1 Korintus 7

1Ebeibeyaif didif dimagot gu iwa osok gij mar ongga iwa injeka gu didif rot sis fob. Sis fob bera iwa injeka gu didif rot oida, "Runer ongga ruroru Yesus fob bera ruskotu arja ei, era runoskotu arja gurei." Didif dusujohu rot oida erek orna egens onoskotu arja enesi, beda koma bera oufa. Beda ofa efen efekesa nou ofij Allah ojgomu. 2Tina rusnok rufoukou jah suma risiri morototuma ojgomuja. Jefeda ongga oufa bera runer ruskotu arja ojgomu jeskaseda rudou efesi onockahtah rot rujager ongga ebireira guru. Noba rujager tein rahi igers ojgomu. 3Erek koma tein, erek orna egens odou os rot oida efaga eja erek egens jera efen mohona, beda efen mohona koma tein ougif gu efen mahina rot ojgomu. Noba erek ojaga egens odou os oida efaga eja erek egens jera efen mahina, beda efen mahina koma ougif gu efen mohona rot tein ojgomu. 4Jeska mohona efen efaga koma nou esinsa ojgomu guru, tina efen efaga koma nou mahina tein. Noba mahina tein efen efaga nou esinsa ojgomu guru, tina efen efaga koma nou mohona tein. 5Erek koma jefeda mahina onokoja mohona rot ongga odou os gefaga gemerek egens guru. Noba mohona tein onokoja mahina rot ongga odou os gefaga gemerek egens guru. Tina erek gegeka tein goitij rot oida gemekebema nou mona ongga estir ojgomu jeskaseda gom geiteij gu Allah gij mona insa koma, beda koma adaij nou tein. Noba, nou ongga mona insa koma oisa fob, beda goga goksons noba gerek egens deika jeskaseda enadaij nou Bilis enereni goga gij godou efesi fogora gesiri morototuma jera rujager era runer enjgineg bera guru. 6Mar ongga didif danggot rot insa kef bera enerek mar ongga duga eris rot guru, tina didif duitij rot ojgomu. 7Tina ongga tenten bera didif dusujohu rot oida oufa nou iwa nomnaga tein ita mar erek didif fogora dunoskotu arja guru. Tina koma bera oisouska owesa efek ongga en jeska Allah rot ojgomu. Noba rusnok nomnaga rineita owesa efek erek koma jeskaseda runomoskotuma guru. Jeska Allah eita owesa efek gu orofosut osnok egens egens jeni mar ongga rua rutunggom ongga erek toga jeska egema efen. 8Didif dudou os disisi joug iwa ongga inoskotu arja enesi ni, jera iwa ongga ija mesina ni, jeskaseda iwa nomnaga ita mar erek didif fogora inomoskotuma deika guru. Beda iwa yeyin efekesa nou yufij Tuhan ojgomu. 9Tina erek idou enahais rot mar insa koma guru, beda iwa imoskotuma ojgomu. Jeska koma bera oufa ekirsa rot runer ongga rudou eftirir keingg rujager era rujager ongga rudou eftirir keingg runer ojgomuja. 10Noba didif dudou os dagot mar gu iwa ongga imoskotuma fob. Iwa ongga yujager inokoja yeyin yahiner guru. Didif disinsiyai bera dinagot rot mar insa koma ojgomu guru, jeska Tuhan esinsa tein bera anggot rot mar koma sis fob. 11Tina erek rineya jeska iwa rukoja rot mar ongga didif danggot insa koma fogora rua rija jeska rerin rahiner ojgomu, beda enadaij nou rua rahi igers ongga efeinah deika guru. Tina guru, beda rua ruksons skoita rerin rahiner ongga sismeni insa koma sons ojgomu. Noba iwa ongga yuskotu arja fob bera iwa inebes yeyin yuhoner tein jeska iwa guru. 12Rot iwa ongga yuskotu arja ongga runororu Yesus Kristus enesi bera dimagot rot mar ai egens ojgomu. Noba mar egens kef bera Tuhan esinsa enagot rot guru, tina didif ongga direk rasul egens bera disisi joug iwa rot ojgomu. Mar egens koma bera, erek yeyin yuhoner ongga runororu Kristus enesi, tina rua ruitij rot oida riker morototuma jera iwa ros, beda iwa inebes rua guru. 13Erek koma tein, erek iwa ongga yahi igers jera runer ongga runororu Yesus Kristus enesi, noba rua ruitij rot oida riker morototuma jera iwa ros, beda iwa inaha rua koma jah guru. 14Jeska yeyin yahiner insa koma ongga runororu Kristus enesi bera rudou erek egens jera iwa ongga iroru Yesus fob. Jefeda ahah Allah eiteij bera rua rudou erek ebsi komowa oisouska iwa ongga iroru Yesus fob ojgomu. Erek koma tein rot yeyin yuhoner ongga runororu Kristus enesi. Jeska ahah Allah eiteij bera rua tein rerin rudou ebsi komowa oisouska iwa ongga iroru Yesus fob. Erek koma bera tenten guru, beda rusnok enjgineg rumosujohu rot oida yeyin iser erek rusnok ongga oska efekeifa ojgomu. Tina ahah Allah eiteij bera yeyin iser tein rerin rudou ongga ebsi komowa morototuma jera iwa ongga iroru Yesus fob ojgomu. 15Tina erek yeyin yuhoner era yahiner ongga runororu Kristus enesi, noba rua rudou os ribes rerin ruhoner era raha rahiner ongga ruroru Kristus fob, beda iwa yuitij rot mar koma ojgomu. Koma onoska guru, jeska Allah oitij rot jeskaseda mimif ongga Kristen miker rot miteij ah ongga eskeiramera ojgomu. 16Tina didif dagot rot oida iwa inebes yeyin yahiner insa koma ongga runororu Yesus enesi guru. Jeska oisouska mar ongga iwa yumftuftu rot bera rua rimekikif jeska rerin mar ongga oska ei era gurei. Iwa inejginaga rot guru. 17Erek koma jefeda rusnok nomnaga ongga ruroru Yesus fob bera rineferwei mar ongga angh gu rua gij mona ongga rua runororu Yesus Kristus enesi fob. Koma erek rua ongga runskotu arja fob ei era runoskotu arja enesi ei, jera mar ongga rua rimfarur gij tein. Jeska mar koma bera ongga Allah oncunc gu rua sis fob. Kef bera ongga didif danggot rot gu rusnok nomnaga ongga rumohoturuma oisouska Kristus ofoka. 18Erek rineya jeska iwa ongga riris rufom mareij ofos jeska fob gij mona ongga rua runororu Yesus enesi, beda rerin mar koma ah ojgomu. Noba rinereni jeskaseda riferwei mar koma guru. Noba rineya ongga rineris rufom mareij ofos jeska guru gij mona ongga rua runororu Yesus enesi, beda rua rerin mar koma ah gu rua tein erek koma ojgomu. Noba rua rinereni jeskaseda riris rufom mareij ofos jeska guru. 19Jeska ahah Allah eiteij bera mar ongga rusnok rutunggom gu rerin rufom mareij ofos onofoufem eteb Ofa guru. Tina mar ongga ofoufem skoita Ofa bera erek rusnok ruroru mar ongga Ofa anggot rot ojgomu. 20Jefeda rusnok nomnaga ongga ruroru Yesus fob bera rineferwei mar koma ongga angh gu rua gij mona ongga rua runororu Yesus Kristus enesi erek insa koma guru. 21Sis fob rineya jeska iwa bera rirek rusnok ongga rumfij rerin ebirfager ojgomuja. Erek koma tina, rudou onokum rot mar koma guru. Rua riker gij rerin mar ongga rimfarur gij erek insa koma ojgomu. Tina erek rerin ebirfaga egens oitij rot onsuwa rua ojgomu, beda rua rita efekesa koma fogora rija jeska ofa ojgomu. 22Tina guru, beda riker gij rerin mar ongga rimfarur insa koma ojgomu. Jeska Tuhan onsuwa rua ongga rumfij tein jeska rerin mar ongga oska fob. Erek koma noba rusnok ongga runt gu risinsa fob bera rinjerek rusnok ongga rumfij rerin ebirfaga Yesus Kristus tein fob. 23Jeska Allah bera erek mar ongga efera osok eteb fogora erengk iwa nomnaga fob. Mar ongga efera osok koma insa koma bera Yesus Kristus ongga anggos tumu mega salib nou iwa fob. Jefeda iwa ineita mar jeskaseda rusnok risitit yeyin ifoka rot ojgomu guru. Tina ongga ofoufem bera iwa ireneni rot ahais jeskaseda itunggom mar ongga ereita Allah odou eskeiramera eteb rot iwa ojgomu. 24Erek koma jefeda edohuji, iwa ita idou egens morototuma jera Allah ojgomu, noba iroru mar koma ongga ah gu iwa sis mona ongga iwa inororu Yesus Kristus enesi. 25Ebeibeyaif didif dumoroun mar sons gu ruforoka rifes osok gij mar ongga iwa injeka gu didif rot sis fob. Mar koma bera osok gij ruforoker jera rujower ongga runomoskotuma enesi. Noba mar egens kef bera Tuhan enagot rot gu didif guru. Tina jeska Tuhan ocunc efen odou ongga oufamofa eteb skoita didif fob, jefeda didif dusujohu rot oida iwa tein ita idou ongga eskeiramera rot mar ongga ai juens dimeisisi joug gu iwa rot gij surat egens kef. 26Gij mona insa kef bera mar okum ah keingg mimif nomnaga ongga muroru Yesus Kristus fob. Erek koma jefeda didif dusujohu rot oida, erek rineya jeska iwa ongga rumoskotuma fob era enesei, beda rua nomnaga riker erek koma ojgomuja. 27Noba rineya jeska iwa ongga ruskotu arja fob, beda rua runohca moroju jeskaseda ribes rerin ruhoner jeska rua guru. Erek koma tein, rineya jeska iwa ongga runoskotu arja enesi, beda rua rinesejah jeskaseda rumoskotu arja ebeirens enesi. 28Tina erek rua insa koma rujoskotu arja ojgomu, beda koma enerek mar ongga oska guru. Noba erek rujower ongga rinahi igers enesi, tina rua rudou os rahi igers ojgomu, beda koma tein enerek mar ongga oska guru. Erek koma tina, rusnok ongga rudou os rumoskotuma ojgomu bera rimeita rifera okora ekirsa rot mar koma ongga ah keingg mimif nomnaga gij mona insa kef. Jefeda didif disisi joug iwa rot mar insa koma jeskaseda mar okum koma enecirej iwa erek ekirsa guru. 29Edohuji, didif dusujohu rot oida mifmin mona ongga ofoukou deika guru. Jefeda gij mona ongga estir kef bera rua ongga runskotu arja fob rudou enerebibei rot mar ofoukou ongga rudou efeneinei rot osok gij rerin riteij ah kef ojgomuja guru. Tina rua rinsejah rudou efesi rot mar ongga ofoufem gij mona insa kef tein morototuma erek runer ongga runoskotu arja enesi rinsejah nou mar ongga ofoufem tein ojgomuja. 30Erek koma tein rusnok rudou enerebibei rot mar okum ongga ereita rudou ebisa rot ojgomuja guru ni, rudou enerebibei rot mar ongga ereita rudou efaga ouka eteb rot ojgomuja guru ni, rusnok ongga ringk mareibra ofoukou bera rudou enerebibei rot rerin mareibra koma ojgomuja guru ni. 31Rusnok rudou enerebibei rot mar ongga rua rij rufora efek rot gij rerin riteij ah kef ojgomu guru ni. Erek koma jeska mar insa koma nomnaga ongga angh gu miteij ah kef bera emeseiseifa ojgomu. Jefeda idou enerebibei rot mar insa koma nomnaga tein ojgomuja guru. 32Didif dudou os rot oida iwa ongga yuskotu arja fob bera yusuwa isinsa jeska mar okum koma ongga angh keingg rusnok nomnaga ongga ruskotu arja fob. Rusnok ongga runoskotu arja enesi bera rudou osujohu rot mar ongga ofoufem skoita Tuhan ojgomu. Jeska rua rudou os rutunggom mar ongga eita Tuhan odou eskeiramera rot ojgomuja. 33Erek koma tina rusnok ongga ruskotu arja fob bera rudou erebibei rot mar ongga angh gu mebif ojgomu. Jeska rua rudou os rutunggom mar ongga eita ruhoner rudou eskeiramera rot ojgomu. 34Jefeda mar ongga angh gu mebif bera eita rudou eremesesma jera mar ongga erek ofoufem skoita Allah ojgomu. Noba rujager ongga rinahi igers guru, era rujower ongga rinahi igers enesi bera rudou osujohu rot mar ongga ofoufem skoita Allah ojgomuja. Jeska rua rudou os rutunggom mar rot rudou ongkasmos ongga ereita Tuhan odou eskeiramera rot ojgomu. Tina rujager ongga ranghi igers fob bera rusujohu rot mar ongga mebif efen ojgomu, jeska rua rudou os rutunggom mar ongga ereita rahiner rudou eskeiramera rot ojgomu. 35Didif dinagot mar insa kef jeskaseda diragou joug mar ongga iwa indou os rot guru. Tina didif dagot rot mar insa kef jeskaseda durofij iwa. Beda iwa imotunggom mar ongga oufamofa noba ongga eneremesesma rot mar ongga ofoufem skoita Tuhan Allah guru. 36Erek koma noba erek orna egens osujohu rot oida erek mona ofoukou fob, tina ofa eneita mar jeni ongga ofa anggen rot efen osroj enesi. Noba rusnok egema tein rudou os riradgodu goga jeskaseda gefaga erek egens ebeirens. Beda orna egens koma eita mar ongga ofa esinsa osujohu rot bera erek oufa ojgomu fogora gegeka tein gomoskotuma ojgomu. Mar ongga ofa ontunggom koma bera enerek oska guru. 37Tina erek orna egens esinsa oga ojga rot oida ofa onoskotu efen osroj enesi, noba rusnok enjgineg runoftuftu ofa rot erek koma guru, beda adaij nou ofa eita mar jeni erek esinsa odou os rot ojgomu. Jefeda erek ofa onoskotu efen osroj insa koma enesi, beda osroj egens koma eker nou ojgomu. Mar ongga ofa ontunggom insa koma tein bera erek oufa. 38Erek koma jefeda, gij mona kef ongga mar okum ah keingg mimif ojgomuja, beda runer koma ongga ruskotu rerin rusroj fob bera rutunggom mar ongga erek oufamofa. Tina mar ongga erek oufamofa ekirsa jeska koma bera runer runoskotu rerin rusroj enesi. 39Erek ojaga egens ongga anghi igers fob, beda ofa eker erek orna egens koma efen mohona ojgomuja. Tina erek efen mahina koma anggos jeska fob, beda adaij nou ojaga egens koma ahi igers efeinah deika. Tina ofa ahi igers jera orna egens ongga ororu Tuhan Yesus fob ojgomu. 40Erek koma tina, erek ojaga egens enahi igers jera mahina efeinah egema deika guru, beda didif disinsa dusujohu rot oida ofa bera odou erirei eteb ekirsa rot tein. Noba didif dusujohu rot oida Efena Ebsi Allah oitij rot mar insa koma tein fob.

will be added

X\