1 Timotius 4

1Efena Ebsi Allah anggot rot koisoisa fob oida gij mona kahma bera rusnok rineya rimeita rudou ongga eskes fogora runororu Yesus oga deika guru. Tina rua rumororu mar ongga rua rig jeska efena ofogog noba rimeita mar ongga efena ofogog insa koma oftuftu gu rua ojgomu. 2Rua rineita mar jeni erek rua ruftuftu gu rusnok enjgineg jinaga guru. Tina rua rucuwei mar ofoukou gu rusnok ojgomu, noba rudou onokora rot rusnok insa koma jinaga guru. 3Rua riyahehir joug rusnok oida runoskotu arja guru, era rinet maat ebireira guru. Tina Allah bera otunggom maat insa koma jeskaseda rusnok ongga ruroru Ofa efen oga rot tenten risma maat insa koma rot rudou ongga eirir. Noba rua ruis oufamofa eteb gu Ofa rot tein. 4Jeska mar nomnaga ongga Allah ontunggom fob bera erek oufamofa ojgomu. Noba enadaij nou rusnok rucunc maat insa koma erek mar ongga oska guru. Rua ruis oufamofa eteb gu Allah rot maat insa koma ojgomu. 5Jeska Allah esinsa enagot rot oida maat nomnaga bera erek oufamofa ojgomu. Noba rusnok tein rum riteij rot maat insa koma. 6Timotius, bua buftuftu rot mar insa koma gu bebin obohujir nomnaga ongga ruroru Yesus fob jeskaseda bua bijerek osnok egens ongga omfij Yesus Kristus rot iskusk. Noba butunggom erek koma oisouska mar ongga rusnok rumftuftu gu bua osok gij Allah efen oga ongga tenten sis fob. Noba bua buroru oga insa koma rot tenten fob tein. 7Bua bibes bifaga jeska mar ongga rusnok enjgineg rifesij moguma ongga erek rourou ojgomu. Rua ruroru mar insa koma ojgomuja, tina runororu Allah oga rot ahais guru. Bisisi joug bisinsa jeskaseda bita mar ongga erek Allah odou os rot ojgomu. 8Rusnok rineya rut joug risinsa rifaga rot ahais jeskaseda rufora efek noba rufogu eskeira eteb, tina koma ofij rua erek oskiyai ojgomu. Tina rusnok ongga rireni rot ahais jeskaseda rutunggom mar ongga Allah odou os rot, beda koma bera ofij rua gij mar nomnaga ojgomuja. Koma bera ofij rua erek eteb gij rerin riteij ah insa kef jera riteij ah efeinah ongga emen tein. 9Mar ongga didif danggot insa koma bera tenten ojgomu noba adaij nou rusnok ruroru mar insa koma rot rudou ongkasmos tein. 10(Mimif mug mijmeg rot noba mireni rot ahais jeskaseda muroru mar insa koma ojgomu.) Koma bera, mimif muisum gij Allah, ongga efen owesa efek adaij nou oskotu rusnok nomnaga jeska rerin mar ongga oska. Noba Ofa emeita eiteij ah ongga efeinah gu rusnok nomnaga ongga ruroru Yesus fob si. 11Bua bagot rot noba buftuftu rot mar insa koma nomnaga ojgomu gu rusnok jah suma. 12Enadaij nou rua runougif gu bua guru jeska rua rusujohu rot oida bua birek buforoka bifes ojgomu ros. Tina ongga oufamofa bera bua bucunc gu rusnok jah suma oida rusnok ongga ruroru Yesus rot tenten fob bera rita mar ongga erek ongkoska ojgomu. Jefeda erek bua buroru Allah rot tenten ni, binesiri jera rujager ebireira guru ni, bagot mar ongga erek oufamofa gu rusnok ni, budou okora rot rusnok ni, bucunc biteij ah ongga erek ongkoska ni, beda koma erek burocunc rot mar ongga oufamofa skoita rusnok nomnaga fob. 13Beda gij mona ongga iwa imohoturuma, beda bifesij jeska Mar Efeyi Ebsi efeb gu rua nomnaga. Noba bifesij rot Allah oga ongga oufamofa gu rusnok noba buftuftu rua rot mar insa koma tein. Bua bita mar insa koma nomnaga ojgomuja onjoros mona ongga didif dinsaga jah suma. 14Sis fob, gij mona ongga ebirfager Mod Ari raha ritma esij bua noba rum riteij keingg bua, beda bua bisma owesa efek eteb jeska Efena Ebsi Allah fob. Jefeda bunodou eskes rot owesa efek insa koma guru, tina bufij Allah oisouska mar insa koma ojgomuja. 15Bua bita mar insa koma nomnaga rot iskusk ojgomu jeskaseda rua nomnaga rik oida bua bisinsa buroru mar koma nomnaga rot tenten ojgomuja fob. 16Bua but joug budou efesi rot mar insa koma nomnaga erek ahais ojgomuja. Bug bijmeg gij mar koma ojgomu jeska koma bera ongga ereita eiteij ah ongga efeinah gu bua jera rusnok enjgineg ongga bua buftuftu rua rot jah suma fob.

will be added

X\