2 Korintus 8

1Edohuji, ebeibeyaif didif dudou os difesij gu iwa rot mar ongga Allah ontunggom rot odou ongga oufamofa nou rusnok Mod Ari ongga ringker gij monuh Makedonia. 2Jeska mar ofoukou bera ereneni rua ojgomuja onjoros rudou efera okora eteb rot. Tina rudou onokumkum rot mar insa koma guru. Rua riker rot rudou ongga eskeiramera ojgomuja, jefeda rua rerin owesa efek ongga adaij nou rufij rerin ruhujir rot rerin mar okum tein ojgomu. Mar ongga rua runtunggom bera erek kef oida, erek rua risinsa rufojingki eteb, tina rua rikeba rerin mareibra ofoukou jeskaseda rufij rusnok Kristen ongga ringker gij kota Yerusalem. 3Noba didif dagot rot tenten ojgomu oida rua rikeba risinsa rerin mareibra insa koma erek doida omoisa nomnaga. Noba rua rineita mar erek koma jeska rusnok enjgineg riradgodu rua rot guru. 4Tina rua ruis gu memef rot ahais jeskaseda morka rerin mareibra ongga rua rikeba insa koma nou Allah efen rusnok ongga ringker gij monuh Yudea skoita rusnok koma. 5Noba rua rita mar insa koma jeni erek memef moisum gij rua rot sis fob. Noba ongga oufamofa ekirsa bera rua ruh rudou efesi rot ongkasmos gu Tuhan jera memef tein oisouska Allah odou ejginaga rot. Noba koma tein erek ekirsa jeska meidu ongga memef moisum gij rua rot sis fob. 6Jefeda memef magot gu Titus jeskaseda ofa ojogog iwa gij kota Korintus ebeirens deika. Jeska sis fob ofa oftuftu iwa rot teinefa iwa ikeba yeyin mareibra nou Allah efen rusnok tein. Noba gij mona ongga ofa onjogog iwa deika, beda ofa omoftuftu iwa deika rot mar insa koma onjoros iwa tein yufij Allah efen rusnok ongga rufojingki gij monuh Yudea rot yeyin mareibra fob. 7Ebeibeyaif iwa bera erek rusnok ongga runtunggom mar ofoukou ongga ongkoska fob. Koma bera erek iwa iroru Allah rot tenten fob ni, iwa yagot mar ongga erek ongkoska moguma ojgomu ni, idou ebriyi gij mar ongga tenten fob ni, iwa insejah idou efesi fogora yufij rusnok enjgineg ni, idou okora eteb rot memef ni. Erek koma jefeda memef mois gu iwa jeskaseda iwa icunc idou ongga okora rot Allah efen rusnok fogora ikeba yeyin mareibra tein nou rusnok ongga rufojingki ojgomu. 8Didif dunoga efet iwa rot mar koma guru. Tina didif dimfesij gu iwa rot teinefa rua ongga monuh Makedonia insa koma rudou otot jeskaseda rufij rusnok enjgineg rot rerin mareibra tein fob. Jefeda iwa tein icunc idou ongga okora rot rusnok enjgineg fogora yufij rua rot yeyin mareibra ojgomu. 9Jeska iwa ijginaga rot fob oida gij mebaga bera mifmin Tuhan Yesus Kristus oncunc efen oufamofa eteb skoita mimif fob. Sis mona ongga Ofa eker gu mebaga ros, beda Ofa efen mar ofoukou ongga ongkoska eteb. Erek koma tina Ofa aha mar koma jah fogora en gu mebif erek osnok egens ongga ofojingki jeskaseda ofij mimif. Jefeda mimif minsma mar ofoukou ongga ongkoska eteb fob. 10Gij tahun ongga sis fob iwa bera ongga yanggot rot sismeni rot oida imofij rusnok ongga rufojingki rot yeyin mareibra. Noba iwa tein bera ongga ita yeyin mareibra insa koma rot sismeni jeska rusnok Mod Ari enjgineg nomnaga. 11Jefeda didif dusujohu rot erek kef oida: didif duis gu iwa jeskaseda iwa ita mar erek koma juens deika fogora ikeba yeyin mareibra oskiyai nou rusnok enjgineg. Noba iwa ita mar erek koma oisouska yeyin owesa efek ongga adaij nou tein. 12Noba erek iwa idou ot nou yufij rusnok enjgineg erek koma, beda Allah odou emeskeira rot iwa oisouska mar ongga iwa ita insa koma ojgomu. Jeska Ofa onoga efet rusnok rot oida rua rugun mar dokun ekirsa jeska mar ongga angh gu rua guru. 13- 14Didif dineradgodu iwa jeskaseda yufij rusnok enjgineg onjoros yeyin mareibra omoisa rot fogora idou okum rot tein guru. Tina ebeibeyaif bera yeyin mareibra efen ofod adaij nou. Jefeda didif dusujohu rot oida iwa yufij rusnok enjgineg rot ojgomu. Noba gij mona ongga iwa yeyin mareibra enadaij nou iwa deika guru, beda rua tein rumofij iwa sons rot rerin mareibra efen ofod tein si. Beda iwa nomnaga yeyin mareibra ongga adaij morototuma tein. 15Koma bera erek mar ongga runggu gij Mar Efeyi Ebsi sis fob erek kef oida, "Osnok egens ongga ohoturu efen maat ofoukou bera efen eteb ongga adaij nou. Noba osnok egens ongga ohoturu maat erek oskiyai, ofa tein efen adaij nou." Noba erek iwa imofijma erek koma, beda iwa tein imeita mareibra ongga adaij ojgomuja. 16Memef mois oufamofa eteb gu Allah jeska Ofa oncunc mar gij Titus odou efesi fogora ofa odou os ofij iwa morototuma erek memef tein modou os mofij iwa. 17Noba didif direjgei ofa jeskaseda eja skoita iwa. Tina ofa oitij ebeirens rot, jeska ofa esinsa ensejah odou efesi rot otunggom mar erek koma sis fob. Jefeda ofa odou eskeira eteb rot ojgomu. 18Noba memef momobk mefmen mohuj egens ongga rusnok Mod Ari nomnaga rugif gu. Jeska ofa odou efesis eteb jefeda ofa ejginaga rot teinefa oftuftu rot Allah efen oga ongga oufamofa gu rusnok enjgineg. Ofa tein bera omororu Titus skoita iwa. 19Noba rusnok Mod Ari nomnaga bera runcunc ofa tein jeskaseda ororu memef gij mona ongga memef morka mareibra ongga rusnok ringkeba nou Allah efen rusnok ongga rufojingki jah gu kota Yerusalem. Mar koma bera ongga orofra Allah efen ofoka erek aksa noba orocunc rot oida memef modou os mofij Allah efen rusnok tein. 20Ofa omororu memef tein, jefeda enadaij nou rusnok enjgineg rudou efeda rot memef osok gij mar ongga memef motunggom rot mareibra ofoukou insa koma guru. 21Jeska memef modou os motunggom mar ongga tenten ojgomu ahah Tuhan eiteij jera rusnok tein riteij. 22Noba memef momobk osnok egens dokun deika morototuma jera Titus noba jera efen mohuj egens insa koma tein skoita iwa. Ofa bera anggot rot ofosma ofoukou fob oida ofa odou os ofij rusnok enjgineg ojgomuja. Noba ofa ejginaga rot teinefa iwa idou os yufij rusnok enjgineg rot yeyin mareibra tein. Jefeda ofa tein odou os eja skoita iwa. 23Noba Titus kef bera erek dedin edohuj egens ongga efarur morototuma jera didif ojgomuja. Noba gosnok gegeka kef gemeja oisouska gegan Mod Ari ofoka. Noba goga tein gegan geita mar ongga orofra Yesus Kristus efen ofoka erek aksa. 24Jefeda iwa icunc idou ongga okora rot rua insa koma jeskaseda rusnok enjgineg rimek fogora rimejginaga rot oida mar ongga memef mesitit rot osok gij iwa bera erek tenten ojgomu.

will be added

X\