2 Korintus 12

1Didif dimesitit rot disinsa dufoka ai juens deika erek rasul-rasul ongga ebireira insa koma rutunggom ojgomuja. Noba erek didif disitit rot disinsa dufoka, beda koma onofij didif rot tenten guru, tina didif dudou os difesij gu iwa osok gij mar ongga Allah oncunc gu didif sis fob. Jeska Allah omfij didif rot mar egens jeskaseda dudou ebriyi gij erek koisoisa fob. 2Mar insa koma bera erek kef: Gij tahun ongga setka kungkob tohkuru fob bera Ofa ofra didif jah mebaga. Tina didif dinejginaga rot oida Allah omfra dedin difaga era difena ojgomu jah suma guru. Allah esinsiyai bera ejginaga rot fob. 3Ofa ofra didif jah mebaga erek koma ojgomu. Noba didif dagot juens deika rot oida, erek Ofa ofra difaga era difena ojgomu jah mebaga bera dinejginaga rot guru. 4Noba askesi didif dingker gij mebaga, beda didif dingg mar onswos eteb ongga rusnok mebif rinefesij rot jinaga guru. 5Jefeda adaij nou rusnok risitit risinsa rufoka rot mar erek insa koma ongga onswos eteb ojgomu. Tina didif dimesitit disinsa rot mar egens ojgomu, koma bera osok gij mar ongga orocunc rot teinefa didif disinsa dunowesa efek guru. 6Jeska erek didif dudou os disitit disinsa rot mar insa koma skoita rusnok enjgineg, beda koma onoska guru. Erek koma jeska mar ongga didif dimefesij rot bera erek tenten ojgomu. Tina didif dinesitit disinsa rot jeskaseda rusnok enjgineg rusujohu rot oida didif bera erek osnok egens ongga ongkoska ekirsa jeska rusnok enjgineg erek koma guru. 7Noba didif dingg mar insa koma ongga onswos eteb gu mebaga fob, jefeda Allah osujohu rot oida didif dimesitit disinsa dufoka rot ojgomuja. Jefeda Ofa esa mar egens gu didif ongga erek oin keingg didif rot ojgomuja. Ofa otunggom mar erek koma jeskaseda didif dinesitit disinsa dufoka rot mar onswos insa koma guru. Noba mar insa koma ongga Ofa ensa skoita didif bera morototuma erek mar ongga Bilis ereneni didif rot tein. 8Noba didif duis gu Allah rot ofosma juomu jeskaseda Ofa eita mar koma jeska didif ojgomu. 9Tina Ofa onoitij rot guru. Jeska Ofa agot gu didif oida, "Erek Didif ducunc dudou ongga oufamofa eteb skoita bua, beda koma bera adaij nou ojgomu. Jeska Didif ducunc dedin owesa efek ongga ekirsa eteb oisouska rusnok ongga risinsa rerin owesa efek guru." Jefeda erek didif dunowesa efek jinaga guru, beda didif dudou os erek koma jeskaseda Yesus Kristus efen owesa efek emah gu didif erek ahais ekirsa ojgomu. 10Noba gij mona ongga didif dunofora efek guru ni, era rusnok ruga oruh didif ni, era mar ongga okum ah keingg didif ni, era rusnok rita mar ongga ofogog skoita didif ni, era mar okum ereneni didif ni, beda dudou onokum rot guru. Jeska oisouska mar koma nomnaga bera didif durofij Yesus Kristus ojgomu. 11Didif dinsitit disinsa dufoka rot mar insa koma jeskaseda duroftuftu iwa rot oida iwa bera ita mar rot idou ongga osumsumu ros. Jeska iwa yugif gu rasul-rasul ongga ebireira insa koma ros. Noba erek iwa isitit rot mar ongga didif duntunggom ojgomu, beda koma bera oufa. Tina iwa ineita erek koma guri. Noba erek iwa isujohu rot oida didif dufoka enaksa guru, tina dedin dufoka onoin gij rasul-rasul ongga ebireira insa koma ongga iwa yufra erek rufoka aksa eteb guru. 12Noba gij mona ongga didif dingker jera iwa ros, beda didif duin keingg dudou efesi rot iwa fogora dutunggom mar onswos ofoukou ongga ereita idou oubsaha rot tein. Beda mar koma bera ongga orocunc rot oida didif direk rasul egens ongga tenten ojgomu. 13Jefeda teinefa fogora iwa isujohu rot oida didif ducunc dudou efesi erek oufa ekirsa skoita rusnok Mod Ari enjgineg erek komo. Jeska didif direjgei rusnok Mod Ari nomnaga jeskaseda rua rufij didif rot fifi era mareibra ojgomu. Tina didif dineradgodu iwa rot mar insa koma jinaga guru. Jefeda ongga tenten bera, koma erek didif duncunc iwa erek ofoufem ekirsa jeska rusnok Mod Ari enjgineg ojgomu. Jefeda teinefa fogora idou okum rot didif erek komo. 14Noba erek dektek deika guru, beda didif dumojogog iwa rot ofosma juomu deika. Noba erek didif direjgei iwa rot fifi era mareibra gij mona insa koma, beda koma erek didif dita mar okum keingg iwa. Jefeda didif dinerejgei iwa rot mar erek koma guru. Jeska didif dudou onosos rot yeyin mareibra guru. Tina didif dudou osos rot oida iwa iroru Yesus Kristus rot tenten ojgomu. Noba ongga tenten bera, riser rineita fifi era mareibra gu rerin riker jera rusir guru. Tina riker jera rusir bera ongga rita fifi era mareibra gu rerin riser ojgomu. Beda erek koma tein didif, ongga direk yeyin ika, bera dunois gu iwa rot mar insa koma guru. 15Noba didif dimera disinsa dedin fifi jera mareibra noba difarur rot disinsa ditma tein jeskaseda durofij iwa rot ojgomuja. Jefeda didif dijginaga rot oida iwa idou omokora rot didif osok gij mar insa koma si. 16Noba iwa ijginaga rot oida gij mona ongga didif dunjogog iwa sis fob, beda didif dinerejgei iwa rot mar egema tein guru. Erek koma tina rineya jah ifekesa bera ragot oida didif dita mar erek insa koma jeskaseda durokrusa iwa rot ojgomu. 17Tina didif duis gu iwa jeskaseda isujohu rot mar ongga didif dita erek insa komo. Jeska rusnok ongga didif dumbk skoita iwa bera rinerejgei iwa rot mar egema tein jinaga guru. 18Noba sis fob bera didif duis gu Titus jeskaseda ofa jera mefmen mohujir enjgineg rija skoita iwa. Noba iwa ijginaga rot tenten fob oida Titus eneradgodu iwa rot mar egema tein guru. Noba iwa tein ijginaga rot oida Titus jera didif bera maita mar erek morototuma ojgomu. 19Erek koma beda erek iwa isujohu rot oida didif dagot mar insa koma nomnaga fogora durohoda rot skoita iwa jeskaseda idou onoska rot memef deika guru. Tina erek koma guru. Jeska ongga tenten bera, memef memfesij mar rot tomnomna jah Allah odou erek rusnok ongga rudou egens jera Yesus Kristus fob. Noba mar nomnaga ongga memef montunggom fob bera jeskaseda morofij iwa rot ojgomu fogora imororu Yesus Kristus ojgomuja. Jeska memef modou okora rot iwa ongga irek mefmen mohujir ongga ruroru Yesus Kristus tein. 20Didif dagot mar erek koma jeska didif difeneinei rot oida gij mona ongga didif dinsaga jah suma fob, beda didif dimek iwa, tina iwa iroru mar ongga oska ojgomuja ros. Jefeda mojen iwa tein gij mona ongga iwa ik didif. Didif difeneinei rot oida dimek iwa yuga omosokuma ni, idou eftirir keingg mar ni, yutkonu oska eteb rot ebeirens ni, idou eyet yeyin mareibra ni, yuga omoruhma ni, yuh rusnok enjgineg rufonoknoka ni, yufra isinsa ifoka erek aksa ni, imekebema gij ebic egens egens ni. 21Didif difeneinei eteb rot iwa jeska erek didif dik iwa itunggom mar insa koma ros, beda mojen didif eteb rot iwa. Beda koma erek Allah omoin keingg didif dufoka rot mar insa koma jah iwa idou tein. Noba didif dibisa rot rusnok rineya jeska iwa ongga runtunggom mar ongga oska fob, tina rinemeesa joug rot rerin mar ongga oska insa koma enesi. Koma bera erek risiri morototuma noba rutunggom mar ongga oska efekeifa erek rua risinsa rudou os ojgomu.

will be added

X\