1 Timotius 3

1Mar ongga tenten bera erek kef: Erek osnok egens odou os ejerek ebirfaga egens nou Mod Ari, beda koma bera oufamofa ojgomu. 2Idu ongga odou os rot mar insa koma, beda ofa eita mar gij efen eiteij ah kef ongga erek ongkoska ojgomu. Ofa oskotu mohona egens ojgomu. Noba ofa onosujohu rot mar ongga oska guru. Ofa oin keingg odou efesi rot mar ongga ereneni ofa ojgomuja. Ofa odou efesis gij mar ongga ofa oftuftu gu rusnok enjgineg tein. Noba rusnok enjgineg rugif gu ofa rot efen eita mar. Noba ofa oroun rusnok rot odou ongga oufamofa skoita rua tein ojgomu. 3Ofa ebirfaga enerebibei rot mofut efei tein guru. Noba ofa onodou os rimagobuma jera rusnok enjgineg tein guru. Tina ongga tenten bera ofa eita odou eriagamaga eteb, noba onoga omosokuma jera rusnok ebireira tein guru. Ofa tein enagei mareibra jera odou ojgomuja guru. 4Ofa oftuftu efen mod etma rot ongkoska ojgomuja. Noba ofa tein oftuftu efen efeser rot tenten fogora rua rugif gu ofa tein. 5Jeska erek osnok egens onoftuftu efen mod etma rot iskusk guru, beda enadaij nou ofa ejerek ebirfaga egens gij Mod Ari guru. 6Noba erek osnok egens ongga ororu Yesus fob, tina ofa ororu Yesus erek efeinah ros, beda iwa inofra ofa erek ebirfaga Mod Ari egens enesi. Jeska erek iwa yumfra ofa erek koma fob, beda ofa emesitit esinsa efaga rot ojgomu. Noba gij mona ongga dektek guru, beda ofa emesiri gij mar ongga oska sons si. Beda Allah omofra mar okum keingg ofa morototuma erek ofa omfra mar okum keingg malaikat egens ongga ofoka Bilis sis fob. Malaikat egens insa koma esitit esinsa efaga rot eteb tein. 7Erek koma tein, idu ongga eita mar erek ebirfaga egens nou Mod Ari, beda ofa ot joug esinsa efen ofoka rot ongkoskamoka ojgomu, jeskaseda rusnok ongga runororu Yesus guru rucunc ofa erek osnok egens ongga oufamofa. Erek ofa onot joug esinsa ofoka erek koma guru, beda rusnok insa koma ruga omoruh Yesus oga. Jefeda ofa emesiri gij Bilis etma fogora emeita mar ongga Bilis odou os rot ojgomu. 8Rusnok ongga rufij ebirfager Mod Ari bera rut joug rufoka erek ongkoskamoka tein ojgomu. Rua rita mar rot rudou ongga ocosu efei ahta jera rudou ongga eriaga tein, noba ribirfaga enerebibei rot mofut efei tein guru. Noba rudou eneftirir keingg mareibra ofoukou tein guru. 9Rua tein ragei mar koma ongga rusnok Kristen nomnaga ruroru ojgomu, ongga ah jejema sis fob, rot ahais ojgomuja. 10Gij mona ongga rusnok runofra rua jeskaseda rufij ebirfager Mod Ari enesi, beda rusnok riajga joug rua rerin rita mar erek teinefa sismeni fog. Noba erek rerin rita mar ongga ongkoska ojgomu, beda rucunc rua erek rusnok ongga rumfij ebirfager Mod Ari tein. 11Rusnok insa koma rerin ruhoner tein ongga rut joug rufoka rot ongkoskamoka ojgomu. Koma bera, rua runok mocusur gij rusnok rufoka ebireira guru. Noba ribirfaga enerebibei rot mofut efei tein guru. Rua riker gij mar nomnaga rot iskusk ojgomu. 12Noba rua ongga rumfij ebirfaga Mod Ari insa koma bera ruskotu ruhoner egensmes ojgomu. Noba rua tein ruftuftu rerin riser jera rerin mod etma rot iskusk ojgomu. 13Erek rua rufij ebirfager Mod Ari rot tentenmen ojgomu, beda rusnok Mod Ari rudou emeskeira rot fogora rumougif gu rua si. Beda rua rinemeesa rot ruftuftu rusnok rot teinefa rua ruroru Yesus Kristus oga guru. 14Timotius, erek dektek guru beda didif dumojogog bua. Tina erek askesi ros, beda didif dugu surat egens kef skoita bua fog. 15Didif disa surat egens kef jeskaseda erek didif dinen ebeirens guru, beda bua bimejginaga rot teinefa rusnok ongga ruroru Allah rita mar rot tenten ojgomu. Jeska mimif nomnaga bera mirek mod egens ongga Efena Ebsi Allah engker gij. Jefeda mimif muftuftu osok gij efen oga rot ahais ojgomu, noba muroru mar insa koma rot tenten ojgomuja. 16Sis fob bera rusnok rinejginaga rot teinefa rua rita rudou ongga ebsi komowa ahah Allah eiteij enesi. Jeska mar koma ah jejema jeska rua ros. Tina mimif mijginaga rot koma fob jeska: Ofa en erek osnok egens. Beda Efena Ebsi Allah ocunc Ofa erek osnok egens ongga efen mar ongga oska oskiyai tein guru. Noba malaikat-malaikat tein ringk Ofa. Rusnok rufoukou tein rimfesij osok gij Ofa gu rusnok ongga erek Yahudi guru. Jefeda ebeibeyaif rusnok rufoukou rudou ororu Ofa fob. Allah omfra Ofa jah mebaga fogora Ofa ensma ofoka ongga aksa eteb tein fob.

will be added

X\