2 Tesalonika 1

1Didif Paulus jera dedin edohujirga Silas gonu Timotius bera monogu surat egens kef gu iwa ongga iroru Yesus Kristus Kristus gij kota Tesalonika. Iwa bera injerek mifmin mika Allah jera mifmin Tuhan Yesus efen rusnok fob. 2Memef mois gu mifmin mika Allah jera Tuhan Yesus Kristus jeskaseda Ofa ocunc efen odou ongga oufamofa eteb gu iwa, noba jeskaseda iwa isma iteij ah ongga eskeiramera ojgomuja. 3Edohuji, memef mesitit mar gu Allah rot iwa ojgomuja. Memef modou os motunggom erek koma jeska memef mek, tina iwa iroru Yesus Kristus rot idou ongga ahais odudu dokun deika ojgomuja. Noba iwa idou omokorema rot tenten odudu deika tein ojgomuja fob. 4Jefeda gij mona ongga memef monjogog rusnok ongga ruroru Yesus gij monuh enjgineg tein, beda memef mofra yeyin ifoka erek oufamofa skoita rusnok insa koma. Memef magot gu rua oida, "Erek rusnok rita mar ongga ofogog skoita rua ongga Tesalonika fogora mar okum ereneni rua ojgomuja, tina rua rut rot ahais gij mar insa koma noba rua ruroru Yesus rot tenten ojgomuja." 5Mar insa koma bera orocunc gu mimif nomnaga rot oida mar ongga Allah oga ojga rot rusnok bera erek tenten ojgomu. Jefeda Ofa omoga ojga rot oida iwa imoira jera rusnok ongga Ofa ofoka ereij keingg si. Jeska iwa yut rot ahais gij mar ongga ereneni iwa ojgomuja. 6Mar nomnaga ongga Allah otunggom skoita rusnok bera erek edeider ojgomu. Beda ofa emesesa mar ongga okum sons skoita rusnok ongga rita mar ongga okum skoita iwa fob si. 7Noba ofa omofij iwa gij mar okum ongga ereneni iwa fogora imeker keingg ifonskos rot si. Noba Ofa omofij memef tein gij mona ongga Tuhan Yesus ongksons jeska mebaga gij mah ongga eisa eteb jera efen malaikat-malaikat ongga efen owesa efek eteb tein. 8Beda Ofa omofra mar okum eteb keingg rusnok nomnaga ongga runougif gu Allah guru jera rusnok nomnaga ongga runororu efen oga ongga oufamofa osok gij mifmin Tuhan Yesus Kristus guru tein si. 9Rua insa koma rimesma mar okum eteb fogora rimeseiseifa rot gij mona ongga ah aibin ojgomuja. Tuhan emekemeji rua jeska Ofa rot ahais fogora rinek Ofa efen ofoka aksa jera efen owesa efek eteb deika guru. 10Ofa omotunggom mar insa koma gij mona ongga Tuhan Yesus ongksons en fob. Gij mona insa koma Ofa efen rusnok ongga rudou ebsi komowa omofra efen ofoka erek aksa eteb. Noba rua nomnaga ongga ruroru efen oga rot tenten fob bera rudou emeskeira eteb rot Ofa si. Noba iwa ongga kota Tesalonika bera rimeita idou efesi ongga eskeira morototuma gij mona insa koma tein. Jeska iwa iroun mar ongga memef moftuftu gu iwa sis fob. 11Erek koma jefeda memef mom meiteij gu Allah nou iwa ojgomuja jeskaseda Ofa omocunc iwa erek efen rusnok ongga ruroru efen oga rot tenten fob. Jeska Ofa bera ongga enjeka iwa jeskaseda ija erek efen rusnok fob. Beda oisouska Ofa efen owesa efek bera Ofa omofij iwa gij mar nomnaga ongga iwa itunggom oisouska idou ongga ororu Ofa rot tenten fob. 12Memef mom meiteij rot mar erek insa koma jeskaseda gij mona ongga rusnok enjgineg rik mar ongga oufamofa ongga iwa intunggom fob, beda rua rumofra Tuhan Yesus ofoka erek aksa eteb rot. Noba koma bera emecira jeni mifmin Allah jera Tuhan Yesus Kristus oncunc odou ongga oufamofa skoita iwa fob.

will be added

X\