2 Petrus 1

1Didif Simon Petrus bera ongga dunogu surat egens kef. Didif bera direk osnok egens ongga omfij Yesus Kristus. Noba Ofa bera ongga oncunc didif tein erek efen rasul egens fob. Didif disa surat egens kef skoita iwa ongga isma idou ongga ororu Yesus Kristus morototuma jera memef tein. Mimif misma mudou ongga ororu Yesus Kristus oisouska Allah, ongga odou ebsi komowa, jera Yesus Kristus tein ongga onskotu mimif jeska mifmin mar ongga oska fob. Noba mudou ongga ororu Ofa erek koma bera erek mar ongga ongkoska eteb ahah Allah eiteij. 2Didif dum diteij gu Allah jeskaseda Ofa ocunc efen odou ongga oufamofa eteb skoita iwa noba jeskaseda iwa ita iteij ah ongga eskeiramera eteb ojgomuja. Mimif misma mar insa koma oisouska mar ongga mimif mijginaga rot osok gij Allah jera Yesus tein fob. Ofa bera erek mifmin Tuhan. 3Oisouska Allah efen owesa efek eteb bera mimif misma mar nomnaga ongga mimif mucosu rot jeskaseda mita eiteij ah ongga efeinah noba muroru Ofa rot mudou ongga ebsi komowa ojgomuja. Noba mimif misma mar insa koma oisouska mudou ongga ejginaga rot Ofa tein. Jeska Ofa bera enjeka mimif jeskaseda mija erek efen rusnok fob. Ofa enjeka mimif erek koma oisouska efen ofoka ongga aksa eteb jera odou ongga ebsi komowa eteb tein. 4Noba oisouska mar insa koma nomnaga bera Ofa agen rot oida Ofa emeita mar ongga ofoufem noba ongga ongkoska eteb gu mimif si. Ofa agen rot mar koma jeskaseda mimif tein mutunggom mar ongga oufamofa ojgomu erek Ofa otunggom mar ongga oufamofa. Beda mimif mumosuwa jeska mar ongga oska ongga angh gu mebif si. Jeska mar ongga oska insa koma bera en jeska rusnok rudou efesi ongga ofogog tein. 5Erek koma jefeda iwa ireni rot ahais jeskaseda ita mar ongga oufamofa jeni erek rusnok ongga ruroru Yesus rot tenten fob. Noba iwa ita mar ongga ongkoska tein ni, ita idou ongga ebriyi gij Allah efen oga ni, 6yut joug idou efesi rot ahais ni, yuin keingg idou efesi rot mar ongga oska ni, iroru Allah oga rot ahais ojgomuja ni, ita mar rot idou ongga ebsi komowa ni, 7idou omokorema ni, idou okora rot rusnok enjgineg tein ni. 8Erek iwa ita mar erek koma nomnaga odudu dokun deika, beda mar koma omofij iwa fogora imotunggom mar nomnaga rot tenten ojgomu. Noba mar insa koma bera omorocunc rot oida yeyin idou ongga ebriyi gij mar ongga Tuhan Yesus Kristus anggot rot sis fob tein. 9Tina erek osnok egens eneita mar insa koma tein guru, beda ofa bera erek osnok egens ongga eiteij ofou jefeda engker gij motkobah ros. Ofa odou ofoj joug rot oida Allah onsuna rot efen mar ongga oska jeska odou efesi sis fob. 10Erek koma jefeda, edohuji, iwa ireneni rot ahais jeskaseda mar ongga oufamofa insa koma ongga iwa intunggom bera orocunc rot tenten oida Allah enjeka iwa fogora oncunc iwa erek efen rusnok fob. Jeska erek iwa ita mar insa koma nomnaga, beda iwa inesiri gij mar ongga oska tein deika guru. 11Noba Allah tein omoroun iwa rot odou ongga eskeiramera eteb. Fogora iwa imoira jera rusnok nomnaga ongga mifmin Tuhan Yesus Kristus ofoka ereij keingg nou mona ongga ah aibin ojgomuja. Ofa bera ongga onskotu mimif jeska mifmin mar ongga oska nomnaga fob. 12Iwa idou ejginaga rot mar ongga didif danggot rot insa koma nomnaga fob. Noba iwa inroru Allah efen oga ongga tenten insa koma rot ahais fob. Erek koma tina didif dudou os disisi keingg iwa rot mar insa koma juens deika ojgomu. 13Jeska didif dusujohu oida oufa nou didif dita mar erek koma gij mona insa kef ongga difena ebah ros. 14Jeska Yesus Kristus emfesij rot koisoisa gu didif sis fob oida erek dektek deika guru, beda didif dimagos ojgomu. 15Noba didif direneni rot iskusk jeskaseda disisi keingg iwa rot mar insa koma. Noba gij mona ongga didif danggos fob, beda mar ongga didif danggot insa koma nomnaga emah gij idou efesi ojgomuja. 16Sis fob memef memfesij gu iwa osok gij mifmin Tuhan Yesus Kristus efen owesa efek jera osok gij mona ongga Ofa omoksons en tein. Noba mar koma bera enen jeska rusnok enjgineg ongga rimfesij rourou rot rudou ongga efesis gij guru. Jeska memef mek Tuhan Yesus Kristus efen eskeiramera eteb gu mesinsa meiteij fob. 17Erek koma jeska gij mona insa koma bera mifmin mika Allah omfra mifmin Tuhan Yesus Kristus ofoka erek aksa eteb. Beda memef meg Allah, ongga efen efesa ongga eskeiramera eteb, gij mona ongga Ofa anggot jeska mebaga oida, "Ofa kef bera dedin edesa ongga dudou okora rot noba ongga dudou eskeira eteb rot tein." 18Memef mesinsa meg Ofa efen oga egens koma ongga en teisis jeska mebaga gij mona ongga mengker morototuma jera Yesus gu memaga ofos egens ongga ebsi komowa. 19Noba mimif mifmin buku-buku ongga nabi-nabi runggu rot sis fob tein. Mar ongga rua ranggot rot gij buku-buku koma bera erek tenten ojgomu. Noba mar insa koma ongga rua runggu rot sis fob bera ongga omofij iwa jeskaseda idou ejginaga rot mar ongga rusnok ruftuftu bera erek tenten ei era gurei. Mar insa koma bera erek lampu ongga eisa gij motkobah jeskaseda rusnok rik fogora rimecira rot iskusk gij ojgomu. Iwa iroru mar ongga nabi-nabi runggu rot insa koma onjoros mona ongga Yesus Kristus ongksons en fob. Beda koma omofij iwa jeskaseda idou ebriyi gij ojgomu. Jeska mona ongga Yesus ongksons en bera erek mowa ongga orogna tomnomna jera motur ongga orogna raha tentena jeska mebaga. 20Noba mar ongga ofoufem eteb ekirsa bera, mar nomnaga ongga nabi-nabi ranggot rot gij Mar Efeyi Ebsi sis fob bera bera enen jeska risinsa rudou efesi guru. 21Jeska rua ongga nabi-nabi insa koma bera runogu mar egema tein ongga rusnok mebif runsujohu rot guru. Tina rua runggu rot mar ongga Efena Ebsi Allah oncunc gu rua gij rudou efesi fob ojgomu.

will be added

X\