1 Korintus 5

1Rusnok rufoukou jeska iwa rifesij mar moguma rot osnok egens ongga ontunggom mar ongga oska efekeifa jah gu iwa ifekesa fob. Beda ebeibeyaif didif tein dig rot mar insa koma fob. Koma bera, osnok egens ensiri morototuma jera meka efen mohona fob. Noba koma bera oska ekirsa jeska mar ongga rusnok ongga runororu Allah guru rutunggom ojgomu. 2Erek koma tina iwa isitit ifaga ojgomu jeska iwa isujohu rot oida mar nomnaga ongga angh gu ifekesa bera erek oufamofa ros ojgomu. Tina ongga tenten bera iwa ita idou ongga okumkum rot mar ongga oska egens koma ongga ofa ontunggom jah gu ifekesa ojgomu. Jefeda gij mona ongga iwa imohoturuma jeskaseda yugif gu Allah, beda yukoja ofa ojgomu, noba ineramecinma jera ofa deika guru. 3Ainsa kef didif diker yes jeska iwa, tina mar ongga didif dunsujohu rot bera osok gij iwa ojgomuja. Noba didif duga ojga rot gij dudou efesi osok gij meidu iwa itunggom rot osnok egens koma efen mar ongga oska. 4Iwa itunggom erek mar kef: Iwa imohoturuma oisouska owesa efek jeska Tuhan Yesus jera oisouska meidu ongga iwa ijginaga didif dunsujohu rot ojgomu. Beda iwa ira owesa efek koma jeska Yesus Kristus fogora 5yukoja ofa koma jeska ifekesa. Beda yaha ofa gu Bilis ojgomu jeskaseda Bilis eita efera okora eteb gu ofa rot ojgomu. Beda ofa emeesa joug efen mar ongga oska insa koma. Noba gij mona ongga Tuhan ongksons en, beda Ofa eneij osnok egens koma jah mahmei guru. 6Iwa isitit isinsa ifaga rot oida yeyin idou ongga ororu Yesus Kristus rot tenten fob ei. Erek koma tina iwa tein irons rot osnok egens koma jeskaseda otunggom mar ongga oska eteb jah gu ifekesa tein ojgomuja. Koma bera erek oska eteb. Jeska iwa ijginaga rot oida erek rusnok raha roti efed oskiyai gij roti, beda koma omorok mokcin roti koma nomnaga. Erek koma tein, erek rusnok Mod Ari egens rurons rot mar ongga oska ongga osnok egens insa koma ontunggom fob, beda mar ongga oska insa koma bera omorok mokcin rusnok Mod Ari nomnaga ojgomuja. 7Jefeda erek rusnok ongga Yahudi rij roti efed nomnaga jeska rerin mod gij mona ongga Paskah jeskaseda onorok mokcin rerin roti guru, beda iwa tein inorons rot mar ongga oska insa koma ongga angh gu ifekesa jinaga guru. Jeska mar koma bera erek mifmin erebent ongga ensis. Tina iwa ij mar ongga oska insa koma jeska ifekesa ojgomu jeskaseda yeyin ebic egens ongga erek ebsi komowa tuturu ojgomu. Jeska koma bera erek yeyin erebent ongga efeinah. Iwa ita mar erek koma, jeska Allah oncunc iwa fob erek efen rusnok ongga rerin mar ongga oska egema deika guru. Noba erek rusnok Yahudi riris domba efer egens gij mona ongga Paskah jeskaseda Allah ocunc rua erek rusnok ongga rerin mar ongga oska guru, beda Yesus tein bera ongga erek mifmin domba efer. Jeska Ofa anggos tumu mega salib jeskaseda Allah osuna rot mifmin mar ongga oska jeska mudou efesi. 8Jefeda erek rusnok Yahudi rudou efaga ouka gij mona ongga Paskah omoisa, beda mimif tein mudou efaga ouka rot mar koma ongga Kristus ontunggom nou mimif fob. Noba mimif munorons rot mar ongga oska oskiyai tein jera mar ongga ofogog egema tein guru jeskaseda mar koma onorok mokcin mudou efesi guru. Tina mimif mita miteij ah ongga ebsi komowa noba ongga oufa ojgomuja. 9Didif dunggu gij surat egens gu iwa sis fob rot oida iwa ineramecinma jera runer era rujager ongga risiri morototuma erek ebireira guru. 10Tina didif dinagot oida iwa ineramecinma jera rusnok egema ongga runougif gu Allah guru noba ongga risiri morototuma erek ebireira ni, era ongga rudou eftirir keingg mar ofoukou ni, era ongga rurokrusa mar jeska rusnok ni, era ongga rugif gu mar ongga enjgineg ni, guru. Didif dinagot erek koma guru. Jeska erek didif danggot mar erek koma beda koma erek iwa ija jeska mebif nomnaga rot ojgomu. Jeska rusnok ongga rutunggom mar erek insa koma bera riker gij mifekesa ojgomuja. 11Tina mar ongga didif danggot gij surat egens insa koma sis fob bera oida iwa ineramecinma jera rusnok ongga ragot oida rua bera Kristen fob, tina rua risiri morototuma erek ebireira ni, era rudou eftirir keingg mar ofoukou ni, era rugif gu mar ongga tenten guru ni, era ruhurmei mar gij rusnok enjgineg ni, era ribirfaga erebibei rot mofut efei ni, era rurokrusa rusnok enjgineg ni, ongga ragot oida rua bera Kristen, tina rua rita mar erek insa koma. Noba koma bera erek oska ekirsa jeska rusnok mebif ongga rita mar erek insa koma. Jefeda iwa inet maat morototuma jera rua tein jinaga guru. 12- 13Didif dunoga ojga rot rusnok insa koma ongga runougif gu Allah guru. Jeska Allah esinsa bera ongga omoga ojga rot rua ojgomu. Tina erek iwa yuga ojga rot rusnok rufogog koma ongga ringker jah ifekesa, beda koma bera oufa ojgomu. Jeska runggu gij Mar Efeyi Ebsi oida, "Iwa ikemeji osnok egens ongga ofogog jeska ifekesa ojgomu."

will be added

X\