2 Korintus 1

1Surat kef jeska didif Paulus ongga direk Yesus Kristus efen rasul. Noba didif dinja erek erek rasul egens koma oisouska Allah odou ejginaga rot. Noba mifmin muhuj Timotius bera eneker jera didif jah sif. Didif disa surat kef skoita iwa ongga Allah efen rusnok ongga ruroru Yesus Kristus fob gij kota Korintus. Noba surat kef tein bera nou Allah efen rusnok nomnaga ongga ringker suma suma rejrej monuh Akaya tein. 2Didif duis gu mifmin mika Allah jera Tuhan Yesus Kristus jeskaseda Ofa ocunc efen odou ongga oufamofa eteb skoita iwa, noba jeskaseda Ofa eita eiteij ah ongga eskeiramera gu iwa nomnaga tein. 3Mimif muis oufamofa eteb gu Allah ongga Tuhan Yesus Kristus efen meka noba ongga Ofa tein ougif gu erek efen Allah. Allah bera erek mifmin mika ongga odou okora eteb rot mimif. Noba Ofa bera erek mifmin Allah ongga ofij mimif rot mar okum ongga ah keingg mimif jeskaseda mudou eskeiramera ojgomuja. 4Noba oisouska mar insa koma ongga Ofa ofij mimif rot bera mimif tein mufij rusnok enjgineg rot rerin mar okum ongga ah keingg rua. 5Noba erek mimif mita mifera okora gij mar ongga ah keingg mimif jeska mudou egens jera Yesus Kristus fob, beda oisouska Ofa bera mimeita mudou ongga eskeiramera eteb tein si. 6Noba erek mar ongga okum ah keingg memef, beda koma tein bera ereita idou eskeiramera noba ereita eiteij ah ongga efeinah gu iwa tein si. Jeska Allah omftuftu memef gij mar okum insa koma ongga ah keingg memef fob, beda memef mesma modou ongga eskeiramera ojgomuja. Erek koma jefeda memef tein mejginaga rot teinefa mofij iwa gij mar ongga ah keingg iwa tein. Beda iwa tein imesma idou ongga eskeiramera ojgomuja. Noba iwa tein imot rot ahais gij mar ongga okum insa koma erek memef tein mot rot ahais gij ojgomu. 7Jefeda memef moisum gij Allah rot tenten oida, erek iwa ita ifera okora rot mar ongga angh keingg iwa, beda Ofa omofij iwa jeskaseda imesma idou ongga eskeiramera tein ojgomuja si. Jeska Ofa bera ongga eisisi joug memef gij mona ongga mar insa koma askesi ah keingg memef sis fob. 8Memef mudou os oida iwa ijginaga rot teinefa mar okum eteb angh keingg memef gij monuh Asia fob. Jeska mar ongga okum angh keingg memef jah suma ojgomuja onjoros modou esiri rot fogora mosujohu rot oida memagos ojgomu. 9Memef mosujohu oida memagos rot si, erek osnok egens ongga hakim oga ojga rot oida ofa emagos ojgomu. Noba Allah oitij rot mar okum insa koma jeskaseda oroftuftu memef fogora monoisum gij mesinsa mefmen owesa efek guru, tina moisum gij Ofa efen owesa efek ojgomu. Jeska Ofa efen owesa efek ongga adaij nou ofra rusnok ongga ranggos tein. 10Ofa onskotu memef jeska mar okum insa koma ongga angh keingg memef rot ahais fogora doida manggos rot fob. Noba memef moisum gij Ofa rot oida Ofa omoskotu memef jeska mar okum enjgineg ongga emah keingg memef gij mona kahma tein si. 11Noba Ofa omoskotu memef oisouska mar ongga iwa yum iteij rot gu Ofa nou memef ojgomuja tein si. Noba gij mona ongga Allah oroun gu iwa rot mar ongga iwa yum iteij rot, beda rusnok rufoukou rumois oufamofa eteb rot mar ongga Ofa ontunggom nou memef fob. 12Memef modou erirei eteb noba mesitit gu Allah tein, jeska memef mejginaga rot oida memef meita mar nou rusnok nomnaga rot modou ongga ocosu efei ahtah ojgomu, noba rot modou ongga oufamofa eteb skoita rua tein. Noba memef meita mar erek koma jeskaseda mofij iwa ongga iroru Yesus Kristus fob. Memef monotunggom mar insa koma oisouska mar ongga rusnok mebif rudou ebriyi gij rot guru. Tina memef motunggom mar insa koma oisouska Allah ongga omfij memef rot ojgomu. 13Noba surat-surat ongga memef monggu skoita iwa bera erek osufou ojgomu jeskaseda iwa ik noba idou embriyi gij efen ofou tein. 14Iwa idou ebriyi gij rot memef erek oskiyai ros. Tina didif dudou os rot oida iwa idou ebriyi gij rot memef erek eteb deika. Beda iwa imeita idou ongga erirei eteb rot memef fogora yagot mar ongga oufamofa osok gij memef skoita rusnok enjgineg. Beda memef modou emerirei eteb rot iwa fogora memagot mar ongga oufamofa rot iwa gij mona ongga Tuhan Yesus Kristus ongksons en tein fob si. 15Didif dusujohu rot oida idou embriyi gij surat egens koma ongga didif dinsa skoita iwa sis fob rot efen ofou fob. Jefeda didif dumojogog iwa rot ofosma jueka deika si, fogora iwa imesma idou ongga oufamofa rot erek ofosma jueka deika tein. 16Jeska didif dumojogog iwa askesi dincira jah monuh Makedonia. Beda didif dumojogog iwa deika gij mona ongga dungksons jeska monuh Makedonia si. Beda gij mona insa koma bera iwa imofij didif jeskaseda duksons jah monuh Yudea deika. 17Didif dinsejah dudou efesi rot jeskaseda dimeja skoita iwa si. Tina enadaij nou didif dinja jah suma gij mona ebeibeyaif enesi. Jefeda erek iwa insujohu rot oida didif bera erek osnok egens ongga agot ebeirens rot oida, "Tenten dimen si," tina guru ei. 18Erek koma tina mar ongga didif danggot ainsa kef bera erek tenten ojgomu, noba dunoga efei rot gu iwa jinaga guru. Jeska didif dimeita mar ongga didif danggen rot si morototuma erek Allah eita mar ongga Ofa anggen rot si. 19Noba didif, Silas, jera Timotius tein bera momftuftu mar ofoukou osok gij Yesus Kristus ongga Allah efen efesa gu iwa ifekesa sis fob. Noba Yesus bera enerek osnok egens ongga agot mar rot ebeirens oida, "Tenten," tina guru, erek koma jinaga guru. Ofa omotunggom mar nomnaga ongga Ofa anggen rot si. 20Jeska mar ongga Allah tein anggen rot bera erek tenten ojgomu. Noba Ofa omotunggom mar insa koma nomnaga oisouska Yesus Kristus si. Jefeda oisouska Ofa efen owesa efek bera mimif magot oida, "Ainsoma," jeska mimif mijginaga rot oida Ofa omotunggom mar ongga Ofa anggen rot si. Beda mimif misitit efen ofoka rot tein ojgomu. 21Noba Ofa bera ongga otunggom mimif jeskaseda mut rot ahais morototuma jera Yesus Kristus. 22Ofa oncunc mimif erek efen rusnok ongga ebsi komowa fob. Noba Ofa obk Efena Ebsi ongga engker gij mudou efesi fob. Noba koma orocunc rot oida mimif bera erek Ofa efen rusnok. Noba Efena Ebsi koma tein bera erek orocunc rot mar ongga oufamofa ongga Ofa anggen rot gij mona kahma tein si. 23Erek koma tina, erek didif dija skoita iwa gij mona ebeibeyaif ojgomu, beda dumoftuftu iwa gij mar ofoukou rot ahais fogora idou omokum rot didif ojgomu. Noba didif dudou onos rot erek koma guru. Jefeda didif dineja skoita iwa enesi. Noba Allah esinsa bera odou ejginaga rot oida mar ongga danggot rot insa kef bera erek tenten ojgomu. 24Noba memef monofoka ereij keingg iwa rot ahais osok gij mar meidu ongga iwa iroru ojgomu guru. Jeska iwa iroru Allah efen oga rot tenten fob. Tina ongga tenten bera, memef modou os mofij iwa jeskaseda iwa isma idou ongga erirei eteb deika ojgomuja.

will be added

X\