1 Korintus 8

1Ebeibeyaif didif dudou os disisi joug iwa osok gij mar egens ongga iwa injeka gu didif rot sis fob. Koma bera osok gij maat ongga rusnok enjgineg rira jeskaseda rirejiteyi gu mar ongga tenten guru. Mimif ongga Kristen nomnaga rijginaga rot oida mar koma ongga rusnok rugif gu bera erek oska ojgomu. Tina jeska mimif ongga Kristen rijginaga rot fob, jefeda rineya risitit risinsa rifaga rot ojgomu. Tina ongga oufamofa eteb bera rua rita rudou ongga okora rot rusnok insa koma ojgomu noba rufij rua jeskaseda rua tein ruroru Tuhan rot tenten ojgomu. 2Rusnok rineya risitit risinsa rufoka rot oida rudou ebriyi eteb gij mar nomnaga ongga erek adaij fob. Tina koma bera orocunc rot oida rudou enebriyi gij mar rot tenten enesi. 3Erek koma tina erek rusnok rudou okora rot Allah, beda ahah Allah eiteij bera rusnok koma rerin rudou ongga ebriyi gij mar rot tenten fob. Fogora rua rijginaga rot koisoisa osok gij mar ongga tenten jera mar ongga tenten guru. 4Jefeda ebeibeyaif didif dimagot rot marska ongga rusnok enjgineg rira jeskaseda rirejiteyi gu mar ongga tenten guru. Koma bera mimif tein mit marska insa koma ei, era gurei? Mimif nomnaga mijginaga rot oida mar ofoukou ongga rusnok enjgineg rugif gu jah mebaga jera mebif tein bera erek tenten guru. Jeska Allah esinsiyai bera erek Allah egens ojgomu. 5Erek koma tina rusnok enjgineg rusujohu rot oida mar ofoukou ongga rua rugif gu ongga angh gu mebaga jera mebif tein bera tenten ojgomu. (Rua rusujohu rot oida mar ofoukou koma bera erek rerin Allah era rerin Tuhan). 6Tina mimif mijginaga rot oida Allah ongga erek mika bera egens ojgomu. Ofa bera ongga ontunggom mar nomnaga. Noba Ofa otunggom mimif tein jeskaseda mija erek efen rusnok. Noba mimif mijginaga rot oida Tuhan bera erek egens ojgomu. Ofa bera Yesus Kristus. Noba oisouska Ofa bera mar nomnaga enahuma. Noba oisouska Ofa bera mimif mita miteij ah tein. 7Erek koma tina rusnok ongga Kristen rineya bera rudou enebriyi gij mar insa koma rot koisoisa enesi. Jeska rua rijekjeka rudou rot mar insa koma ongga rusnok rugif gu ros. Jefeda onjoros deisef tein bera gij mona ongga rua rit marska insa koma, beda rua rusujohu rot oida rua tein rita mar ongga oska morototuma jera rusnok ongga rira marska koma jeskaseda rirejiteyi gu mar ongga tenten guru fob. Rua rusujohu rot erek koma jeska rua rudou eineina gij rot mar ongga oufamofa jera mar ongga oska ros. 8Erek mimif mit maat eneya erek koma, noba mukoja maat eneya, beda mar koma bera onoroun mimif doida Allah guru. Noba ahah Allah eiteij bera maat ongga mimif mit fob onotunggom mimif erek rusnok ongga oufamofa era rusnok ongga oska jinaga guru. 9Jefeda adaij nou iwa it maat meidu ongga iwa idou os rot ojgomu. Tina ongga ofoufem bera iwa yut joug idou efesi rot maat ongga iwa it jeskaseda mar koma bera onotunggom rusnok enjgineg risiri gij mar ongga rua rusujohu bera erek oska guru. Koma bera rot rusnok Kristen ongga rudou eineina gij rot mar ongga oufamofa jera mar ongga oska ros. 10Jeska gij mona ongga iwa ija jah mod ongga rusnok ruhu marska insa koma ongga rusnok rira jeskaseda rirejiteyi gu mar ongga tenten guru, beda iwa imengk marska insa fogora it. Tina erek rusnok Kristen enjgineg ongga rudou eineina gij rot mar insa koma ros rik tumu iwa, beda rua tein rimengk noba rimet marska insa koma. Tina gij rudou efesi bera rua rusujohu rot oida rua runtunggom mar ongga erek oska rot ojgomu. 11Jefeda mar insa koma ongga iwa intunggom rot idou ongga eskeira ojgomu bera ongga orotunggom yeyin yuhujir koma ongga rudou enahais rot enesi fogora rua risiri gij mar ongga rua rusujohu bera erek oska ojgomuja. Noba Kristus bera enagos tumu mega salib nou rua insa koma tein. 12Jefeda mar ongga iwa ita koma bera erek iwa ita mar ongga oska skoita yeyin yuhujir ongga rudou enahais rot mar enesi ojgomu. Noba koma tein bera erek iwa ita mar ongga oska skoita Yesus Kristus ojgomu. 13Erek koma jefeda, erek mar egens ongga didif dit bera orotunggom dedin edohuj egens fogora ofa ensiri gij mar ongga ofa osujohu bera erek oska, beda didif dinet mar koma deika guru. Didif dinet mar koma guru jeskaseda dedin edohuj egens koma enesiri gij mar koma ongga ofa osujohu bera erek oska guru.

will be added

X\