2 Korintus 10

1- 2Edohuji, ebeibeyaif didif dudou os duis mar gu iwa rot dudou ongga erek eriaga noba osufou tein jeni erek Yesus Kristus ontunggom gu rusnok sis fob. Jeska rusnok rineya jah gu iwa ifekesa bera ragot osok gij didif oida, "Gij mona ongga Paulus engker jera mimif bera ofa agot mar rot odou ongga eriaga noba ongga osufou ojgomu. Tina gij mona ongga ofa ejeker yes jeska mimif, bera ofa agot mar gij efen surat ongga erek okumkum skoita mimif ojgomu. Jefeda ofa erek emeesa rot mimif ojgomu ei." Erek koma tein rua rusujohu rot mar erek rusnok mebif rusujohu rot mar ojgomu. Jefeda didif duis gu iwa jeskaseda iwa itaha joug rusnok ongga ragot mar erek koma ojgomu. Iwa ita mar erek koma jeskaseda gij mona ongga didif dunjogog iwa deika, beda didif dunocosu rot ducunc gu rua insa koma rot teinefa didif dagot mar ongga okumkum teisis skoita rua ongga ranggot mar erek insa koma guru. 3Jeska memef bera erek rusnok giskini ongga eriaga ojgomu, tina memef menera mar ongga rusnok mebif efen jeskaseda mokoja rot mar okum ongga angh keingg memef guru. 4Memef monokoja mar okum ongga angh keingg memef oisouska owesa efek ongga rusnok mebif efen guru. Tina memef mera owesa efek ongga en jeska Allah ongga adaij nou, fogora memef morohoda rot owesa efek ongga mebif efen ojgomu. 5Noba oisouska owesa efek insa koma bera memef mohoda rot mar nomnaga ongga rusnok ruga emaksema rot skoita Allah jera rusnok nomnaga ongga rusujohu rot oida risinsa rudou erek efesis eteb. Noba oisouska Allah efen owesa efek insa koma bera memef moftuftu rusnok enjgineg jeskaseda rusujohu rot mar jeni erek Yesus Kristus osujohu rot mar ojgomu. 6Noba gij mona ongga iwa ongga kota Korintus icunc rot oida iwa iroru Yesus Kristus rot tenten fob, beda memef mensejah nou mofra mar okum keingg rusnok rineya jah suma ongga ruroru mar ongga oska erek insa koma. 7Iwa isujohu rot iskusk osok gij rusnok rineya ongga ringker jah gu ifekesa. Jeska rua risitit risinsa rufoka oida rua risinsiyai bera ongga rumfij Yesus Kristus rot tenten, noba memef bera guru. Tina didif dagot oida enadaij nou rua rusujohu rot mar erek koma guru. Jeska memef tein bera erek rusnok ongga rumfij Yesus Kristus rot tenten fob. 8Ainsa kef bera didif disitit disinsa difaga erek oskiyai rot owesa efek ongga Allah eita gu memef fob, tina mojen en didif rot koma guru. Jeska Allah eita owesa efek insa koma gu didif jeskaseda durofij iwa rot ojgomu. Noba memef menera owesa efek insa koma jeskaseda motunggom mar gu ifekesa fogora imekebema rot guru. 9Didif dinagot rot mar insa kef jeska didif dunodou os rot oida surat ongga didif dinsa skoita iwa bera ereita idou emeesa rot didif guru. 10- 11Erek koma tina didif dimagot mar teisis rot ahais morototuma erek didif danggot mar gij dedin surat ojgomu skoita rusnok ongga risitit risinsa rufoka rot mar erek insa koma si. Jeska rineya jah gu ifekesa ragot mar erek kef rot ahais oida, "Paulus agot mar ongga okumkum noba ahais gij efen surat ongga ofa ensa skoita mimif. Tina gij mona ongga ofa en skoita mimifo, beda ofa agot mar ongga erek eriaga ojgomo. Noba mar ongga ofa anggot gij mona insa koma efen owesa efek jinaga guri." 12Yo, erek rua insa koma bera rufra risinsa rufoka erek aksa ei, tina memef bera gurei. Koma tenten, jeska rua rireni jeni rerin rita mar jera rusnok enjgineg rerin rita mar ongga morototuma erek rua rerin ojgomu. Jefeda koma erek rua risitit risinsa rufoka rot risinsa rerin rita mar ongga oska ojgomu. Noba koma bera orocunc rot oida rudou osumsumu eteb ojgomu. 13Memef bera mefmen owesa efek tein, tina memef monofra mesinsa mofoka rot mar ongga montunggom ongga erek ekirsa jeska mar ongga Allah oncunc gu memef fob guru. Didif duntunggom mar ongga Allah oncunc gu didif fob. Tina iwa tein bera erek mar egens ongga Allah oncunc gu memef jeskaseda mefarur rot ojgomu. 14Beda mar koma tein bera orocunc rot oida memef menekirsa rot mar ongga Allah oncunc gu memef rot guru. Jefeda gij mona ongga memef mecira rot Yesus Kristus efen oga ongga oufamofa skoita iwa sis fob, beda koma erek memef mororu mar ongga Allah oncunc rot gu memef sis fob tein ojgomu. 15Noba memef tein menekirsa rot mar ongga Allah oncunc gu memef guru, jefeda menesitit mesinsa mofoka rot mar ongga rusnok enjgineg rimfarur gij fob guru. Tina rasul-rasul ebireira insa koma bera rita mar erek koma ojgomuja. Noba memef modou os eteb rot oida iwa iroru jeni Allah efen oga rot tenten odudu dokun deika ojgomuja. Beda memef tein memeita mar ongga ongkoska ekirsa deika jah gu ifekesa ojgomuja. 16Jefeda memef tein memecira rot Yesus Kristus efen oga ongga oufamofa jah monuh ongga ai erek yes jeska iwa deika. Beda enadaij nou rusnok enjgineg ragot oida memef bera morka Yesus Kristus efen oga gij monuh ongga rusnok enjgineg rumftuftu rot Kristus gij sis fob guru. 17Erek koma tina iwa isujohu rot mar egens kef ongga runggu gij Mar Efeyi Ebsi ongga agot oida: "Idu ongga odou os esitit rot mar, beda ofa esitit rot mar ongga Tuhan ontunggom ojgomu." 18Jeska erek osnok egens esitit esinsa ofoka rot mar ongga ofa ontunggom fob, beda koma onorocunc rot oida mar koma bera erek tenten guru. Tina erek Tuhan odou eskeira rot mar ongga osnok egens ontunggom fob, beda koma orocunc rot oida mar ongga ofa ontunggom bera erek tenten ojgomu.

will be added

X\