1 Yohanes 5

1Idu ongga odou ororu rot oida Yesus bera Kristus ongga Allah omobk fob, beda ofa tein bera erek Allah efen efesa. Noba ofa koma odou okora rot mifmin mika Allah tein. Beda ofa odou okora rot efen mohujir ongga Kristen tein. Jeska mohujir insa koma tein bera erek Allah efen efeser. 2Noba erek mudou okora rot mifmin muhujir, beda oisouska mar koma bera mimif mijginaga rot oida mudou okora rot Allah tein fob. Noba mimif muroru mar ongga Ofa anggot rot ojgomuja. 3Koma tein bera ongga orocunc rot oida mudou okora rot Allah erek tenten fob. Noba mimif muroru mar insa koma ongga Ofa anggot rot ojgomu. 4Jefeda mimif mijginaga rot tenten fob oida rua ongga Allah enjeka erek efen efeser bera rut joug rudou efesi rot ahais jeska mar ongga oska ojgomuja. Jeska oisouska mudou efesi ongga ororu rot tenten oida Yesus Kristus bera Allah efen efesa, beda minesiri gij mar ongga oska deika guru. 5Jeska rusnok ongga rudou ororu rot oida Yesus Kristus bera Allah efen efesa, beda rua koma bera rinesiri gij mar ongga oska gij mebif jinaga deika guru. 6Yesus Kristus bera Allah efen efesa ongga Ofa ombk gu mebif. Ofa en gu mebif jeskaseda eita baptis gu rusnok. Noba Ofa en jeskaseda efen ogufu eya tumu mega salib nou mifmin mar ongga oska tein. Koma bera, Ofa enen jeskaseda eita baptis ojgomu guru. Tina Ofa en jeskaseda efen ogufu eya tumu mega salib nou mifmin mar ongga oska tein. Noba Efena Ebsi Allah bera onocunc gij rusnok rudou efesi rot oida mar insa koma bera tenten. Jeska Efena Ebsi Allah bera agot rot mar ongga tenten ojgomu. 7Jefeda mar orgomu kef bera orocunc rot gu mimif oida Yesus erek Kristus ongga Allah omobk. 8Mar ongga egens insa koma bera, Efena Ebsi Allah ongga angh gij mudou efesi fob. Noba mar ongga egeka insa koma bera, Allah anggot rot erek mar koma gij mona ongga Yesus eita baptis gij mei. Noba mar ongga orgomu bera, rusnok ragot rot erek koma gij mona ongga rusnok enjgineg runtob Yesus efaga tumu mega salib fogora efen ogufu eya. Noba mar ongga orgomu insa koma bera orocunc rot mar ofoka egens ojgomu. Koma orocunc rot oida Yesus Kristus bera Allah efen efesa. 9Giskini mudou ororu mar ongga rusnok ranggot rot. Tina mifmin mudou ororu mar ongga Allah anggot rot erek ekirsa ojgomu. Jeska Ofa anggot rot tenten osok gij Yesus Kristus oida Ofa bera efen efesa. 10Jefeda idu ongga odou ororu rot oida Yesus Kristus bera Allah efen efesa, beda ofa ejginaga gij odou efesi rot oida mar ongga Allah anggot rot insa koma bera tenten ojgomu. Tina idu ongga onororu mar ongga Allah anggot rot insa koma guru, beda koma erek ofa osujohu oida Allah ocuwei mar rot ojgomu. Jeska ofa odou onororu mar ongga Allah anggot rot insa koma osok gij efen efesa Yesus Kristus rot tenten guru. 11Noba mar ongga Allah anggot gu mimif bera erek kef oida, "Mimif misma eiteij ah ongga ah aibin oisouska Ofa efen efesa Yesus Kristus ongga mudou ororu fob." 12Noba idu ongga eita odou egens jera Allah efen efesa, beda ofa emesma eiteij ah ongga ah aibin si. Tina idu ongga okoja Allah efen efesa, beda ofa enesma eiteij ah ongga ah aibin jinaga guru. 13Didif Yohanes, dunogu surat egens kef gu iwa ongga iroru Yesus Kristus ongga Allah efen efesa jeskaseda iwa ijginaga rot oida Allah emeita eiteij ah ongga ah aibin gu iwa si. 14Erek koma tein, mimif minemeesa rot Ofa guru, tina mimif mum miteij rot mar gu Ofa ojgomu. Jeska erek mimif mum miteij gu Ofa rot mar ororu jeni Ofa odou ejginaga rot, beda Ofa emeg muga rot mar insa koma si. 15Noba jeska Ofa emeg muga rot mar insa koma, beda Ofa tein emeita mar insa koma rot koisoisa gu mimif si. 16Erek yeyin ihujir ongga runtunggom mar ongga oska, beda iwa yum iteij nou rua ojgomu. Iwa yum iteij erek koma jeskaseda rua rimekikif jeska rerin mar ongga oska insa koma, beda Allah emeita eiteij ongga efeinah gu rua si. Tina erek rua rutunggom mar egens ongga oska eteb ahah Allah eiteij, beda Ofa onosuna rot mar egens koma jeska rudou efesi jinaga guru. Jefeda iwa inom iteij nou rusnok ongga rutunggom mar egens koma guru. Jeska Allah emeij rua gij mahmei meren rot mar insa koma si. 17Jeska Ofa odou eneskeira rot mar ongga oska egema tein ongga rusnok rutunggom jinaga guru. Tina rot mar ongga oska egema bera Ofa onobk rusnok gu mahmei meren nou mona ongga ah aibin guru. 18Mimif mijginaga rot oida rusnok ongga Allah oroun erek efen efeser bera rineita mar ongga oska ojgomuja deika guru. Erek koma tein Allah omot joug rua jeska mar ongga ofogog. Noba Bilis enesma rua jeska Ofa jinaga guru. 19Mimif mijginaga rot oida mimif bera erek Ofa efen efeser. Noba mimif tein mijginaga rot oida Bilis bera ongga ofoka ereij keingg rusnok nomnaga ongga rutunggom mar ongga oska ojgomuja. 20Erek koma tein mimif mijginaga rot oida Yesus Kristus bera en gu mebif rot tenten fob. Noba Ofa omfij mimif gij mudou efesi jeskaseda mimif mijginaga rot Allah ongga tenten. Jefeda mifmin mudou ongga egens jera Allah rot tenten fob. Noba mifmin mudou tein erek egens jera efen efesa Yesus Kristus fob. Ofa bera Allah ongga tenten, noba Ofa bera ongga eita eiteij ah ongga ah aibin gu rusnok. 21Erek koma Jefeda, edohuji ongga dudou okora rot erek dedin edeser, iwa ibes ifaga jeska mar nomnaga ongga enen jeska Allah guru. Ainsoma.

will be added

X\