2 Korintus 4

1Allah bera ongga oncunc memef rot odou ongga eskeiramera jeskaseda moftuftu rot Ofa efen oga gu rusnok enjgineg. Jefeda memef modou eneskes rot guru. 2Noba memef mokoja rot mar ongga rusnok enjgineg rutunggom jeskaseda rurokrusa iwa rot ojgomu. Memef monocuwei mar gij rusnok era monorokrusa rua jeskaseda rua ruroru Allah oga guru. Noba memef tein meneferwei Allah oga efen ofou tein guru. Noba askesi memef moftuftu rot Allah efen oga, beda Ofa bera ongga eyajga joug memef rot mar ongga memef moftuftu ojgomuja. Jefeda memef moftuftu mar rot koisoisa ongga erek tenten ojgomu. Noba memef modou os jeskaseda mar ongga memef motunggom insa koma ereita rusnok nomnaga rudou eskeira rot memef ojgomu. 3Noba erek mar ongga memef moftuftu rot bera ah jejema jeska rusnok rineya, beda koma jeska rua bera ongga rimejeseiseifa ojgomu. 4Jeska Bilis bera ongga ofoka ereij keingg rusnok gij mona ebeibeyaif ongga runororu Allah oga guru. Noba ofa bera ongga orokrusa rua fogora rudou enebriyi gij rot Allah efen oga guru. Koma bera erek ofa ocohun rusnok rudou efesi jeska Allah efen owesa efek. Noba owesa efek insa koma bera erek Allah oga ongga oufamofa, noba ongga oncunc rot Yesus Kristus efen owesa efek ongga eteb. Noba Yesus bera morototuma erek Allah tein. 5Erek koma jeska memef monoftuftu mar rot mesinsa guru. Tina memef moftuftu mar rot Yesus Kristus ongga erek Tuhan ojgomu. Noba memef moncunc mesinsa skoita iwa erek yeyin rusnok ongga rumfij iwa fob. Memef meita mar erek koma nou iwa, jeska Yesus bera eita mar erek koma nou mimif nomnaga sis fob. 6Erek koma jeska gij mona ongga Allah onotunggom mebif enesi, beda Ofa otunggom eisa sismeni fog. Ofa erebent rot oida, "Oisouska motkobah bera eisa enah ojgomu." Noba erek koma tein, Ofa bera ongga esa efen eisa jeskaseda eij aki gij mudou efesi tein fob. Ofa otunggom mar koma jeskaseda mudou ebriyi gij rot teinefa Ofa efen ofoka ongga aksa eteb. Noba mimif mik efen ofoka ongga aksa erek koma oisouska mar ongga Yesus Kristus ontunggom fob. 7Memef bera erek rusnok ongga runowesa efek guru noba ongga runok rufoka gij guru. Erek koma tina Allah bera ongga oncunc memef jeskaseda moftuftu rot efen oga ongga oufamofa eteb skoita rusnok enjgineg. Noba mar ongga Ofa ontunggom insa koma bera orocunc rot oida Ofa efen owesa efek ongga eskeira eteb insa koma bera enen jeska memef guru, tina en jeska Ofa esinsa ojgomu. 8Noba gij mona ongga memef moftuftu rot Allah oga, beda mar okum ofoukou bera ah keingg memef, tina modou enesiri rot guru. Noba erek modou okumkum eteb rot tein guru, tina memef mog mejmeg gij ojgomu. 9Noba gij mona ongga rusnok rireneni memef rot mar ongga okum, beda Allah enaha memef jah igef jinaga guru. Noba gij mona ongga rusnok rubu memef fogora mesiri rot, beda memef medebecki noba motoiru gij mefmen mar ojgomu. 10Mar ongga okum ofoukou bera encirej memef ojgomu onjoros doida manggos rot fob. Erek koma jeska memef moftuftu rot Yesus Kristus efen oga. Tina Allah oitij rot mar insa koma jeskaseda rusnok rik fogora rudou ejginaga rot teinefa mimif misma eiteij ah oisouska Yesus Kristus efen eiteij ah. 11Gij orofosut mona ongga memef meita mar nou Yesus Kristus, beda mar ongga ofogog ereneni memef ojgomuja onjoros doida manggos rot. Tina Allah oitij rot mar koma jeskaseda rusnok enjgineg rik rot teinefa Yesus eita owesa efek gu memef ongga monowesa efek guru. Noba mar koma en oisouska Yesus Kristus efen eiteij ah ongga efeinah. 12Jefeda memef doida manggos rot, jeska memef moftuftu rot Yesus oga gu rusnok. Tina mar koma bera ongga ereita eiteij ah ongga efeinah gu iwa tein ojgomu. 13Noba memef mesejah nou magos jeska modou ororu Yesus efen oga rot tenten ojgomu fob. Jefeda memef mefesij rot Allah oga insa koma gu rusnok enjgineg. Koma erek mar egens ongga runggu gij Mar Efeyi Ebsi erek kef oida, "Didif duroru Allah efen oga fob, jefeda didif dimagot rot Ofa efen oga gu rusnok enjgineg tein si." 14Memef mefesij rot mar erek insa koma jeska modou ororu rot tenten oida Allah, ongga omfra Yesus Kristus jeska anggos fob, bera omofra memef tein noba emeita eiteij ah ongga efeinah gu memef morototuma jera Yesus Kristus si. Beda Ofa omoroun memef morototuma jera iwa jah efen monuh mebaga ongga Ofa engker gij. 15Memef meita mar insa koma nomnaga jeskaseda mofij iwa ojgomu. Noba erek Allah oncunc efen odou ongga oufamofa skoita rusnok enjgineg odudu dokun deika, beda rua rumois oufamofa eteb skoita Ofa rot. Noba rua rumofra efen ofoka ongga aksa eteb tein. 16Allah bera ontunggom mar insa koma nou mimif nomnaga fob, jefeda mudou enesiri jeska mar ongga mimif mutunggom nou Ofa jinaga guru. Noba mimif minejagos erek deci deci ojgomu, tina gij orofosut mona tein bera Allah eita mudou ahais ojgomuja. 17Noba mar okum insa koma ongga ah keingg memef sis fob bera erek mar ongga ai osufou rot memef ojgomu. Jeska Allah emeita eiteij ah ongga eskeiramera eteb rot mona ongga ah aibin ojgomuja. Noba koma bera oufamofa ekirsa jeska mar okum insa koma ongga angh keingg memef ojgomu. 18Jeska memef modou enemeesa rot mar okum insa koma ongga memef mek ojgomuja guru. Tina memef mosujohu rot osok gij mar ongga oufamofa ongga menek gu meiteij guru. Jeska mar ongga mimif mik gu miteij bera ah reirei ojgomu. Tina mar ongga minek gu miteij guru, mar koma bera ah aibin ojgomuja.

will be added

X\