1 Korintus 16

1Ebeibeyaif didif dudou os dagot mar osok gij fifi ongga iwa inghoturu nou Allah efen rusnok gij kota Yerusalem. Didif dudou os rot oida iwa itunggom mar erek didif dumftuftu rot gu rua ongga ruroru Yesus gij monuh Galatia sis fob tein. 2Koma bera, gij orofosut mona ongga Ari, beda orofosut osnok egens egens ekeba fifi egema nou Allah jeni erek rua egens egens rerin owesa efek rot ojgomu. Iwa itunggom mar erek koma jeskaseda gij mona ongga didif dinsaga jah kota Korintus fob, beda iwa inghoturu fifi koma fob. 3Beda iwa icunc rusnok rineya ongga iwa idou iredi rot rua ojgomu. Noba gij mona ongga didif dinsaga jah suma fob, beda didif dimeita surat ongga ongkag rot rua fogora rumorka skoita rua ongga ringker jah kota Yerusalem. Beda didif dumobk rua rot fifi tein ongga iwa ingkeba fob jah Allah efen rusnok gij kota Yerusalem. 4Noba erek ofoufem rot beda didif tein dimeja jah suma morototuma jera rua. 5Didif dimeja jah monuh Makedonia sismeni fog, fogora dumojogog iwa gij kota Korintus tein. 6Beda didif dudou os diker jera iwa jah suma onjoros mona ongga mof eteb omoisa fob ei era gurei, didif dinejginaga rot enesi. Tina erek didif diker dektek jera iwa, beda oufa nou iwa yufij didif jeskaseda disejah mar nou monuh kenefo ongga didif dimeja gij. 7Erek didif dujogog iwa ebeibeyaif, beda didif diker erek mona ongga estir ojgomu, fogora dija jah monuh Makedonia. Tina didif dunodou os rot erek koma guru. Jeska erek Tuhan oitij rot, beda gij mona kahma bera didif dimeker jera iwa erek mona dektek tein. 8Ebeibeyaif bera didif diker gij kota Efesus ojgomuja onjoros mona Pentakosta ensaga fob. 9Jeska gij mona ebeibeyaif bera rusnok rufoukou jah sif ongga rineg rot Allah oga enesi. Noba rusnok rufoukou ongga rufogog rot didif tein, tina didif diker ojgomu jeskaseda difarur rot Allah juens deika fog. 10Erek Timotius enjah skoita iwa, beda iwa iroun ofa rot idou ongga ongkoska ojgomu jeskaseda ofa odou erirei jera iwa. Jeska ofa bera erek osnok egens ongga emfarur rot Tuhan morototuma erek didif tein fob. 11Enadaij nou rusnok rineya rifena oskereta rot ofa jinaga guru. Tina iwa yufij ofa ojgomu jeskaseda ofa omoksons skoita didif. Beda iwa ita mar erek koma jeska didif diker nou ofa jera dedin edohujir enjgineg tein. 12Osok gij Apolos bera, didif diradgodu ofa ojgomuja jeskaseda ofa eja morototuma jera mifmin mohujir enjgineg tein skoita iwa, tina ofa onodou os eja gij mona ebeibeyaif enesi. Jefeda gij mona kahma beda ofa emeja skoita iwa si. 13Iwa ibes ifaga jeska mar ongga oska noba iroru Allah oga rot ahais ojgomuja. Noba iwa enemeesa rot mar egema tein guru, tina yuku yufos ojgomu erek rua ongga ruroru Yesus Kristus rot tenten. Noba ita idou ahais gij mar ongga ereneni iwa. 14Iwa itunggom mar nomnaga jera idou ongga okora rot rusnok enjgineg tein. 15Iwa ijginaga rot oida Stefanus jera efen rusnok ongga rinkger jera ofa bera ongga ruroru Yesus sismeni jah monuh Akhaya. Noba ebeibeyaif rua raha risinsa jeskaseda rufij Allah efen rusnok ojgomuja. 16Edohuji, didif duis rot duga eteb gu iwa jeskaseda iwa yugif gu yeyin ebirfager Mod Ari ongga rita mar erek rua insa koma jera rusnok nomnaga ongga rimfarur morototuma jera rua. 17Didif dudou efeneinei rot iwa jeska iwa ineker morototuma jera didif jah sif guru, tina ainsa kef bera Stefanus ni, Fortunatus ni, Akhaikus ni, rua nomnaga rin skoita didif fob. Noba koma eita dudou erirei rot tein. 18Beda rua rufij didif fogora dudou ahais morototuma erek rua rufij iwa sis fob tein. Rusnok ongga rita mar erek koma bera erek ofoufem nou mimif nomnaga. 19Rusnok nomnaga ongga rumohoturuma gij Mod Ari ongga ont jah suma gij monuh Asia ruisu iwa. Noba Akwila jera Priskila jera rusnok nomnaga ongga rumohoturuma gij gegan mod efesi bera rua ruisu iwa. 20Noba mifmin mohujir ongga ruroru Yesus jah kota Efesus kef tein bera ruisu iwa. Gij mona ongga iwa imorodosuma, beda icunc idou ongga oufamofa moguma ojgomu, jeska koma bera orocunc rot oida iwa idou omokorema fob. 21Ebeibeyaif didif disinsa bera dugu gij surat egens kef rot oida, "Didif Paulus tein duis oufamofa eteb gu iwa." 22Erek rusnok rineya rudou onokora rot Tuhan guru, beda mar okum emah keingg rua ojgomu. Tina mimif magot oida, "Maranatha," ongga efen ofou oida, "Tuhan, bua bin ojgomu." 23Didif duis gu Tuhan jeskaseda Ofa eita oufamofa eteb gu iwa ojgomuja. 24Didif dudou okora rot iwa nomnaga jeska mimif nomnaga bera erek egens oisouska Yesus Kristus fob. Ainsoma.

will be added

X\