1 Yohanes 4

1Edohuji ongga dudou okora rot, ongga tenten bera iwa inororu mar nomnaga ongga rusnok ruftuftu gu iwa osok gij Allah oga rot ebeirens guru. Tina iwa isujohu rot koisoisa osok gij mar koma sismeni fog jeskaseda iwa ijginaga rot tenten oida mar koma bera en oisouska Efena Ebsi Allah ei era gurei. Jeska rusnok rufoukou ongga rinja rejrej monuh ofoukou noba ruftuftu rot mar ongga tenten guru. Noba rua tein rucuwei mar rot oida mar ongga rumftuftu insa koma bera en jeska Allah ojgomu, tina guru. 2Rusnok ongga ruftuftu rot mar ongga tenten osok gij Allah oga bera ragot tein oida Yesus Kristus en jeska Allah gu mebif, noba Ofa efen efaga morototuma erek rusnok rerin rifaga tein. Koma orocunc rot oida mar ongga rusnok ruftuftu bera en jeska Allah era gurei. 3Tina erek rusnok ruftuftu oida Yesus enen gu mebif rot efen efaga guru, beda mar ongga rua ruftuftu enen jeska Allah jinaga guru. Rusnok ongga rita mar erek koma bera erek osnok egens koma ongga ok eretei rot Yesus Kristus. Iwa ig rot fob oida ofa koma emen. Noba rusnok ongga rita mar erek ofa bera rin fob. 4Erek koma tina, edohuji ongga dudou okora rot, iwa bera rusnok ongga Allah efen fob. Noba iwa inesiri gu rusnok insa koma guru. Jeska owesa efek ongga iwa insma jeska Allah bera ekirsa jeska owesa efek ongga rusnok insa koma rinsma jeska Bilis. 5Erek koma jeska rusnok ongga ruftuftu mar ongga oska insa koma bera erek rusnok mebif efen ojgomu. Noba rua ruftuftu mar oisouska meidu ongga rusnok mebif runsujohu rot ojgomu. Noba rusnok enjgineg rudou os rig rot mar ongga rua ruftuftu ojgomu. 6Tina memef bera moftuftu mar ongga en jeska Allah. Noba rusnok ongga ruroru Allah rot tenten bera ruroun mar ongga memef moftuftu. Noba rusnok ongga runororu Allah rot tenten guru bera runoroun mar ongga memef moftuftu rot guru. Mar insa koma bera ongga orocunc rot oida mar ongga rusnok ruftuftu bera erek tenten era erek oska ojgomu. 7Edohuji ongga dudou okora rot, ongga oufamofa bera mimif mudou omokorema ojgomuja. Jeska Allah eita owesa efek gu mimif jeskaseda mudou okora rot rusnok. Noba idu ongga odou okora rot rusnok enjgineg, beda ofa bera ongga erek Allah efen efesa. Noba ofa tein ejginaga rot Allah erek tenten fob. 8Tina idu ongga odou onokora rot rusnok enjgineg guru, beda ofa tein enejginaga rot Allah enesi. Jeska mar nomnaga ongga Allah ontunggom bera oisouska odou ongga okora rot rusnok. 9Noba Ofa obk efen efesa ongga egensmes gu mebif jeskaseda agos nou mimif. Beda oisouska koma bera mimif misma eiteij ah ongga ah aibin. Noba oisouska mar insa koma bera Allah oncunc gu mimif oida Ofa odou okora eteb rot mimif. 10Allah onobk efen efesa skoita mimif jeska mimif mudou okora rot Ofa guru. Tina Ofa orocunc rot oida odou okora eteb rot mimif oisouska efen efesa ongga Ofa obk jeskaseda aha esinsa efaga nou mifmin mar ongga oska. Jefeda Allah onofra mar okum keingg mimif rot mifmin mar ongga oska insa koma deika guru. 11Erek koma jefeda, edohuji ongga dudou okora rot, jeska Allah odou okora rot mimif erek koma, jefeda mimif tein mudou omokorema ojgomuja. 12Rusnok egema tein rinek Allah gu riteij enesi. Tina erek mifmin mudou omokorema, beda Allah emeja erek egens jera mimif ojgomuja. Noba mifmin mudou okora rot rusnok erek Ofa odou okora rot rusnok tein ojgomu. 13Jeska mimif mijginaga rot oida Efena Ebsi ongga Ofa eita gu mimif bera orocunc rot oida mudou erek egens jera Ofa fob. 14Noba memef mek gu meiteij jera magot rot gu rusnok tein oida mika Allah ombk efen efesa jeskaseda oskotu rusnok nomnaga jeska rerin mar ongga oska fob. 15Jefeda idu ongga agot oida Yesus Kristus bera Allah efen Efesa, beda ofa bera efen odou ongga egens jera Allah fob. 16Erek koma tein, mimif mijginaga rot tenten oida Allah odou okora rot mimif. Jeska Ofa efen odou ongga okora rot rusnok ojgomuja. Noba idu ongga odou okora rot rusnok enjgineg ojgomuja, beda ofa efen odou ongga egens jera Allah tein. 17Beda oisouska mudou ongga okora rot rusnok erek Allah odou okora rot rusnok bera mimif minemeesa rot mona ongga enja ejgwaga jinaga guru. Gij mona insa koma bera Ofa omoga ojga rot rusnok nomnaga rerin rita mar. Mimif minemeesa rot mona insa koma guru, jeska mimif mita mar ongga oufamofa gij miteij ah insa kef morototuma erek Yesus Kristus eita gij efen eiteij ah sis fob. 18Noba rua ongga rudou okora rot rusnok erek Allah bera rinemeesa rot mona ongga rua runjot jah Allah odou guru. Erek koma jeska rusnok ongga rudou okora rot rusnok enjgineg erek insa koma bera risma rudou ongga enemeesa oskiyai tein guru. Jeska erek rusnok rimeesa, beda koma orocunc rot oida rua rijginaga rot mar okum ongga emen skoita rua ojgomu. Noba rusnok ongga rimeesa rot Allah bera erek rusnok ongga rudou onokora rot rusnok enjgineg erek Allah odou okora rot rusnok enesi. 19Mimif mudou okora rot Allah noba mudou okora rot rusnok enjgineg jeska sismeni bera Allah odou okora rot mimif. 20Noba idu ongga agot oida ofa odou okora rot Allah, tina ofa tein efen odou ongga oska skoita efen mohuj ongga Kristen, beda ofa ocuwei mar ojgomu. Jeska erek osnok egens efen odou oska rot efen mohuj Kristen ongga ofa ek gu eiteij, beda ofa odou onokora rot Allah ongga ofa enek gu eiteij tein guru. 21Noba Allah anggot rot gu mimif erek kef oida, "Idu ongga odou okora rot Ofa, beda ofa tein odou okora rot efen mohuj ongga Kristen ojgomu."

will be added

X\