Kisah Para Rasul 1

1Teofilus ongga dudou okora rot, gij surat sismeni ongga didif disa skoita bua sis fob bera didif dimfesij mar gu bua osok gij Yesus Kristus. Didif dimfesij rot mar nomnaga ongga Ofa ontunggom jera mar nomnaga ongga Ofa omftuftu rot gij mona ongga Ofa osokeij efen efarur 2- 3ojgomuja onjoros mona ongga Ofa osok jah mebaga. Gij mona ongga Ofa endebecki jeska agos fob, tina eneja jah mebaga enesi, beda Ofa orogna keingg gu efen ruforoker rufok setka kungkob erfens rot ofosma ofoukou. Noba Ofa ocunc mar ofoukou gu rua jeskaseda rudou ejginaga rot tenten oida Ofa endebecki jeska agos noba efena ebah sons rot tenten fob. Ofa ocunc esinsa gu rua erek insa koma gij mona rara setka tohkuru, noba Ofa efesij mar gu rua osok gij rot teinefa Allah ofoka ereij keingg rusnok. 4Gij mona juens bera Ofa et maat morototuma jera rua. Beda Ofa eyahehir joug rua oida, "Iwa ineja jeska kota Yerusalem enesi, tina iwa iker gij kota koma onjoros mona ongga iwa insma Efena Ebsi ongga Akeina Allah anggen gu iwa rot sismeni fog. Noba Didif tein dimfesij mar rot Efena Ebsi Allah insa koma gu iwa sis fob. 5Jeska sis fob bera Yohanes eita baptis gu rusnok erek giskini ojgomu. Tina gij mona ongga dektek deika guru, beda Efena Ebsi Allah emeita baptis oisouska efen owesa efek ongga Ofa emeita gu iwa si." 6Nou ongga Yesus efen ruforoker insa koma rumohoturuma jera Ofa fob, beda rua rijeka gu Ofa oida, "Tuhan, erek Bua bumosuwa mimif ongga Yahudi jeska rusnok ongga rufogog gij mona insa kef jeskaseda mimif misinsa mufoka ereij keingg mifmin rusnok Yahudi ei?" 7Beda Yesus oroun gu rua oida, "Akeina esinsiyai bera enagot rot mona insa koma efen eimofoj ojgomu. Mar koma bera enen jeska iwa guru." 8Tina gij mona ongga Efena Ebsi en skoita iwa fob, beda iwa imesma owesa efek si. Beda iwa imefesij mar osok gij mar ongga iwa ingk noba ingg jeska Didif gu rusnok gij kota Yerusalem ni, rejrej monuh Yudea jera Samaria ni, ojgomuja onjoros iwa imfesij mar gu rusnok rejrej monuh nomnaga ongga angh gu mebif si. 9Nou ongga Yesus anggot mar insa koma fob, beda Ofa efen ruforoker rik Ofa osok jah mebaga, noba mocgoj ofog ocohun Ofa jeska rua. 10Noba askesi rua ruhobut jah mebaga ros, beda ainsa koma tein gosnok gegeka ongga gergi meisoufa ongga ebsi komowa gorogna beda got desi rua. 11Beda goga gagot gu rua oida, "Ei, iwa ongga monuh Galilea! Iwa yuhobut jah mebaga rot meidu? Jeska Yesus, ongga iwa ik onsok jah mebaga ainsa koma, Ofa bera omojuj jeska mebaga sons en erek iwa ik Ofa osok jah mebaga koma si." 12Erek koma beda Yesus efen ruforoker rija jeska memaga Zaiton ofos noba ruksons jah kota Yerusalem. Memaga ofos insa koma bera ah erek meter ribu egens jeska Yerusalem. 13Nou ongga rua rinsaga jah Yerusalem fob, beda rua rijeker gij morongsu egens jah suma. Morongsu egens koma ah skida mod ongga rusnok enjgineg rerin. Ruforoker ongga rumohoturuma jah suma bera Petrus ni, Yohanes ni, Yakobus ni, Andreas ni, Filipus ni, Tomas ni, Bartolomeus ni, Matius ni, Yakobus ongga Alfeus efesa ni, Simon (ongga rijeka Patriot) ni, jera Yudas ongga Yakobus efesa. 14Rua nomnaga rumohoturuma rot rudou egens fogora rum riteij ojgomuja. Rineya jah suma ongga rum riteij gu Allah morototuma jera rua bera erek rujager ongga ruroru Yesus gij mona ongga sismeni fob, jera Maria ongga Yesus efen mosu, jera Yesus efen mokoser tein. 15Gij mona juens deika beda rua rumohoturuma sons. Rua ongga rumohoturuma gij mona insa koma bera erek rusnok rufok wuntin egens noba setka egeka. Beda Petrus ot noba agot oida, 16"Edohujir, mar ongga angh gij Mar Efeyi Ebsi ongga raja Daud onggu oisouska Efena Ebsi sis fob bera ah gij efera fob. Jeska mar insa koma bera efesij mar osok gij Yudas ongga oroun rusnok ongga rufogog jeskaseda ranggei Yesus. 17Gij mona insa koma bera ofa erek osnok egens ongga Yesus ocunc erek efen oforoka egens jera mimif. Noba ofa tein ofij Yesus morototuma jera mimif tein. 18(Yudas esma fifi jeska rusnok ongga rufogog jeskaseda oncunc Yesus gu rua fogora rua ragei Yesus. Beda ofa era fifi insa koma erengk mebi. Tina ofa esma jah odou gij mebi fogora eredi mebi insa koma. Beda efen otkonu ebriyi noba orogna nomnaga fogora agos ojgomu fob. 19Rusnok nomnaga ongga ringker gij kota Yerusalem rijginaga rot mar insa koma nomnaga fob, jefeda rua rijeka mebi insa koma gij rerin ruga oida Akeldama. Koma efen ofou oida Mebi Ogufu.) 20Mar insa koma ongga edi Yudas bera encira jeni mar ongga runggu gij Mar Efeyi Ebsi rot ofa erek kef oida, 'Adaij nou ofa efen mebi ah erek owowa ojgomuja. Noba erek osnok egens ai eneker gij tein guru.' Noba mar enjgineg gij Mar Efeyi Ebsi agot erek kef oida, 'Adaij nou osnok egens ongga enjgineg eferwei ofa ojgomu.' " 21- 22Erek koma beda Petrus agot deika oida, "Jefeda ongga oufa bera mimif mucunc osnok egens jeska mimif ongga ororu Yesus gij mona ongga Yohanes eita baptis gu Yesus onjoros mona ongga Ofa onsok jah mebaga fob. Osnok egens koma tein emefesij mar gu rusnok rot mar ongga mimif mingk jera mingg jeska Yesus fob. Ofa tein emagot gu rua oida Yesus edebecki jeska agos fob." 23Jefeda rua rucunc gosnok gegeka jeska rifekesa. Geneya gofoka Yusuf ongga rinjeka erek Barsabas tein (ofa efen ofoka Yustus tein) jera Matias. 24- 25Beda rua rum riteij gu Allah oida, "Tuhan, Bua bijginaga rot mar nomnaga ongga angh gij rusnok rudou efesi fob. Bua bijginaga oida Yudas esiri gij mar ongga oska fogora agos fob. Jefeda Bua bucunc gu memef rot oida idu jeska gosnok gegeka kef ongga Tuhan Bua budou os jeskaseda eferwei Yudas ongga eja jah monuh mar agos fob." 26Erek koma beda Allah ocunc Matias jeskaseda eja erek oforoka egens ongga eferwei Yudas. Beda rua rufra ofa erek oforoka egens dokun jera rua ongga rufok setka kungkob erfens.

will be added

X\