1 Timotius 6

1Timotius, rusnok ongga rufij rerin rusnok ebirfager ojgomuja bera rugif gu ebirfager insa koma rot tenten ojgomu. Rua rucunc rudou ongga rugif gu rua ojgomu jeskaseda rusnok rineya runoga oruh Allah ofoka era runoga oruh mar ongga memef moftuftu rot gu iwa guru. 2Noba rua insa koma ongga rerin ebirfager ongga rirek Kristen tein bera rufij rerin ebirfager insa koma rot ongkoska ekirsa ojgomu. Enadaij nou rua rusujohu rot oida rerin rufoka bera morototuma jera rerin ebirfager ofoka jefeda rua runougif gu rua deika guru. Jeska ebirfager insa koma ongga rua rumfij bera ororu Yesus rot tenten tein fob, noba rua rudou okora rot rerin ebirfager insa koma tein. Buftuftu rot mar insa koma gu rusnok jah suma, noba buis gu rua jeskaseda rumororu mar koma ojgomuja. 3Erek koma tina, rusnok rineya ruftuftu rot mar ongga tenten guru. Noba rua runoitij rot mar ongga Tuhan Yesus kristus anggot rot tenten sis fob guru. Noba rua tein rukoja mar ongga memef moftuftu rot Allah oga ongga ebsi komowa guru. 4Rusnok insa koma bera rufra risinsa rufoka erek aksa ojgomu. Noba rua rudou osumsumu ojgomuja. Rua rudou os ruga omosokuma ojgomuja onjoros ruga oska moguma. Jefeda mar insa koma orotunggom rusnok rudou efesi emejiseima ni, rimagobuma ni, rucuwei mar moguma ni, noba ris rudou efesi ofogog moguma gij mar ongga ranggot insa koma ni. 5Rua rudou oska fogora ruga emaksema moguma rot mar ojgomuja. Rua runororu mar ongga tenten deika guru, tina rua rusujohu rot oida ruroru Allah jeskaseda risma mareibra ofoukou ojgomu. 6Tina rusnok ongga ruroru Allah oga rot tenten fob bera rita rudou ongga eskeira rot mar ongga rua risma jeska Allah ojgomu. Noba koma bera ongga omofij rua rot tenten si. 7Jeska gij mona ongga mimif munjuj jeska musir bera munorka mar egema tein guru. Noba gij mona ongga mimif manggos fob tein bera munorka mar egema guru. 8Jefeda erek mimif misma maat jera meisoufa, beda koma bera adaij fogora mudou eskeira rot ojgomu. 9Tina rineya ongga rudou os jeskaseda risma mareibra ofoukou ojgomuja bera risiri gij mar ongga oska ongga oroku rudou rot ojgomuja. Jefeda rudou osos rot fogora eftirir keingg mar ongga oska ofoukou rot rudou ongga osumsumu onjoros riteij ah ejeseiseifa rot ojgomu. 10Jeska rusnok ongga rudou os mareibra ofoukou bera ruhca nou mar koma onjoros rua risiri gij mar ongga oska ofoukou ojgomu. Rusnok rineya ongga rudou osos fogora eftirir keingg mareibra ofoukou bera ringkikif jeska Allah beda runororu Ofa efen oga deika guru. Jefeda koma erek rua rufra mar okum keingg risinsa gij mar ongga rua runtunggom insa koma fob. 11Erek koma tina, bua Timotius bunroru Allah rot tenten fob. Jefeda bua bibes bifaga jeska mar ongga oska insa koma nomnaga ojgomuja. Bua bita mar rot budou ongga ebsi komowa ojgomuja ni, buroru Allah oga rot tenten ni, butunggom mar nomnaga rot tenten ni, budou okora rot rusnok enjgineg ni, bita budou ahais gij mar ongga ereneni bua ni, noba bucunc budou ongga eriagamaga skoita rusnok enjgineg ni erek koma ojgomuja. 12Sis fob bua bimeesa joug bebin mar ongga oska jah rusnok rufoukou rudou. Beda gij mona insa koma Allah enjeka bua tein jeskaseda bisma eiteij ah ongga ah aibin ojgomuja. Jefeda erek tentarer rimagobuma rot ahais, beda bua tein bireni rot ahais jeskaseda buroru Allah oga ongga oufamofa rot tenten ojgomuja. 13Oisouska Allah ofoka ongga eita eiteij ah gu mar nomnaga, jera Yesus Kristus ongga anggot mar rot esinsa ongga erek tenten skoita Pontius Pilatus sis fob, bera didif duis gu bua jeskaseda 14bua buroru mar insa koma nomnaga ongga didif danggot gu bua rot budou ongga ebsi komowa ojgomuja. Noba bua buroru mar insa koma rot ahais ojgomuja onjoros mona ongga mifmin Tuhan Yesus Kristus ongksons en fob. 15Allah esinsa bera ongga eita mar rot odou ongga ongkoskamoka. Ofa esinsiyai bera ongga ofoka ereij keingg mar nomnaga. Ofa bera erek raja egens ongga ofoka ekirsa jeska raja nomnaga. Noba Ofa bera erek Tuhan rot mar nomnaga tein. Jefeda ofa bera ongga oga ojga rot mona kenefo fogora Yesus Kristus omoksons en. 16Allah esinsiyai bera enagos jinaga guru. Ofa engker gij eisa eteb ongga rusnok egema tein rimen doida gij jinaga guru. Sis fob rusnok egema tein rinek Ofa gu riteij guru. Noba ebeibeyaif rusnok rinek Ofa gu riteij tein guru. Mimif mudou os jeskaseda rusnok nomnaga rufra Ofa efen ofoka erek aksa eteb. Noba mimif mudou os jeskaseda Ofa ocunc rot efen owesa efek eteb gu rusnok nomnaga. Ainsoma. 17Bua bagot gu rusnok ongga runa mei ahtah jeskaseda rua rinesitit risinsa rifaga era runoisum gij rerin mareibra ofoukou ojgomuja guru. Jeska rusnok egema tein rinejginaga rot oida rerin mareibra ofoukou emah gu rua era emeseiseifa jeska rua guru. Tina ongga tenten bera rua ruisum gij Allah ojgomu. Jeska Ofa bera eita mar nomnaga ongga ongkoska eteb gu mimif jeskaseda mudou erirei rot ojgomu. Ofa otunggom erek koma jeskaseda mudou efaga ouka eteb rot Ofa. 18Bua bagot rot gu rua tein jeskaseda rua rita mar ongga ongkoska ojgomu. Rua rucunc rot teinefa rerin riteij ah ongga ongkoska fogora rufij rusnok enjgineg rot rerin mareibra ojgomuja. 19Beda mar insa koma omorka rufons ongga ongkoskamoka eteb gu rua gij mebaga. Mar insa koma emah aibin gij mona ongga emen. Rua rita mar erek insa koma jeskaseda rua rimesma eiteij ongga efeinah rot tenten ojgomu. 20Timotius, budou ah keingg rot ahais gij mar ongga Allah anggot rot noba angha gu bua jeskaseda bufij Ofa rot ojgomuja. Bibes bifaga jeska mar ongga rusnok rimfesij rot ongga onorka mimif skoita Allah guru. Noba but joug budou efesi jeska mar ongga rusnok enjgineg ruftuftu ongga eretei rot Allah oga ongga tenten tein. Rua ragot oida rua ruftuftu mar insa koma rot rudou ongga ebriyi eteb gij, tina guru. 21Rusnok rineya ruroru mar insa koma ongga tenten guru fob. Jefeda ebeibeyaif rua runororu Allah oga ongga tenten deika guru. Didif dum diteij gu Allah jeskaseda Ofa ocunc odou ongga oufamofa eteb gu iwa nomnaga. Ainsoma.

will be added

X\