Kisah Para Rasul 10

1Osnok egens ongga ofoka Kornelius bera eker gij kota Kaisarea. Ofa erek Yahudi guru noba efen ofoka aksa erek kapten egens ongga ofoka ereij keingg tentarer rufok wuntin egens. Ofa jera efen tentarer insa koma rujga jeska monuh Italia. 2Ofa jera rusnok nomnaga ongga ringker jera ofa rugif gu Allah tein. Noba ofa otunggom mar ongga ereita Allah odou eskeira rot. Koma bera, ofa ofij rusnok Yahudi ongga rufojingki. Noba orofosut mona bera ofa om eiteij gu Allah. 3Gij mona juens erek aras orgomu moworu, beda ofa ek mar ongga Efena Ebsi Allah oncunc gu ofa gij odou efesi. Ofa ek malaikat egens jeska Allah en noba ois gu ofa oida, "Kornelius!" 4Kornelius ohobut malaikat egens koma rot emeesa eteb, noba agot oida, "Akeina, meidu?" Beda malaikat koma agot gu ofa oida, "Allah eg buga rot mar ongga bua bum biteij rot gu Ofa fob. Noba Ofa ocunc odou ongga oufamofa skoita bua jeska bua bumfij rusnok ongga rufojingki tein. 5Ebeibeyaif bubk rusnok egema jah kota Yope jeskaseda rujois gu osnok egens ongga ofoka Simon Petrus. 6Ofa eker jera osnok egens ongga ofoka Simon. Simon efen mod ongga ot jah mei mojomu efei efembra. Simon koma efen efarur erek otunggom mar jeska sapi ofos." 7Nou ongga malaikat egens koma agot mar oisa fob, beda Kornelius ois gu gosnok gegeka ongga gomfij ofa jera tentara egens ongga odou ocosu efei ahtah. 8Kornelius efesij gu rua rot mar nomnaga ongga ofa engk jeska malaikat egens insa koma. Beda ofa obk rua jah kota Yope jeskaseda ruhca Petrus. 9Erek monog deika nou mowa ot deis ros, beda rua ongga Kornelius ombkir koma rujowa gu moroju osuwu ros, noba ai juens beda rua rumoira gij kota Yope. Gij mona insa koma tein bera Petrus ejeker jah skida mod ongga ofa engker gij. Mod koma ofos erek edeider. Ofa eja jah skida jeskaseda om eiteij gu Allah jah suma. 10Askesi ofa eker jah suma ros, beda mosona ok ofa fob, jefeda ofa obk osnok egens jeskaseda esejah maat nou ofa. Nou ongga osnok egens koma ensejah maat ros, beda ainsa koma tein Tuhan ocunc mar gu Petrus gij odou efesi. 11Beda Petrus ek mar erek mebaga ohoda, noba ofa tein ek mar erek mohkowu eteb ongga rimein fogora onsorora jah mebi. 12Noba gij mohkowu egens koma bera ofa ek mar ofoukou erek mar ongga efen aki tohkuru, jera mar ongga era otkonu erecira erek magosu. Noba ofa ek mem ofoukou jera mar enjgineg tein. 13Beda ofa eg oga egens ongga agot oida, "Petrus, bidebecki noba buina marska kef beda bit ojgomu." 14Beda Petrus oroun oida, "Tuhan guru, jeska mar koma erek maat ongga oska. Enadaij nou didif dit maat ongga ebireira erek koma guru! Jeska mefmen runa ensis riyahehir joug memef jeskaseda menet maat erek koma guru." 15Tina oga egens koma oroun gu ofa oida, "Enadaij nou bua bijeka marska insa koma erek oska guru, jeska Allah bera oncunc oida maat insa koma bera erek oufamofa ojgomu." 16Tuhan ocunc mar insa koma gu Petrus gij odou efesi erek ofosma juomu fob. Beda Petrus enek mar insa koma deika guru. 17Petrus odou eineina gij mar insa koma efen ofou. Noba askesi ofa osujohu noba ejekjeka odou rot mar insa koma ros, beda rusnok ongga Kornelius omobkir runjowa gu mod ongga Simon engker gij. 18Beda rua rijeka gu rusnok oida, "Osnok egens ongga ofoka Simon Petrus bera eker jera iwa jah sif ei?" 19Ainsa koma tein Petrus odou osujohu rot mar ongga engk insa koma efen ofou ros, beda Efena Ebsi Allah agot gu ofa oida, "Ei, Petrus! Rusnok rugomu ruhca bua. 20Bua bujuj ebeirens noba binemeesa rot rua guru. Bua buroru rua ojgomu, jeska Didif bera ongga dumbk rua koma skoita bua fob." 21Jefeda Petrus ojuj jah mebi noba agot gu rua oida, "Didif bera ongga iwa inohca. Iwa in rot meidu?" 22Rua ruroun oida, "Ebirfaga tentarer egens ongga ofoka Kornelius bera onobk memef skoita bua jah sif. Ofa erek osnok egens ongga odou osowejameja eteb, noba ofa ougif gu Allah tein. Noba rusnok Yahudi rufoukou tein rudou os ofa erek eteb. Malaikat egens jeska Allah agot gu ofa oida ofa erejgei bua jeskaseda bin jah efen mod, beda ofa emeg mar meidu ongga bua bimagot rot gu ofa si." 23Jefeda Petrus oroun rua noba rua rahca gij Simon efen mod nou motu insa koma. Erek monog rahah tentena, beda Petrus ororu rusnok insa koma jah kota Kaisarea. Rusnok rineya ongga ruroru Yesus gij kota Yope rija morototuma jera rua tein. 24Rua ricira erek motu egens beda risaga gu monuh Kaisarea. Beda Kornelius ohoturu efen rusnok nomnaga jera efen mohujir gij efen mod efesi, jeska ofa ororu eimofoj rot Petrus. 25Nou ongga Kornelius engk Petrus ensaga fob, beda Kornelius ojorodosu ofa jah moroju. Beda ofa es okeibi gu mebi noba ougif gu Petrus. Ofa osujohu oida Petrus erek osnok egens ongga ebsi komowa eteb. 26Tina Petrus oku etma noba agot gu ofa oida, "Bidebecki ojgomu, jeska didif tein dusnok giskini erek bua." 27Askesi Petrus jera Kornelius gemfesij mar moguma ros, beda goga goira jah mod efesi. Beda Petrus ek, tina rusnok rufoukou rumohoturuma jah suma fob. 28Beda ofa agot gu rua oida, "Iwa tein ijginaga rot oida, ororu agama Yahudi erebent bera enadaij nou memef ongga Yahudi meker erek egens era mineremesema tein jera rusnok enjgineg guru. Jeska memef mosujohu rot oida rusnok ongga Yahudi guru bera rerin mar ongga oska ojgomu. Tina ebeibeyaif Allah oncunc gu didif gij dudou efesi fob oida enadaij nou didif dusujohu rot mar erek koma deika guru. 29Jeska gij mona ongga Tuan ois gu didif jeskaseda din jah sif, beda didif dudou onokum rot guru. Jefeda ebeibeyaif didif dudou os dijeka gu bua oida bua buis gu didif jeskaseda din rot meidu." 30Beda Kornelius agot gu Petrus oida, "Erek mona tohkuru fob, didif dum diteij gij dedin mod erek moworu fob. Beda ainsa koma tein didif dik mar erek osnok orna egens ot jah dudou. Ofa ergi meisoufa ongga erek efesa eteb. 31Beda osnok orna egens koma agot gu didif oida, 'Kornelius, Allah eg buga rot mar ongga bum biteij rot gu Ofa fob. Noba Ofa odou eskeira rot bua jeska bua bumfij rusnok ongga rufojingki. 32Ebeibeyaif bubk rusnok rineya jah kota Yope jeskaseda rujois gu osnok egens ongga ofoka Simon Petrus. Ofa eker jera osnok egens ongga ofoka Simon. Simon efen mod ongga ot jah mei mojomu efei efembra. Osnok egens koma efen efarur erek otunggom mar jeska sapi ofos.' 33Jefeda didif dumbk rusnok ebeirens jeskaseda rujoroun bua jah sif. Noba bua budou eriaga eteb jeska bua bin skoita didif fob. Jefeda memef nomnaga memohoturuma erek egens nou Allah fob. Noba memef mesejah nou meg mar nomnaga ongga Tuhan Allah obk bua rot jeskaseda bagot gu memef." 34Beda Petrus agot oida, "Ebeibeyaif didif dudou ebriyi gij rot tenten oida Allah odou okora rot rusnok nomnaga, koma erek rusnok Yahudi jera rusnok ongga Yahudi guru tein. 35Ofa odou okora rot rusnok gij monuh nomnaga ongga rugif gu Ofa noba ongga rita mar ongga oufamofa ojgomuja. 36Iwa ijginaga rot oida Allah bera eita efen oga ongga oufamofa gu rusnok Israel sis fob. Allah oga ongga oufamofa koma bera ongga ocunc gu rusnok nomnaga rot teinefa rua rimeita eiteij ah ongga efeinah jeska Yesus Kristus. Beda Allah omoroun rua erek efen rusnok. Yesus koma bera erek Tuhan nou rusnok nomnaga. 37Iwa tein ijginaga rot mar ongga Ofa ontunggom sismeni gij monuh Galilea, beda rejrej monuh Yudea tein. Mar insa koma ororu mona ongga Yohanes eita baptis gu rusnok. 38Iwa tein ijginaga oida Allah bera oncunc Yesus ongga ojga monuh Nazaret. Noba Ofa eita owesa efek eteb jera Efena Ebsi gu Yesus jeskaseda Ofa otunggom mar onswos ofoukou. Noba Ofa ecira rejrej monuh ofoukou beda Ofa otunggom mar ongga ongkoska eteb erek eita eskeira gu rusnok ongga Bilis ot keingg ojgomuja. Ofa otunggom mar erek koma jeska Allah bera eker desi Ofa. 39Didif jera dedin edohujir ongga setka kungkob erfens bera mek gu mesinsa meiteij rot mar nomnaga ongga Ofa ontunggom rejrej monuh Yahudi jera gij kota Yerusalem tein. Erek koma tina rusnok runtob Ofa tumu mega salib beda Ofa agos. 40Tina gij mona juomu deika fob, beda Allah eita owesa efek gu Ofa jefeda Ofa edebecki jeska agos. Beda Allah ocunc Ofa gu rusnok rufoukou tein. 41Allah onocunc Ofa gu rusnok Yahudi nomnaga guru, tina gu memef ongga Allah oncunc gij mona ongga sismeni jeskaseda memef mefesij gu rusnok enjgineg rot mar insa koma ongga memef mek gu mesinsa meiteij. Memef mej mei noba met maat morototuma jera Ofa gij mona ongga Ofa endebecki jeska agos fob tein. 42Noba Ofa obk memef jeskaseda mefesij rot Oga ongga oufamofa insa koma gu rusnok nomnaga. Noba memef mefesij gu rusnok oida Yesus koma esma ofoka ongga aksa eteb jeska Allah jeskaseda Ofa oga ojga rot rusnok nomnaga osok gij idu bera ongga emesma okum jeska Allah noba idu bera ongga emesma oufamofa jeska Allah tein. Koma rot rusnok nomnaga ongga rifena ebah ros jera rusnok nomnaga ongga ranggos fob tein. 43Sis fob bera nabi-nabi nomnaga rimfesij mar osok gij Yesus. Rua ragot oida erek rusnok rudou ororu Yesus Kristus rot tenten, beda Allah omosuna rot rerin mar ongga oska jeska rudou efesi oisouska Yesus esinsa efen owesa efek." 44Askesi Petrus emfesij mar insa koma ros, beda ainsa koma tein Efena Ebsi Allah ojuj noba eker jera rua nomnaga ongga ragosuit mar ongga Petrus enagot koma. 45- 46Rusnok Yahudi ongga ruroru Yesus fob noba ongga rincira morototuma jera Petrus jeska kota Yope rig rusnok insa koma nomnaga rifesij mar noba risitit gu Allah gij oga enjgineg ongga rusnok koma risinsa rinejginaga rot enesi. Mar onswos insa koma en jeska Efena Ebsi Allah. Jefeda rusnok Yahudi insa koma rudou oubsaha eteb jeska koma orocunc rot oida Allah eita Efena Ebsi gu rusnok enjgineg ongga erek Yahudi guru tein fob. 47Beda Petrus agot oida, "Iwa ik rusnok kef! Rua tein risma Efena Ebsi Allah erek memef tein! Jefeda adaij nou rua rita baptis noba ruroru Yesus ojgomu." 48Beda Petrus obk rua jeskaseda rita baptis gij Yesus Kristus ofoka. Nou ongga rua rita baptis fob, beda rua ruis gu Petrus jeskaseda ofa eker jera rua erek mona orgomu deika fog.

will be added

X\