1 Tesalonika 2

1Edohuji, iwa isinsa ijginaga rot fob oida gij mona ongga memef monjogog iwa bera mar ongga memef montunggom gu ifekesa enerek rourou guru. 2Iwa ijginaga fob oida gij mona ongga memef meneja skoita iwa enesi, beda memef mejeker jah kota Filipi fog. Beda rua ongga kota Filipi rita mar okum ongga ereneni memef rot, noba rua ruga oruh memef tein. Rusnok rufoukou ongga rita mar okum skoita memef, tina Allah eita owesa efek gu memef jeskaseda menemeesa rot guru. Jefeda memef manggot rot efen oga ongga oufamofa gu iwa ojgomuja. 3Memef monoftuftu iwa rot modou ongga eredemdemi mar eneya jeska iwa jinaga guru. Noba memef monocuwei mar jeska iwa tein jinaga guru. 4Noba memef tein menagot mar ongga oroku rusnok rudou efesi fogora risitit mofoka tein guru. Tina memef mefesij mar gu rusnok jeni ongga Allah oncunc fob ojgomu. Ofa oncunc memef jeskaseda mejefesij rot efen oga ongga oufamofa insa koma gu rusnok enjgineg tein. Noba Ofa ejginaga rot mar nomnaga ongga mimif musujohu rot gij mudou efesi tein fob. 5Iwa isinsa tein ijginaga rot fob oida memef monoga efei jeska iwa guru. Noba memef menedemdemi mar egema gij modou efesi erek mohca mareibra era fifi jeska iwa guru. Allah esinsa ejginaga rot oida koma bera erek tenten ojgomu. 6Memef menefesij rot Allah oga gu iwa jeskaseda iwa era rusnok enjgineg tein rugif gu memef rot ojgomu guru. Memef bera erek rasul jefeda adaij nou memef mocunc mar ofoukou skoita iwa ojgomu, tina meneita mar erek koma guru. 7Tina memef moncunc modou ongga eriagamaga gu iwa erek ojaga egens ongga ofij efen efesa rot odou ongga eriagamaga tein. 8Memef modou okora eteb rot iwa, jefeda memef moftuftu iwa rot Allah oga ojgomuja. Noba memef tein moh modou rot ongkas skoita iwa jeskaseda mofij iwa gij mar enjgineg tein ojgomuja. 9Iwa isinsa ijginaga rot oida gij mona ongga memef mengker jera iwa beda memef mefarur rot ahais ojgomuja jeskaseda meita maat jera meisoufa tein. Gij mona insa koma bera memef mefarur orofosut mona jera motu tein jeskaseda misma mar insa koma fogora monois gu iwa rot mar insa koma jinaga guru. 10Gij mona insa koma bera memef meker gu iwa ifekesa rot modou ongga ebsi komowa noba memef meneita mar ongga oska egema tein guru. Jefeda enadaij nou rusnok egema tein rucunc memef erek oska guru. Iwa isinsa tein ik joug memef rot mar insa koma fob. Noba Allah tein ek rot mar insa koma fob. 11Memef meita mar jera iwa rot ongkoskamoka erek orna egens ongga eita mar gu efen efesa rot ongkoskamoka ojgomu. 12Memef modou okora rot iwa, jefeda memef mofij iwa rot modou ongga eteb noba meisisi joug iwa rot ahais tein. Memef montunggom mar erek insa koma jeskaseda iwa yut joug iteij ah erek ongkoska jeni ongga Allah ondou os rot. Ofa bera ongga oncunc iwa erek efen rusnok ongga Ofa ofoka ereij keingg. Noba iwa imesma ifoka ongga aksa morototuma jera Ofa gij mona kahma tein si. 13Beda memef mois oufamofa eteb gu Allah tein, jeska gij mona ongga memef menjefesij rot Allah oga gu iwa, beda iwa ig rot iskusk noba iroun efen oga insa koma rot idou ongga eskeiramera. Noba gij mona insa koma tein iwa iroun oga insa koma, jeska iwa ijginaga rot oida oga koma bera enen jeska rusnok ongga giskini ojgomu guru. Tina iwa iroun oga insa koma jeska idou ororu oida koma bera Allah efen oga ongga tenten fob. Noba koma bera tenten ojgomu, jeska Allah ofij iwa ongga iroru efen oga rot tenten ojgomuja. 14Edohuji, mar okum ongga angh keingg iwa bera enah gu iwa isinsiyai ojgomu guru. Tina mar okum angh keingg rusnok nomnaga ongga ruroru Yesus Kristus gij monuh Yudea tein. Rusnok Yahudi bera rita mar okum insa koma gu iwa fob. Erek koma tein, rusnok Yahudi bera rita mar okum gu rua ongga ruroru Yesus Kristus gij monuh Yudea tein. 15Rusnok Yahudi bera ongga ranggob nabi-nabi ongga sis fob, noba rua tein bera ongga runtob Yesus tumu mega salib fob. Noba rua rua tein bera ongga rita mar okum keingg memef tein fob. Rua rucunc rudou ongga ofogog skoita rusnok enjgineg tein ojgomuja. Jefeda Allah odou eneskeira rot rua jinaga guru. 16Rua rutunggom mar ongga oska ofoukou skoita memef jeskaseda menefesij rot Allah oga ongga eita eiteij ah ongga efeinah gu rusnok ongga erek Yahudi guru tein. Jefeda koma orocunc rot oida rerin mar ongga oska erek ofoukou doska fob. Jefeda ebeibeyaif Allah omofra mar okum eteb keingg rua rot si. 17Edohuji, sis fob bera memef menja jeska iwa nou mona ongga dektek guru. Tina gij mona insa koma bera memef mosujohu rot iwa ojgomuja. Noba gij mona insa koma bera memef mereni rot ahais jeskaseda moksons skoita iwa deika fog. 18Memef modou os eteb jeskaseda moksons skoita iwa. Noba didif Paulus direni jeskaseda duksons ojgomuja, tina Bilis eragou joug moroju fogora monoksons skoita iwa enesi. 19Jeska didif dik, tina iwa iroru Yesus rot tenten fob. Noba koma ereita modou efaga ouka eteb rot. Jeska gij mona ongga Yesus ongksons en fob, beda memef moisum gij Ofa rot oida Ofa emeita mefmen mofons ongga ongkoska eteb rot si. Beda Ofa omofra mefmen mofoka erek aksa morototuma jera iwa tein. 20Iwa bera iroru mar ongga memef moftuftu rot tenten fob, jefeda memef modou emefaga ouka eteb gij mona ongga mimif nomnaga misma mufoka ongga aksa morototuma.

will be added

X\