2 Petrus 3

1Edohuji ongga dudou okora rot, surat egens kef ongga didif dunogu skoita iwa bera erek surat ongga egeka deika nou iwa. Noba didif dugu surat ongga egeka kef jeska didif dudou os direbs idou efesi jeskaseda iwa isujohu rot mar ongga erek ongkoska ojgomu. 2Didif dita mar erek koma jeskaseda idou ah keingg rot mar ongga Allah efen nabi-nabi ongga ebsi komowa ranggot rot sis fob. Noba iwa idou ah keingg rot mar ongga mifmin Tuhan Yesus Kristus, ongga onskotu mimif, anggot rot gu iwa oisouska memef ongga erek iwa yeyin rasul-rasul. 3Iwa ijginaga rot kef ojgomu oida, nou mona ongga enja ejgwaga ensaga doida fob, bera rusnok ongga ruga oruh iwa rimen si. Rua rumoga oruh rusnok ojgomuja noba rumororu mar ongga ofogog ongga rudou eftirir keingg rot tein si. 4Rua rimagot mar erek kef oida, "Sis fob Tuhan Allah anggen rot oisouska nabi-nabi oida Ofa omoksons en si. Tina mimif minek mar egema tein ongga orocunc rot mar insa koma guri. Noba sis mona ongga Kristen rerin ebirfager ongga ranggos fob bera mar nomnaga ecira erek giskini ojgomu. Jeska sis mona ongga Allah ontunggom mebif nomnaga onjoros mona deisef tein bera mar nomnaga ah erek giskini ojgomu. Jefeda Yesus onoksons en deika guru." 5Rua ragot mar rourou erek koma, tina rua rijginaga rot oida mar insa koma bera enerek tenten guru. Jeska rua rudoubu joug rusujohu rot mar ongga Allah ontunggom sis mona ongga dojunmeni ojgomu. Rua rudou onosujohu rot mar erek kef guru oida, "Allah ontunggom mebaga oisouska efen oga ongga anggot rot ojgomu. Noba Ofa era mei orotunggom mebif tein oisouska oga ongga anggot rot ojgomu." 6Noba oisouska mar ongga Ofa anggot rot, bera Ofa era mei ofot orohoda monuh nomnaga onjoros orowora fob. 7Erek koma tein, oisouska mar ongga Ofa anggot rot bera Ofa aha mebaga jera mebif jah. Mar koma emah ojgomuja onjoros mona ongga Ofa omoga ojga rot rusnok rot rerin rita mar ongga oska fogora ofra okum mar keingg rua rot oisa fog ojgomu. Noba Ofa aha mebaga jera mebif koma jah ojgomuja jeskaseda gij mona insa koma tein Ofa emeres mah gij mar koma nomnaga fogora eribseb ojgomu. 8Erek koma tina, edohuji ongga dudou okora rot, iwa idou onofoj joug rot kef guru oida, skoita Allah mona egens bera erek tahun ribu egens ojgomu. Noba skoita Ofa tein tahun ribu egens bera erek mona egens ojgomu. 9Erek koma jefeda rusnok rineya rusujohu oida Tuhan enen jinaga guru. Tina iwa ijginaga rot tenten oida Ofa enen jeskaseda oga ojga rot rusnok enesi, jeska Ofa oin keingg odou efesi rot rusnok ros. Ofa eita mar erek koma jeska Ofa odou os rusnok nomnaga tein rimeesa joug rerin mar ongga oska fogora risma eiteij ah ongga efeinah ojgomu. 10Erek Allah oin keingg odou efesi erek insa koma, tina Yesus emen si. Noba mona ongga Ofa ongksons en bera omorogna keingg rusnok nomnaga erek osnok egens ongga okoreka mar orogna keingg rusnok gij rerin mod efesi ojgomu. Gij mona insa koma bera mebaga emeseiseifa. Beda rusnok rimeg moc ogugur eteb fogora mah emet mar nomnaga ongga angh gu mebaga fogora eribseb. Noba Allah tein emes mah eteb gij mebif jera mar nomnaga ongga angh gij mebif onjoros mar insa koma nomnaga eribseb ojgomu. 11Ofa omotunggom mar erek insa koma si, jefeda iwa ita mar rot idou ongga ebsi komowa ojgomu. 12Iwa ita mar erek koma askesi yug moroju joug mona ongga Allah oncunc rot jeskaseda Yesus Kristus omoksons en rot ebeirens. Jeska gij mona insa koma bera mah emet mebaga jera mar nomnaga ongga angh gu mebaga jera mebif fogora eribseb ojgomu. 13Erek koma tina, mimif mudou ot rot oida Allah omotunggom mebaga jera mebif ongga efeinah deika si. Jeska Ofa anggen rot mar erek koma sis fob. Jeska rusnok ongga rerin rudou ongga ebsi komowa bera rimeker jah suma si. 14Erek koma jefeda, edohuji ongga dudou okora rot, jeska iwa yug moroju rot mar insa koma nomnaga, beda iwa tein ireni rot ahais jeskaseda gij mona ongga Tuhan Yesus ek iwa, beda idou erek ebsi komowa ojgomu. Ita mar erek koma jeskaseda rusnok runocunc iwa rot yeyin mar ongga oska egema tein jinaga guru. Noba ita idou ongga eskeira mejerema ojgomu. 15Noba iwa idou ejginaga rot oida, mifmin Tuhan oin keingg odou efesi rot rusnok jeska Ofa odou os oskotu rusnok jeska rerin mar ongga oska ros. Noba Paulus tein, ongga mudou okora rot, bera onggu mar osok gij mona ongga Yesus omoksons en. Noba ofa ogu mar koma rot odou ongga efesis eteb ongga ofa ensma jeska Allah fob. 16Ofa ogu efen surat nomnaga rot odou ongga efesis eteb erek koma. Noba surat-surat koma bera efen mar ofoka egens egens ongga okum rot rusnok rudou ebriyi gij. Jefeda rusnok enjgineg ongga rudou osumsumu noba ongga risiri gij mar ongga oska bera ragot rot surat-surat insa koma efen ofou ongga erek toga jeska mar ongga Paulus anggot rot. Rua rita mar erek koma rot Mar Efeyi Ebsi tein efen ofou. Jefeda koma erek rua rufra mar ongga okum jeska Allah keingg risinsa ojgomu. 17Edohuji ongga dudou okora rot, iwa ijginaga fob oida mar ongga Guru-Guru ebireira insa koma ranggot rot bera erek oska eteb fob. Jefeda iwa yut joug idou efesi rot ahais. Rua koma runororu hukum egema tein guru. Jefeda iwa ita idou ahais jeskaseda mar ongga rua runtunggom bera onorokrusa iwa fogora imororu rerin mar ongga oska insa koma tein guru. Jeska erek iwa iroru rerin mar insa koma, beda iwa imesiri jeska mar koma ongga iwa inroru rot tenten ebeibeyaif si. 18Iwa ineita mar erek Guru-Guru ebireira insa koma guru, tina iwa ita mar ongga oufamofa jeskaseda mifmin Tuhan Yesus Kristus, ongga onskotu mimif, bera eita efen odou ongga eskeiramera rot iwa ojgomuja. Mimif mudou os jeskaseda rusnok nomnaga rufra Yesus Kristus efen ofoka erek aksa eteb ebeibeyaif noba gij mona ongga ah aibin tein ojgomuja. Ainsoma.

will be added

X\