1 Timotius 5

1Timotius, bua binetaha joug runer ongga rerin ari mega ofoj ekirsa jeska bua rot ahais guru. Ongga oufa bera bisisi joug rua rot budou ongga eriagamaga erek bua bisisi joug bisinsa bebin mekeb. Noba bisisi joug ruforoka rifes erek bua bisisi joug bisinsa bebin obkoser. 2Erek koma tein rot rujager ongga rerin ari mega ofoj ekirsa jeska bua tein. Bisisi joug rua erek bua bisisi joug bisinsa bebin mosib. Noba bisisi joug ruforoka rujowu erek bua bisisi joug bisinsa bebin ebieser. Bua bisisi mar joug rua insa koma nomnaga rot budou efesi ongga eskeiramera rot rua ojgomu. 3Bua bucunc budou ongga okora rot rujona ongga rija mesina tein ongga rerin riser egema tein guru, fogora bufij rua ojgomu. 4Tina erek rujona ongga rija mesina rerin riser, era rerin ridebeser ongga runofoguma ros, beda riser era ridebeser insa koma rugif gu rerin ruser era rimower fogora rufij rua rot iskusk ojgomu. Koma erek rua ridaga rerin ruser era rerin rimower rufons sons gu rua. Mar koma bera ongga Allah ondou os rot. 5Noba rujona ongga rija mesina ongga rerin mareibra oskiyai tein guru, era rerin riser egema tein guru, beda rua ruisum gij Allah ojgomu. Noba rua rum riteij gu Allah orofosut mona jera motu tein jeskaseda Ofa ofij rua. 6Tina erek rujona ongga rija mesina runoisum gij Allah guru, tina rujohca mar ongga ereita risinsa rudou efaga ouka eteb rot ojgomu, beda rua rimeseiseifa si. Erek rua rifena ebah ros, tina gij mona kahma beda rinesma eiteij ah ongga efeinah jinaga guru. 7Bisisi joug rusnok insa koma oida rua rumofij gu rerin rujager rija mesina ojgomu jeskaseda rusnok runocunc rua erek rusnok ongga oska guru. 8Tina erek osnok egens onofij efen ebskir era efen mod etma guru, beda koma erek ofa okoja Allah oga ongga mimif muroru. Jefeda ofa oska efekefa ekirsa jeska rusnok ongga runororu Yesus jinaga guru. 9Rujona rija mesina ongga erek rujonokona fob, noba rinahi igers deika guru, bera ebirfager Mod Ari rucunc rudou ongga okora rot rua ojgomu. 10Rujona rija mesina insa koma bera runcunc gu rusnok enjgineg oida rua rita mar ongga ongkoska ojgomuja. Koma erek rua rufij rerin riser rot iskusk fob, noba rua tein ruroun rusnok ongga runjogog rua rot rudou ongga eskeiramera. Noba rua rufij rusnok ongga ruroru Yesus tein, noba rua rufij ruforoker rujowu rot mar okum ongga ah keingg rua. Rua rutunggom mar nomnaga rot iskusk ojgomu. 11Rusnok Mod Ari runofij rujona rija mesina ongga erek ruforoka rujowu ros guru. Jeska gij mona egema deika beda rua rudou osos runa egema. Jefeda rua runofij Yesus Kristus erek rua ranggen rot sis fob deika guru, tina rua raha mar koma jah fogora rahi igers deika ojgomu. 12Beda rusnok rumocunc rua erek oska jeska runofij Yesus Kristus erek rua ranggen rot gij mona ongga rahiner ragos jeska rua fob guru. 13Dokun mar insa koma bera rua rufora ogug rot mar, noba rua rudou os rija jah rusnok egema rerin mod jeskaseda ruh ofonoknok osok gij rusnok enjgineg rerin mar ojgomuja. 14Erek koma jefeda didif disisi joug rujona rija mesina ongga ruforoka rujowu ros jeskaseda rua rijahi igers deika ojgomu. Beda rumok riser noba rita mar gij rerin mod etma rot iskusk tein. Rua rita mar erek koma jeskaseda rusnok enjgineg ongga rudou oska skoita mimif rimek fogora rinagot mar ongga oska osok gij mimif ongga muroru Yesus guru. 15Didif dagot erek koma jeska ebeibeyaif rujona rija mesina rineya ongga runororu Yesus oga deika guru, jefeda rua ruroru mar ongga oska ongga en jeska Bilis ojgomu. 16Erek koma tein, erek ojaga egens ongga ororu Yesus fob, noba ofa efen mokorer era mokoser ongga rinjerek rujona rija mesina fob, beda ofa tein ofij rua ojgomu. Enadaij nou ofa osujohu rot oida rusnok Mod Ari bera rumofij rua ojgomu si guru. Ofa tein ofij rua insa koma jeskaseda ebirfager Mod Ari rumofij rujona rija mesina ongga rerin riser era ridebeser era rusnok egema tein guru rot tenten ojgomu. 17Timotius, didif duis gu rusnok ongga ruroru Yesus jeskaseda rua rugif gu rerin ebirfager Mod Ari ojgomuja. Noba ongga ofoufem ekirsa bera rua rugif gu rerin ebirfager koma ongga ruftuftu noba rifesij mar rot Allah gu rua. 18Jeska mar egens gij Mar Efeyi Ebsi agot oida, "Iwa inagei maat jeska rua ongga rumfij iwa guru, jeskaseda rua rumofij iwa ojgomuja." Noba mar egema tein gij Mar Efeyi Ebsi bera agot oida, "Rua ongga rimfarur gij mar bera risma rerin rufons rot ojgomu." Jefeda rusnok Mod Ari tein rufij rerin ebirfager rot rerin maat ongga rimet era meisoufa ongga rimergi ojgomu. 19Timotius, erek osnok egens bera efesij gu bua rot mar ongga oska ongga ebirfaga Mod Ari egens ontunggom fob, beda budou onororu mar koma guru. Tina erek gosnok gegeka era rusnok rugomu rifesij rot mar ongga oska ongga ebirfaga Mod Ari egens ontunggom fob, beda bua big rot mar ongga rua rifesij insa koma ojgomu. 20Erek ebirfaga Mod Ari rineya runtunggom mar ongga oska fob, beda bagot rot gu rua gij rusnok Mod Ari rifekesa jeskaseda ebirfager ongga enjgineg tein rimek fogora rimeesa rot rutunggom mar ongga oska. 21Noba didif duis gu bua jeskaseda bua buftuftu rot mar insa koma gu rusnok ebic nomnaga ojgomu. Enadaij nou bua bufra rusnok ebic egens erek ekirsa jeska rusnok ebic rineya guru. Budou ah keingg rot oida, Allah jera Yesus Kristus jera malaikat-malaikat ongga Allah efen, rua nomnaga ringg rot mar ongga didif danggot insa kef gu bua fob. 22Bua bunocunc rusnok ebireira erek ebirfaga Mod Ari guru. Jeska erek bua bucunc osnok egens ongga edemdemi mar ongga oska gij odou efesi ros, beda mar ongga oska ongga ofa otunggom bera emah gu bua tein si. Tina bibes bifaga jeska rusnok erek insa koma ojgomu. 23Noba bua binej mei tuturu guru. Tina ongga oufa bera bij anggur efei erek oskiyai tein jeskaseda orot rot butkonu ongga okora koma. 24Mimif mijginaga rot rusnok rineya rerin mar ongga oska fob, jeska rua rinedemi mar insa koma jeska rusnok guru. Noba Allah ensejah nou ofra mar okum keingg rua rot. Tina rineya ridemi rerin mar ongga oska jeska rusnok. Tina mar insa koma tein emah rot tomnomna beda rua rimesma okum rot tein si. 25Erek koma tein, mar ongga oufamofa ongga rusnok rutunggom bera ah tomnomna gu rusnok nomnaga. Tina enadaij nou rusnok ridemi rerin mar ongga oska jeska rusnok ojgomuja guru. Jeska gij mona kahma beda mar insa koma tein emah rot tomnomna gu rusnok nomnaga si.

will be added

X\