2 Yohanes 1

1Didif, ongga direk ebirfaga Mod Ari egens, bera dugu surat egens kef skoita bua ongga erek ojaga egens ongga Allah oncunc fob jera bebin ebeser nomnaga ongga dudou okora rot tenten fob. Noba rusnok nomnaga tein ongga ruroru mar ongga tenten bera rudou okora rot iwa. 2Jeska mimif nomnaga muroru mar ongga tenten ojgomu, noba mar insa koma enah gu mimif rot mona ongga ah aibin ojgomuja. 3Didif dum diteij gu mifmin mika Allah jera efen efesa Yesus Kristus jeskaseda Ofa eita odou ongga oufamofa skoita mimif jera eiteij ah ongga eskeiramera ojgomuja tein. Mimif tein mimesma mudou ongga omokorema noba ongga muroru mar ongga tenten ojgomuja. 4Didif dudou erirei eteb rot iwa jeska didif dingg rot oida bebin ebeser ruroru mar ongga tenten ojgomuja fob. Koma bera ah jeni erek mar ongga mifmin mika Allah anggot rot gu mimif fob. 5Ebeibeyaif didif duis gu bua, ongga dudou okora rot, jeskaseda iwa nomnaga iroru mar ongga Allah anggot rot sis fob ojgomu. Mar insa kef bera enerek efeinah guru, jeska mimif mingg rot mar insa kef sis fob. 6Noba erek mimif mudou okora rot Allah, beda koma erek mimif muroru mar ongga Ofa anggot rot fob. Noba mar ongga Ofa anggot rot insa koma bera oida mudou omokorema. Noba iwa ig gij mona ongga sismeni fob rot oida Ofa obk mimif jeskaseda mudou omokorema. 7Rusnok rufoukou ongga rucuwei mar bera rurogna noba rirebserma rejrej mebif nomnaga fob. Rua ragot oida Yesus Kristus enen gu mebif jera efen efaga rot tenten guru. Rusnok ongga ragot mar erek insa koma bera erek osnok egens koma ongga ofoka Anti-Kristus. Jeska rua rucuwei mar noba riretei rot Yesus Kristus erek osnok egens koma. 8Iwa isisi joug idou efesi rot ahais jeskaseda inororu mar ongga rua ruftuftu guru. Iwa ita mar erek koma jeskaseda yeyin ifons ongga Allah ensejah gu mebaga bera eneseiseifa jeska iwa jinaga guru. Jeska iwa imfarur rot ahais nou yeyin ifons insa koma fob. 9Noba erek osnok egens ongga oftuftu mar ekirsa jeska mar ongga Yesus oftuftu rot, beda ofa koma bera onororu Allah rot tenten enesi. Tina osnok egens ongga ororu jeni mar ongga Yesus oftuftu rot, beda ofa koma bera ororu Allah jera efen efesa rot tenten fob. 10Beda erek osnok egens en skoita iwa, tina ofa onororu mar ongga didif dimfesij rot ainsa kef guru, beda iwa inoroun ofa gij yeyin mod era inoisu ofa tein guru. 11Jeska idu ongga oroun osnok egens insa koma gij efen mod, beda ofa efen odou erek egens morototuma jera osnok egens insa koma ongga odou ofogog fob. 12Didif dudou os dugu rot mar ofoukou deika skoita iwa, tina didif dunogu rot mar koma ebeibeyaif guru. Jeska didif dusujohu rot oida dimen skoita iwa fogora dimagot rot mar insa koma teisis gu iwa ojgomu si. Didif dudou os erek koma jeskaseda mudou erirei rot erek morototuma. 13Bebin obkosa ongga Allah oncunc fob efen efeser ruisu iwa nomnaga tein. Ainsoma.

will be added

X\