3 Yohanes 1

1Didif Yohanes, ongga direk ebirfaga Mod Ari egens, bera dunogu surat egens kef skoita bua Gayus ongga dedin edohuj ongga dudou okora rot. 2Didif dum diteij gu Allah nou bua ojgomuja jeskaseda bua bita biteij ah ongga eskeiramera noba ebera rot mar ongga ongkoska ojgomu. Didif dijginaga fob rot oida budou efesi bera erek eskeira ojgomu. 3Noba didif dudou erirei eteb rot mar ongga didif dingg jeska obohujir ongga rin jah sif fob. Jeska rua rifesij gu didif rot teinefa bua bita mar ongga erek tenten ojgomu. Noba rua tein rifesij rot oida bua buroru Allah oga rot tenten ros. 4Gij mona ongga didif dingg oida dedin edohujir ruroru Allah oga rot tenten ojgomuja, beda mar koma ereita dudou efesi erirei eteb rot tein. Dudou erirei erek koma jeska rua bera erek dedin edeser. 5Edohuj ongga dudou okora rot, bua bera buroru Allah oga rot tenten fob, jeska bua bumfij rusnok enjgineg ongga rin skoita bua fob. Erek bua binejginaga rot rua enesi, tina jeska rua erek Kristen tein, beda bua bumfij rua fob. Koma bera erek mar ongga ongkoska eteb. 6Ebeibeyaif rua rimfesij gu mimif gij Mod Ari jah sif rot teinefa bua bucunc budou ongga okora rot rua. Noba ongga oufamofa ekirsa bera, bua bubk rua jah monuh enjgineg tein rot ongkoska ojgomu erek Allah ondou os rot. 7Rua insa koma rincira jah monuh enjgineg jeskaseda ruftuftu mar rot Yesus oga gu rusnok jah suma. Noba rua runohca fifi era mareibra jeska rusnok ongga runororu Yesus enesi guru, tina rua ruisum gij Yesus efen rusnok rot mar koma ojgomu. 8Jefeda erek mimif mufij rusnok ongga rimfarur rot Yesus oga erek koma, beda koma bera erek mar ongga oufamofa eteb ojgomu. Mimif mita mar erek koma jeskaseda mimif nomnaga tein mimfarur morototuma erek egens rot Yesus oga ongga tenten. 9Didif disa surat egens ongga estir kef skoita Mod Ari ongga Diotrefes efen tein jeskaseda rua rufij rusnok ongga rumftuftu rot Allah oga. Tina Diotrefes bera ohca rot efen ofoka ongga aksa ojgomu, jefeda ofa onofij memef rot mar insa koma guri. 10Ofa ocuwei mar rourou gij memef gu rusnok enjgineg. Noba mar ongga oska ekirsa bera, ofa onofij mifmin rusnok insa koma ongga rujoftuftu rot Yesus oga guri. Beda ofa tein eyahehir joug rua ongga rudou os ruftuftu rot Yesus oga noba ekemeji rua jeska Mod Ari jah suma. Jefeda erek didif dija jah suma, beda didif dumocunc mar insa koma ongga ofa ontunggom rot tomnomna gu rusnok nomnaga jah suma tein si. 11Erek koma jefeda, edohuj ongga dudou okora rot, bua bunororu mar ongga oska guru, tina buroru mar ongga ongkoska ojgomuja. Budou ah keingg rot kef oida, rusnok ongga rutunggom mar ongga ongkoskamoka bera rurocunc rot oida rudou ejginaga rot Allah fob. Noba rusnok ongga rutunggom mar ongga oska bera rurocunc rot oida rudou rinejginaga rot Allah enesi. 12Rusnok rufoukou bera ragot mar rot Demetrius fob oida ofa bera erek osnok egens ongga oufamofa eteb. Noba Ofa ororu jeni mar ongga Allah anggot rot ojgomu fob. Noba memef tein magot rot oida ofa bera osnok egens ongga ongkoska ojgomu. Noba iwa ijginaga rot oida monocuwei mar rot tein guru. 13Mar ofoukou ongga didif dudou os dugu gij surat egens kef skoita iwa deika, tina didif dunogu rot mar insa koma ebeibeyaif guru. 14Jeska didif dusujohu oida dimen skoita iwa fogora dimagot rot mar insa koma teisis gu iwa si. 15Didif dum diteij gu Allah jeskaseda Ofa eita oufamofa eteb gu iwa nomnaga. Mifmin muhujir jah sif ruisu iwa tein. Noba didif duisu orofosutut osnok egens egens ongga ringker jera iwa jah suma tein. Ainsoma.

will be added

X\