Osnok egens jeska monuh Kaisarea bera onobk rua skoita didif. 12 Beda Efena Ebsi Allah ocunc gu didif gij dudou efesi rot oida dudou enemeesa guru, noba duroru rua ojgomu. Noba dedin edohujir ongga cinja erfens tein ruroru didif jah kota Kaisarea. Noba memef nomnaga moira gij mod ongga osnok egens ongga ofoka Kornelius efen. 13 Beda Kornelius koma efesij gu memef rot teinefa ofa ek mar gij odou efesi erek malaikat egens ongga ot jah ofa odou noba agot gu ofa oida, 'Bubk rusnok rineya jah kota Yope jeskaseda rujois osnok egens ongga ofoka Simon Petrus. 14 Ofa emefesij gu bua rot mar ongga emeita eiteij ah ongga efeinah gu bua jera bebin rusnok nomnaga ongga ringker jera bua.' " 15 Beda Petrus agot deika oida, "Askesi didif dimfesij mar gu rua ros, beda ainsa koma tein Efena Ebsi Allah ojuj jeska mebaga noba eker desi rua, morototuma erek Efena Ebsi eker desi mimif gij mona ongga sismeni. 16 Erek koma beda dudou ah keingg rot mar ongga Tuhan anggot gu memef sis fob oida, 'Yohanes eita baptis gu rusnok erek giskini ojgomu, tina iwa imeita baptis oisouska Efena Ebsi Allah.' 17 Jefeda koma orocunc rot koisoisa gu mimif oida, Allah eita Efena Ebsi gu rusnok ongga Yahudi guru morototuma erek Ofa eita gu mimif ongga Yahudi gij mona ongga mimif muroru Tuhan Yesus Kristus oga. Erek koma jefeda enadaij nou didif dagot joug mar ongga Allah ondou os rot nou rusnok enjgineg guru." 18 Nou ongga rusnok Yahudi insa koma ringg mar ongga Petrus emfesij gu rua fob, beda rudou onokum rot ofa deika guru. Beda rua risitit gu Allah noba ragot oida, "Erek koma jefeda Allah tein eita efekesa gu rua ongga Yahudi guru, jeskaseda rua tein rimeesa joug rerin mar ongga oska noba risma eiteij ah ongga efeinah tein." 19 Gij mona ongga rusnok ranggob Stefanus fob, beda rua tein rita mar okum gu rusnok enjgineg ongga ruroru Yesus fob. Jefeda rua insa koma ruku noba riberbera gij monuh enjgineg. Rineya ongga rungku jah monuh Fenisia ni, rineya ongga rungku jah motowohu Siprus ni, rineya tein ongga rungku jah kota Antiokhia ni. Rua nomnaga rifesij rot Allah oga ongga oufamofa gu rusnok ongga erek Yahudi guru gu monuh nomnaga ongga rungku gij. 20 Tina rineya ongga ruroru Yesus fob jeska motowohu Siprus jera monuh Kirene rija jah kota Antiokhia noba rua rifesij rot Allah oga ongga oufamofa osok gij Yesus gu rusnok jah suma ongga erek Yahudi guru. 21 Noba owesa efek jeska Allah ah gu rua, jefeda rusnok riskemba ruroru Yesus noba ruh rudou efesi skoita Tuhan gij monuh insa koma. 22 Rusnok rufoukou rifesij moguma rot mar ongga rua insa koma runtunggom ojgomuja onjoros rua ongga ruroru Yesus gij kota Yerusalem tein rig rot mar insa koma fob. Jefeda rua rubk rerin ruhuj egens ongga ofoka Barnabas skoita rusnok insa koma gij kota Antiokhia. 23 Gij mona ongga Barnabas ensaga jah suma fob, beda ofa odou efaga ouka eteb rot jeska ofa ek oida Allah eita oufamofa eteb gu rusnok ongga ruroru Yesus gij kota insa koma fob. Beda ofa oftuftu rua rot ahais jeskaseda rua ruroru Yesus rot tenten ojgomuja. 24 Barnabas koma bera erek osnok egens ongga odou ocosu efei ahtah eteb. Noba owesa efek jeska Efena Ebsi Allah bera ah gu ofa. Noba ofa tein ororu Yesus rot tenten fob. Jefeda oisouska mar ongga ofa oftuftu noba ontunggom fob, bera rusnok rufoukou runroru Yesus ojgomuja. 25 Beda Barnabas ojohca Saulus gij kota Tarsus. 26 Gij mona ongga ofa orodosu Saulus fob, beda ofa oroun Saulus jah kota Antiokhia jeskaseda goga goftuftu rusnok rufoukou insa koma ongga ruroru Yesus fob. Goga geker morototuma jera rua gij kota Antiokhia gij tahun egens. Noba gij kota Antiokhia insa koma bera rusnok enjgineg rijeka rua ongga ruroru Yesus fob oida, Rua ongga Kristen. 27 Gij mona insa koma bera nabi-nabi ongga Kristen rineya rin jeska kota Yerusalem jah kota Antiokhia. 28 Nabi egens jeska rua ongga ofoka Agabus. Ofa agot oisouska Efena Ebsi gu rua ongga Kristen oida gij mona kahma beda mosona eteb omok rusnok gij monuh ofoukou si. (Noba gij mona kahma, beda mar koma ecira jeni Agabus agot fob. Koma gij mona ongga Klaudius ejerek raja Kaisar ongga ofoka ereij keingg rusnok gij monuh Israel nomnaga). 29 Jefeda rua nomnaga ongga ruroru Yesus gij kota Antiokhia rudou egens nou ruhoturu rerin fifi oknama fogora risa skoita rerin ruhujir ongga ruroru Yesus gij monuh Yudea jeskaseda ringk maat. Rua rikeba fifi koma ororu jeni osnok egens egens efen ofora efek. 30 Nou ongga rua runghoturu fifi insa koma fob, beda rua rita fifi koma gu Barnabas jera Saulus jeskaseda goga gorka fifi insa koma gu ebirfager rusnok Mod Ari ongga ruroru Yesus gij monuh Yudea.
