2 Tesalonika 3

1Edohuji, nou ongga memef mogu mar rot omoisa gij surat egens kef bera memef mois gu iwa jeskaseda iwa yum iteij gu Allah nou memef tein. Iwa yum iteij gu Ofa jeskaseda Tuhan oga ongga memef moftuftu rot bera omorok mokcin rusnok rufoukou egema dokun deika ojgomuja. Noba yum iteij jeskaseda rusnok ongga ringg rot Tuhan oga insa koma rumougif gu oga koma morototuma erek iwa yugif gu gij mona ongga sismeni fob. 2Noba iwa yum iteij gu Tuhan jeskaseda Ofa omoskotu memef jeska rusnok ongga rutunggom mar ongga ofogog skoita memef tein. Jeska rusnok rineya ongga runororu Allah oga rot tenten jinaga guru. 3Erek koma tina, Tuhan emeita mar nomnaga ongga Ofa anggen rot sis fob si. Noba Ofa emeita owesa efek gu iwa fogora omot joug iwa jeska Bilis ongga ofogog eteb si. 4Memef moisum gij Tuhan rot oida iwa bera incira gij mar ongga memef moftuftu gu iwa sis fob. Noba iwa imecira gij mar insa koma nou mona kahma tein si. 5Memef mom meiteij gu Tuhan jeskaseda Ofa omofij iwa fogora idou emebriyi gij rot teinefa Ofa odou okora eteb rot iwa. Noba memef mom meiteij gu Ofa jeskaseda iwa imeita idou ahais gij mar okum ongga ereneni iwa morototuma erek Yesus Kristus eita odou ahais gij mar ongga ereneni Ofa sis fob. 6Edohuji, memef magot rot gu iwa oisouska Tuhan Yesus Kristus ofoka oida iwa ibes efaga jeska yeyin ihujir ongga rufora ogug joug rerin mar ongga rimfarur rot, noba ongga runororu mar ongga memef momftuftu gu iwa sis fob guru. 7Jeska iwa isinsa ijginaga rot teinefa iwa inroru mar nomnaga ongga memef moncunc gu iwa sis fob ojgomu. Gij mona insa koma bera memef monofora ogug rot askesi mengker gu ifekesa ros guru. 8Memef menet rusnok enjgineg rerin maat rourou guru. Tina memef mengk maat insa koma jeska rua fogora memet. Noba memef mog mejmeg noba mefarur orofosut mona jera motu jeskaseda monoisum gij iwa rot maat jera meisoufa egema tein guru. Jeska memef modou os mofij iwa gij mar insa koma ojgomu. 9Memef meneita mar erek insa koma jeska enadaij nou memef moisum gij iwa rot mar insa koma guru. Jeska adaij nou memef mois rot mar koma gu iwa ojgomu. Tina memef meita mar erek insa koma jeskaseda morocunc gu iwa rot teinefa rusnok rifarur rot iskusk ojgomu. 10Jeska gij mona ongga memef mengker jera iwa ros, bera memef magot rot gu iwa oida, "Erek osnok egens ofora ogug fogora enefarur rot mar ongga ofa ocosu rot guru, beda iwa ineita maat gu ofa tein guru." 11Memef modou os magot rot mar ofoka egens insa koma gu iwa jeska memef meg rot oida rineya jeska iwa bera rumfora ogug joug mar ongga rimfarur gij ojgomuja. Mar egens ongga rua rita rot iskusk bera ruh rufonoknok gij rusnok enjgineg ojgomu. Tina koma bera onoufa guru. 12Memef mois gu rua noba magot rot oisouska Tuhan Yesus Kristus ofoka jeskaseda rua insa koma rineita mar erek koma deika guru, tina rifarur rot iskusk nou maat ongga rimet ojgomu. 13Noba memef mois gu iwa ongga iroru Yesus oga rot tenten fob jeskaseda iwa ineita idou ongga eskes rot mar ongga oufamofa ojgomu, tina iroru mar insa koma rot ahais ojgomuja. 14Noba iwa inoromohohuma jera rusnok ongga rukoja mar ongga memef memfesij rot gij surat kef ojgomu guru. Iwa ita mar erek insa koma jeskaseda mojenir rot mar ongga runtunggom fob. 15Noba iwa inocunc rua erek mesa ongga ofogog guru. Tina iyahehir joug rua erek yeyin ihujir ongga ruroru Yesus fob tein ojgomu. 16Tuhan Allah bera ongga eita eiteij ah ongga eskeiramera gu rusnok nomnaga. Noba memef mois gu Ofa jeskaseda Ofa emeita eiteij ah ongga eskeiramera gu iwa ojgomuja, noba jeskaseda Ofa emeker joug iwa tein ojgomuja. 17Didif Paulus disinsa dugu mar insa kef gu iwa. Noba didif dugu mar erek kef gij surat nomnaga ongga didif disa skoita rusnok fob. Koma bera ditma efeb insa kef ojgomu. 18Memef mom meiteij gu mifmin Tuhan Yesus Kristus jeskaseda Ofa ocunc efen odou ongga oufamofa eteb gu iwa nomnaga. Ainsoma.

will be added

X\