1 Petrus 2

1Erek koma jefeda, iwa ibes ifaga jeska mar nomnaga ongga oska jera mar ongga ofogog. Iwa inohurmei mar guru ni, inororu mar ongga oska ongga iyahehir joug rusnok enjgineg rot guru ni, idou eneftirir keingg mar ongga rusnok enjgineg rerin guru ni, inoga oruh rusnok enjgineg guru ni. 2Erek oforoka efes egens ongga ebisa rot mengk ojgomuja jeskaseda et mengk koma fogora omona eteb, beda iwa tein yuisum gij Allah oga ojgomuja ongga otunggom idou efesi erek ahais. Iwa yuisum gij efen oga insa koma jeskaseda idou ejerek ahais fogora iwa imesma eiteij ah ongga efeinah si. 3Jeska iwa ijginaga rot oida Tuhan bera eita oufamofa eteb skoita iwa fob. 4Iwa in skoita Tuhan Yesus ongga erek mamu ahais egens ongga angh rot mod nomnaga. Ofa bera ongga rusnok rungkoja fob, tina Allah oncunc Ofa erek mar ongga efen efera osok eteb ojgomu. 5Iwa bera erek mamu egens ongga ahais tein noba ongga efena ebah. Noba iwa iroru Allah oga rot tenten fob, jefeda iwa injerek mod egens ongga Ofa ei nou esinsa fob. Ofa otunggom mar erek koma jeskaseda iwa ijerek Ofa efen imam-imam ongga ebsi komowa, noba ongga yufij Ofa gij efen mod insa koma. Jefeda oisouska mar ongga Yesus Kristus ontunggom nou iwa fob, bera Allah odou eskeira eteb rot mar ongga iwa itunggom nou Ofa. 6Jeska Allah anggot gij Mar Efeyi Ebsi rot oida, "Iwa ig mar ongga dinagot kef fog: Ai juens beda Didif dumocunc osnok egens ongga omofoka ereij keingg dedin rusnok gij monuh Zion. Ofa bera erek mamu ahais egens ongga efen efera osok eteb. Noba mod nomnaga bera angh esij mamu egens koma. Noba idu ongga odou eredi rot Ofa, beda gij mona kahma bera mojenenir rot jinaga guru." 7Ebeibeyaif iwa iroru Yesus rot tenten fob. Jefeda Ofa bera erek mamu ahais egens insa koma. Noba Ofa bera erek mar ongga efen efera osok eteb skoita Allah. Tina Allah anggot mar gij Mar Efeyi Ebsi osok gij rusnok ongga runororu Ofa guru. Ofa agot oida, "Mamu ahais egens koma ongga rusnok rij jeska noba rukoja rot mod efeinah, mamu egens koma enjerek mamu ongga ofoufem ekirsa nou mod koma nomnaga." 8Noba mimif mijginaga rot oida Allah omofra okum eteb keingg rua insa koma ongga rungkoja Yesus Kristus si. Jeska Allah anggot gij Mar Efeyi Ebsi oida, "Mamu ongga ahais egens koma bera orotunggom rusnok fogora rukockereta noba risiri rot ojgomu." Rua rukockereta mamu egens insa koma fogora risiri, jeska rudou oska rot Ofa efen oga fogora rukoja rot efen oga insa koma ojgomu. Noba gij mona ongga sismeni fob bera Allah ejginaga rot oida rua rimeita mar erek koma si. 9Tina iwa bera erek rusnok ongga Allah oncunc fob. Noba sis fob Ofa ocunc imam-imam jeska rusnok ongga Yahudi jeskaseda rufij Ofa gij efen Mod efesi. Beda erek koma tein, ebeibeyaif Ofa oncunc iwa jeskaseda yufij Ofa ojgomuja. Iwa injerek rusnok monuh egens ongga ebsi komowa nou Allah ojgomu, jeska iwa bera injerek Ofa efen rusnok fob. Ofa oncunc iwa erek koma jeskaseda iwa ijefesij rot mar ongga oufamofa eteb ongga Ofa ontunggom nou rusnok fob. Jeska Ofa bera ongga ejeka iwa jeskaseda irogna jeska motkobah noba yuira gij efen eisa ongga oufamofa eteb. Eisa koma bera en jeska Ofa. 10Sis fob bera iwa inerek Allah efen rusnok rot tenten guru, tina ebeibeyaif iwa injerek Ofa efen rusnok fob. Noba sis fob Ofa onocunc efen odou ongga oufamofa skoita iwa guru, tina ebeibeyaif Ofa oncunc efen odou ongga oufamofa eteb skoita iwa fob. 11Edohuji ongga dudou okora rot, iwa ongga inroru Yesus Kristus fob bera iker gij mebif erek rusnok ongga rusodosa ros. Noba didif duis gu iwa jeskaseda iwa ibes ifaga jeska mar ongga oska ongga idou osos rot ojgomu. Jeska mar koma bera oroku idou efesi ojgomuja fogora imesiri gij mar ongga oska si. 12Noba iwa ongga ingker morototuma jera rusnok ongga runororu Yesus Kristus enesi ros, beda ita mar ongga erek ongkoskamoka ojgomu. Jeska ebeibeyaif rua ruga oruh iwa ojgomuja. Tina gij mona ongga Allah en jeskaseda ofra okum keingg rusnok ongga rita mar ongga oska, beda rua insa koma rumofra efen Ofoka erek aksa. Rua rimeita mar erek koma jeska rua rik mar ongga iwa itunggom gij mona deisef ongga erek ongkoskamoka ojgomu. 13Beda iwa yugif gu yeyin ebirfager nomnaga ongga rusnok runcunc fob. Noba yugif skoita yeyin ebirfaga egens ongga ekirsa jeska nomnaga. 14Noba iwa yugif gu efen moskur ongga ofa oncunc tein, jeska Allah odou os erek koma. Ebirfaga egens koma obk efen moskur jeskaseda rufra okum keingg rusnok ongga rita mar ongga oska. Noba ofa tein emeita oufamofa gu rusnok ongga rita mar ongga oufamofa ojgomu. 15Allah odou os rot oida iwa ita mar erek koma jeskaseda mar insa koma omorocunc rot tenten gu rusnok ongga rudou osumsumu rot. Beda rua rimejginaga rot oida mar ongga rua ruga oruh iwa rot bera erek tenten guru. 16Ebeibeyaif iwa yut gu isinsa jeska Yesus Kristus onsuwa iwa fob. Erek koma tina enadaij nou iwa isujohu rot oida iwa ita mar ongga oska ojgomuja tein jinaga guru. Ongga tenten bera iwa ita mar jeni erek rusnok ongga rumfij Allah ojgomuja. 17Beda yugif gu rusnok nomnaga. Noba idou omokorema rot yeyin ihujir ni, imeesa rot Allah ongga ebsi komowa ni, noba yugif gu yeyin ebirfaga egens ongga ofoka ereij keingg yeyin monuh tein. 18Iwa ongga yumfij yeyin ebirfager ojgomuja bera yugif gu rua fogora iroru rerin ruga rot iskusk ojgomu. Noba iwa ineita mar erek koma rot yeyin ebirfager ongga rudou eriagamaga rot iwa ojgomu guru, tina iwa ita mar erek koma rot yeyin ebirfager ongga rudou oska rot iwa tein. 19Jeska erek osnok egens ororu Allah oga rot ahais fob, tina rusnok enjgineg rita efera okora gu ofa rot, beda Allah odou emeskeira eteb rot ofa si. 20Tina erek osnok egens ororu mar ongga oska, noba ofa eita odou ahais gij mar okum ongga ah keingg ofa rot, beda Allah eneita oufamofa gu ofa rot mar insa koma jinaga guru. Erek koma tina erek osnok egens ororu Ofa efen oga erek ahais fogora eita efera okora rot, beda Allah odou eskeira eteb rot ofa. 21Allah bera oncunc iwa jeskaseda ita ifera okora ojgomu. Jeska sis fob Yesus Kristus eita efera okora tein. Ofa eita mar erek koma jeskaseda ofij iwa. Noba Ofa eita odou ahais gij mar ongga okum insa koma ojgomuja. Noba koma bera erek orocunc nou iwa jeskaseda iwa tein ita idou ahais erek Ofa ojgomu. 22Sis fob nabi egens agot mar rot Yesus Kristus erek kef oida, "Ofa eneita mar ongga oska oskiyai tein guru. Noba rusnok rig, tina Ofa onohurmei mar jinaga guru." 23Erek koma tein, gij mona ongga rusnok ragot mar ongga oska ofoukou skoita Ofa, beda Ofa enagot mar ongga oska sons gu rua guru. Noba gij mona ongga rusnok rita rifera okora eteb gu Ofa, beda Ofa enagot oida Ofa emeita mar ongga ofogog skoita rua sons rot guru. Tina Ofa oisum gij Allah ongga omoga ojga rot rusnok nomnaga erek tenten ojgomu. 24Ofa esinsa bera ongga eita efera okora eteb tumu mega salib rot mifmin mar ongga oska fob. Ofa otunggom mar erek koma jeskaseda mifmin mar ongga oska enah gu mimif ojgomuja guru. Tina mimif mudou os mutunggom mar ongga oufamofa ojgomu. Jeska oisouska Yesus Kristus efen efera okora insa koma bera Ofa onsuna rot mifmin mar ongga oska jeska mudou efesi fob. 25Sis fob iwa intunggom mar ongga oska jeska inejginaga rot Yesus Kristus enesi. Jefeda koma erek iwa ijeker yes jeska Ofa erek domba-domba ongga ejeker yes jeska rerin gembala egens ongga ont joug rua. Tina ebeibeyaif iwa iroru Ofa fob. Jefeda Ofa omot joug iwa erek gembala egens ongga ot joug efen domba-domba ongga ongksons skoita ofa fob.

will be added

X\