2 Korintus 13

1Didif dumojogog iwa rot ofosma juomu deika. Jefeda iwa isujohu rot mar ongga rusnok runggu gij Mar Efeyi Ebsi erek kef oida, "Erek osnok egens ocunc osnok egema rot efen mar ongga oska fob, beda enadaij nou ofa esinsa oga ojga rot mar insa koma guru. Tina ongga oufamofa bera rusnok egeka era rugomu deika ruga ojga rot ofa. Beda rua nomnaga rufra mar okum keingg osnok egens insa koma ojgomu." 2Erek koma tein, didif dunjogog iwa rot ofosma jueka fob jeskaseda difesij rot yeyin mar ongga oska. Jefeda ebeibeyaif, askesi didif diker erek yes jeska iwa ros, beda didif dudou os disisi joug iwa osok gij yeyin mar ongga oska rot ofosma juomu deika fogora oisa fob. Beda gij mona ongga didif dinsaga jah suma tina guru, beda didif dumofra mar okum keingg rua ongga ruroru mar ongga oska si. 3Beda gij mona insa koma tein didif dumorocunc gu iwa rot teinefa Yesus Kristus oftuftu mar oisouska didif rot tenten ojgomu. Noba Ofa bera enerek osnok egens ongga onowesa efek guru. Tina Ofa efen owesa efek eteb jeskaseda ofij iwa rot tenten ojgomu. 4Jeska Ofa anggos tumu mega salib erek osnok egens ongga onowesa efek guru. Tina oisouska Allah efen owesa efek bera ofa esma eiteij ah sons fob. Beda erek koma tein, mefmen mefaga bera onowesa efek morototuma erek Ofa guru. Tina memef tein mesma owesa efek jeska Allah morototuma erek Ofa fob. Jefeda memef mefarur gu iwa ifekesa oisouska owesa efek insa koma ojgomu. 5Iwa iajga joug isinsa rot mar ongga iwa itunggom fog jeskaseda mar koma orocunc gu iwa rot oida iwa iroru Yesus Kristus rot tenten fob ei era enesei. Teinefa fogora iwa ita mar erek rusnok ongga rinejginaga rot oida Yesus Kristus rua bera eja erek egens jera iwa fob erek komo guri. Jeska koma orocunc rot oida iwa inororu Yesus Kristus rot tenten enesi. 6Memef modou os jeskaseda iwa ik mar ongga memef montunggom fob fogora isujohu rot oida memef bera mororu Yesus Kristus rot tenten fob. 7Noba memef mom meiteij gu Allah jeskaseda iwa inotunggom mar ongga oska deika guru. Tina memef meneita mar erek koma jeskaseda rusnok enjgineg rusujohu rot oida didif bera erek rasul egens ongga tenten ojgomu guru. Erek rusnok rineya rusujohu rot oida didif bera dineita mar erek rasul ongga tenten guru, beda koma onotunggom dudou efesi okum rot guru. Jeska memef modou os oida iwa itunggom mar ongga oufamofa ojgomu. 8Noba erek iwa iroru mar ongga tenten fob, beda enadaij nou memef mofra mar okum keingg iwa rot jinaga guru. Tina memef mofij iwa jeskaseda iwa iroru mar ongga tenten ojgomuja. 9Noba erek rusnok enjgineg rusujohu rot oida memef bera erek rusnok ongga runowesa efek guru, tina erek iwa iroru Yesus Kristus rot ahais fob, beda memef modou eskeira rot ojgomu. Jeska mar ongga memef mom meiteij rot eteb bera oida iwa iroru Yesus Kristus rot tenten ojgomuja. 10Erek koma jefeda didif danggot rot mar insa koma nomnaga gij surat egens kef jeskaseda gij mona ongga didif dinsaga jah suma fob, beda enadaij nou didif duftuftu mar gu iwa rot duga ongga ahais oisouska owesa efek ongga en jeska Tuhan guru. Jeska Ofa eneita owesa efek koma gu didif jeskaseda durot keingg rusnok rot ojgomuja guru. Tina Ofa eita owesa efek koma gu didif jeskaseda durofij rusnok rot ojgomu. 11Beda nou ongga omoisa gij surat kef bera didif duis ainsoma eteb gu iwa. Noba didif dudou os duis gu iwa jeskaseda iwa iroru Yesus Kristus rot ahais ojgomuja ni, iwa isma mar ongga didif dinsisi joug iwa rot gu iwa ni, isujohu rot mar erek egens morototuma ni, iker rot idou ongga eskeiramera morototuma ni. Iwa ita mar insa koma nomnaga beda Allah, ongga odou okora rot iwa, noba ongga eita eiteij ah ongga eskeira gu iwa, bera omot joug iwa ojgomuja si. 12Noba gij mona ongga iwa imorodosuma beda yagei itma jeskaseda irocunc rot oida idou omokorema oisouska Yesus Kristus rot tenten fob. 13Allah efen rusnok nomnaga jah sif bera ruisu iwa. 14Noba didif dum diteij gu Allah jeskaseda Tuhan Yesus Kristus ocunc efen odou ongga oufamofa skoita iwa. Noba didif dum diteij jeskaseda Efena Ebsi eita oufamofa gu iwa gij mona ongga iwa imohoturuma erek egens. Ainsoma.

will be added

X\