1 Korintus 15

1Edohuji, ebeibeyaif didif dudou os disisi keingg iwa sons deika osok gij Allah oga ongga oufamofa koma ongga didif dimfesij gu iwa sis fob. Oga ongga oufamofa insa koma bera ongga iwa inroru fob noba onjoros mona deisef tein iwa bera iroru oga koma ojgomuja. 2Noba erek iwa iroru oga ongga oufamofa insa koma, beda iwa imesma eiteij ah ongga efeinah jeska Allah. Tina erek iwa inororu oga insa koma guru, tina iwa iroru mar enjgineg tein ongga erek tenten guru, beda koma onofij iwa guru. Jeska koma eneita eiteij ah ongga efeinah gu iwa guru. 3Erek koma jeska mar insa koma nomnaga ongga didif dimfesij gu iwa sis fob bera dinsma jeska Tuhan sis fob. Noba mar koma ongga didif dimfesij insa koma bera erek ofoufem eteb. Mar koma bera, Kristus agos tumu mega salib nou mimif jeskaseda osuwa mimif jeska mifmin mar ongga oska nomnaga. 4Beda rusnok rinsah Ofa efen efaga gij mamu efesi. Noba gij mona ongga orgomu fob, beda Allah omfra Ofa jeska anggos. Noba mar koma nomnaga ororu jeni mar ongga runggu gij Mar Efeyi Ebsi sismeni fob. 5beda Yesus oncunc esinsa efaga gu Petrus sismeni fogora gu efen ruforoker rufok setka kungkob erfeka. 6Beda Ofa ocunc efen efaga gu efen rusnok rufok wuntin cinja ongga ruroru Ofa tein. Noba rusnok koma rineya ragos fob, tina rufoukou bera rifena ebah ros. 7Beda Ofa ocunc efen efaga gu Yakobus fogora gu efen rasul-rasul nomnaga tein. 8Noba gij mona kahma deika beda Ofa ocunc esinsa gu didif tein ongga erek rasul ongga osuira. Jeska erek eferatefa egens ongga ojaga enesejah nou onjuj rot enesi, tina onjuj ojgomu, beda erek koma tein sis fob didif tein dinesejah jeskaseda dija erek rasul enesi. Erek koma tina Allah oncunc didif erek rasul ojgomu. 9Erek koma jefeda didif direk rasul egens ongga Tuhan efen noba ongga dufoka enaksa morototuma erek rasul-rasul enjgineg insa koma guru. Noba enadaij nou rusnok rijeka gu didif erek rasul guru. Jeska sis fob bera didif dumfra mar okum eteb keingg rusnok ongga ruroru Yesus fob ojgomuja. 10Tina ebeibeyaif didif bera dita mar erek rasul gij mona deisef jeska Allah eita oufamofa eteb gu didif jeni mar ongga Ofa esinsa ondou os rot ojgomu. Noba koma ongga Ofa ontunggom nou didif bera enah erek rourou ojgomu guru. Jeska didif difarur erek ahais ekirsa jeska rasul-rasul enjgineg nomnaga. Tina didif dinefarur mar kef ororu jeni disinsa dedin owesa efek guru. Jeska Allah bera ongga eita oufamofa eteb gu didif fogora dimfarur gij mar erek insa koma ojgomu. 11Erek koma jefeda erek iwa ingg rot Allah oga ongga oufamofa koma jeska didif era jeska rasul-rasul enjgineg, beda koma onofoufem guru. Jeska mar ongga memef nomnaga memfesij rot bera efen ofou ongga erek morototuma ojgomu. Noba ongga ofoufem bera iwa iroru Allah oga ongga oufamofa insa koma ojgomuja. 12Memef ongga rasul-rasul bera memfesij gu iwa rot oida Allah omfra Yesus Kristus jeska anggos fob. Tina teinefo fogora rineya jeska iwa ragot oida rusnok ongga ranggos fob bera rinedebecki deika guru erek komo. 13Jeska, erek iwa isujohu rot oida rusnok rinedebecki jeska ranggos guru, beda koma orocunc rot oida Allah onofra Yesus Kristus tein jeska anggos guru. 14Noba erek Allah onofra Yesus Kristus jeska anggos guru, beda koma orocunc rot oida mar ongga memef memfesij rot insa koma bera onofij iwa jinaga guru. Jefeda Allah oga ongga oufamofa insa koma ongga iwa inroru bera onofij iwa oskiyai tein jinaga guru. 15Noba erek rusnok rinedebecki jeska ranggos guru, beda Allah tein onofra Yesus Kristus jeska anggos guru. Noba ongga okum ekirsa bera koma tein orocunc rot mar ongga memef memfesij insa koma rot noba ongga en jeska Allah bera erek ocuwei mar ojgomu. Jeska memef memfesij rot oida Allah omfra Yesus Kristus jeska anggos fob. 16Jefeda erek rua ongga ranggos rinedebecki deika guru, beda Allah onofra Yesus Kristus jeska anggos guru. 17Noba erek Yesus Kristus enedebecki jeska anggos guru, beda mar ongga iwa iroru bera onofij iwa erek oskiyai tein guru. Jeska yeyin mar ongga oska nomnaga bera ah gu iwa ros ojgomu. 18Erek koma tein rot rusnok ongga ruroru Yesus Kristus sis fob tina ongga ranggos fob. Rua tein rinedebecki jeska ranggos guru, tina riseiseifa ojgomu. 19Jefeda koma tein erek mimif muisum gij Yesus Kristus rot mifmin miteij ah ebeibeyaif ojgomu. Noba rusnok enjgineg rimagot oida mimif bera mirek rusnok ongga rudou omodgema rot ojgomu ros. Tina erek koma guru. 20Tina ongga tenten bera Allah omfra Yesus Kristus jeska anggos fob. Noba jeska Ofa bera ongga endebecki jeska anggos rot sismeni, beda koma erek orocunc rot oida rusnok ongga Kristen nomnaga ongga ranggos fob bera rimedebecki jeska ranggos si. 21Jeska mar ongga oska ongga osnok egens ontunggom sis fob bera orok mokcin rusnok nomnaga jefeda rijagos rot ojgomu. Beda erek koma tein mar ongga oufa ongga osnok egens ontunggom fob bera orofij rusnok nomnaga fogora rimedebecki jeska ranggos rot si. 22Jeska Adam, ongga osnok egens ongga sismeni, onororu Allah oga nomnaga rot tenten guru, jefeda efen mar ongga oska koma bera orok mokcin mimif nomnaga ongga munjuj jeska ofa tein fob, fogora magos rot ojgomu. Tina Yesus Kristus ororu Allah oga nomnaga rot tenten gij mona ongga Ofa engker gu mebif ros. Jefeda mar ongga oufamofa koma bera ongga ereita eiteij ah ongga efeinah gu mimif ongga erek efen rusnok. 23Tina Yesus Kristus jera efen rusnok nomnaga rinedebecki jeska ranggos morototuma gij mona egens ojgomu guru. Jeska Yesus Kristus bera ongga endebecki jeska anggos rot sismeni fog. Ofa bera ongga sismeni rot rusnok rufoukou ongga rimedebecki jeska ragos. Noba gij mona ongga Ofa ongksons en, beda efen rusnok tein rimedebecki jeska ranggos si. 24Gij mona ongga enja ejgwaga ensaga fob, beda Yesus Kristus omoku owesa efek jeska rua ongga rufoka ereij keingg rusnok nomnaga, jera rua ongga rufoka aksa nomnaga ongga ringkirsa rot Allah oga. Beda Ofa omofra mar okum eteb keingg rua fogora rumorowora ojgomu. Erek koma beda Yesus Kristus emaha owesa efek insa koma nomnaga gu efen meka Allah. Beda Allah omofoka ereij keingg rusnok nomnaga ojgomuja. 25Erek koma jeska Yesus Kristus omofoka ereij keingg rusnok ojgomu onjoros mona ongga Ofa omoin keingg rusnok nomnaga ongga rufogog rot Ofa. 26Erek koma tein rot mar ongga oska koma ongga orotunggom mimif fogora magos ojgomu. Gij mona ongga Yesus otunggom mar nomnaga erek omoisa fob, beda Ofa emagei owesa efek jeska mar ongga oska insa koma fogora mimif minemeesa rot manggos deika guru. 27Jeska runggu gij Mar Efeyi Ebsi rot oida, "Oisouska mar ongga Allah ontunggom fob bera Yesus Kristus omofoka ereij keingg mar nomnaga ongga efen owesa efek ojgomuja." Noba mar insa koma gij Mar Efeyi Ebsi agot oida, "Omofoka ereij keingg mar nomnaga," tina koma onorocunc rot oida Ofa omofoka ereij keingg Allah tein guru. Jeska oisouska mar ongga Allah ontunggom fob bera Yesus Kristus omofoka ereij keingg mar nomnaga ojgomuja. 28Gij mona ongga Yesus Kristus ofoka ereij keingg mar nomnaga fob, beda Ofa omoin keingg esinsa ofoka gu efen meka Allah. Jeska erek didif danggot insa koma oida, Allah bera ongga ocunc Yesus Kristus jeskaseda ofoka ereij keingg mar nomnaga. Tina Yesus Kristus bera omoin keingg esinsa ofoka erek koma jeskaseda Allah emeita ofoka ongga aksa ekirsa noba ongga ereij keingg mar nomnaga. 29Ebeibeyaif didif dudou os dagot mar egens deika osok gij rua insa koma ongga ranggot rot oida rusnok ongga ranggos fob bera rinedebecki deika guru. Erek mar ongga rua ranggot insa bera tenten ei, beda teinefo rot rusnok ebic egens koma ongga rita baptis oisouska Yesus ofoka ofosma jueka, sismeni rot risinsa, beda rot ofosma jueka rot rerin rusnok ongga ranggos fob ongga rineita baptis enesi. Tina erek rusnok rinedebecki jeska ranggos deika guru, beda mar ongga rusnok ebic egens insa koma runtunggom bera onofij rua era rerin rusnok ongga ranggos koma oskiyai tein guru. 30Erek koma tein memef bera memef meita mifera okora jeska rusnok ongga rufogog rot memef jeska memef moftuftu rot Allah oga ongga oufamofa. Tina erek rusnok rinedebecki jeska ranggos guru, beda mar ongga memef mencira gij insa koma bera onofij memef jinaga guru. 31Edohuji, gij orofosut mona bera rusnok ongga rufogog rot didif bera rita mar ongga oska gu didif fogora doida danggos rot. Koma jeska didif difesij rot Allah oga gu rusnok ojgomu. Koma erek tenten, tina dudou erirei rot ojgomu. Noba didif disitit rot iwa ifoka tein gu rusnok enjgineg jeska iwa iroru mifmin Tuhan Yesus Kristus rot tenten ojgomuja. 32Noba gij kota Efesus kef bera didif dita dudou ahais rot rusnok jah sif ongga erek rufogog eteb doska. Tina erek rusnok rinedebecki jeska ranggos guru, beda mar koma ongga didif dincira rot gij Kota Efesus bera onofij didif jinaga guru. Jefeda erek rusnok rinedebecki jeska ranggos guru, beda mimif tein mita mar erek rusnok ongga Yunani ranggot rot ojgomu. Rua ragot oida, "Mimif mit maat ni, mij anggur efei ni, mifaga ouka eteb ojgomuja ni, jeska mifmin miteij ah erek estir ojgomu, beda mimif magos noba mifaga tein etefa ojgomu." 33Tina erek koma guru. Noba ongga oufamofa bera, iwa ibes ifaga jeska rusnok ongga ruhurmei mar rot oida rusnok rinedebecki jeska ranggos guru ojgomu. Erek iwa inebes ifaga jeska rua guru, beda rua rumorokrusa iwa skoita mar ongga tenten guru. 34Iwa ibs idou efesi rot mar ongga didif danggot rot gu iwa ojgomu, noba inororu mar ongga oska insa koma deika guru. Jeska rineya jeska iwa rudou osumsumu rot Allah oga ros. Noba koma erek oroh mojen gu iwa nomnaga tein. 35Didif danggot rot oida rusnok rimedebecki jeska ranggos fob, tina rusnok rineya rijekjeka rudou rot mar insa koma oida, "Rua ongga ranggos bera rimedebecki erek teinefa? Noba rua rimeita rifaga ongga efeinah tein ongga erek teinefa?" 36Wah, rua ongga rinjekjeka rudou efesi rot erek koma bera erek rudou osumsumu eteb ros! Gij mona ongga iwa irefa metrem efej, beda efej koma etefa fob fogora ofoita emer erek efeinah deika. 37Noba gij mona ongga iwa irefa maat efej insa koma era maat efej enjgineg tein bera iwa inerefa efaga guru, tina iwa irefa efej ojgomu. 38Beda Allah esinsiyai bera emeita maat efej koma efen efaga jeni erek ongga Ofa ondou os rot ojgomu. Noba Ofa eita efaga ongga erek toga toga gu maat efej nomnaga. 39Marska nomnaga ongga efena ebah gu mebif efen efaga ongga erek toga toga. Koma bera, mek efen efaga ongga toga jeska mem. Noba mem efen efaga ongga toga jeska mos. Beda rusnok rerin rifaga toga jeska marska insa kef tein nomnaga. 40Erek koma tein, mar ongga angh gu mebaga erek malaikat-malaikat bera rerin rifaga ongga ongkoska tina ongga erek toga jeska rusnok mebif rerin rifaga ongga ongkoska tein. 41Noba mowa eisa egigir efen ongkoska erek toga jeska mesta. Noba mesta eisa egigir efen ongkoska ongga toga jeska motur. Noba orofosutut motur koma egens egens eisa egigir efen ongkoska ongga erek toga toga. 42Erek koma tein rot rusnok gij mona ongga Allah omfra rua jeska ranggos fob. Koma bera, gij mona ongga rusnok ranggos beda rusnok enjgineg risah rifaga koma gij moksu, beda rifaga koma etefa ojgomu. Tina gij mona ongga Allah omfra rusnok jeska ranggos fob, beda rua rimesma rifaga ongga enetefa deika guru. 43Noba rifaga insa koma ongga rusnok rinsah gij moksu bera erek mar ongga oroh mojen rot gu mimif nomnaga ojgomu. Jeska gij mona ongga mimif mimfena ebah ros, beda mifmin mifaga mufora eriaga ni, marenmi ni, jefeda mifmin mifaga erek oska ojgomu. Tina gij mona ongga Allah omfra rifaga insa koma jeska ranggos, beda rimeita rifaga ongga erek ongkoska eteb ojgomu si. Noba gij mona ongga rusnok rinsah rifaga insa koma gij moksu fob, beda rifaga koma onowesa efek deika guru. Tina gij mona ongga Allah omfra rifaga koma jeska ranggos, beda rifaga koma emeita owesa efek eteb si. 44Gij mona ongga mimif manggos, beda rua risah mifaga ongga mebif efen ojgomu. Noba gij mona ongga Allah omfra mifaga jeska manggos fob, beda mimif misma mifaga ongga erek mebaga efen deika. Jeska erek mifmin mifaga ongga angh gu mebif gij mona ebeibeyaif, beda erek koma tein, gij mona kahma bera mifmin mifaga erek toga ongga angh gu mebaga. 45Koma erek mar egens ongga runggu gij Mar Efeyi Ebsi oida, "Allah otunggom Adam ongga sismeni jeskaseda efena ebah." Noba Yesus Kristus, ongga erek Adam ongga osuira, bera erek efena ongga eita eiteij ah gu mimif. Jeska oisouska Ofa bera mimif misma mifaga ongga efeinah jeskaseda miker gu mebaga rot ah aibin ojgomuja. 46Allah eneita mifaga gu mimif jeskaseda mingker gu mebaga sismeni fog guru. Tina ofa eita mifaga koma jeskaseda mingker gu mebif sismeni fog. 47Noba Allah era mebi fogora orotunggom Adam erek osnok egens ongga sismeni. Tina Yesus Kristus, ongga erek Adam ongga egeka, bera en teisis jeska mebaga ojgomu. 48Noba orofosut osnok egens egens bera efen efaga erek Adam efen, jeska rusnok nomnaga runjuj en jeska ofa. Erek koma tein, orofosut osnok egens egens ongga ruroru Yesus Kristus ongga en jeska mebaga fob bera rimeita rifaga erek Ofa efen gu mebaga si. 49Beda koma orocunc rot gu mimif oida ebeibeyaif bera mifmin mifaga kef jeskaseda mingker gu mebif ojgomu. Tina gij mona ongga kahma deika beda mifmin mifaga ongga erek toga jeskaseda mingker gu mebaga ojgomu. 50Edohujia, didif dudou os difesij gu iwa juens deika osok gij mar ongga didif dumftuftu insa koma rot efen ofou. Rusnok rifaga ongga Allah ontunggom gu mebif bera efen mar erek rugufu ni, rufogu ni, jera mar enjgineg tein. Tina enadaij nou rusnok rifaga ringker gu mebaga ongga Allah ofoka ereij keingg jinaga guru. Koma bera, rusnok rifaga ongga ranggos noba ritefa bera rineja riker gu mebaga guru. Jah suma bera mar egema tein enagos era enetefa tein guru. 51Erek koma, tina idou ah keingg rot mar ongga ai juens dimagot rot gu iwa, jeska mar koma bera ah jejema jeska rusnok nomnaga sis fob. Tina ebeibeyaif Allah oncunc mar koma gu mimif fob. Mar koma bera, gij mona ongga Tuhan ongksons en beda rineya jeska mimif mifena ebah ros. Tina mimif nomnaga mimeita mifaga ongga efeinah gij mona insa koma tein si. 52Mar insa koma omorogna keingg mimif ebeirens doska erek moc efnefna era erek miteij efna ebeirens tein. Beda ainsa koma tein bera mimif mimeg mar erek malaikat-malaikat rin manghi mei oga rot okag. Koma erek orois gu rusnok nomnaga rot oida mona ongga enja ejgwaga bera ensaga fob. Noba askesi malaikat-malaikat rin manghi mei ros, beda rusnok ongga Kristen nomnaga ongga ranggos sis fob bera rimedebecki rot rerin rifaga ongga efeinah noba ongga enetefa deika guru. Rifaga koma bera angh rot ah aibin gu mebaga ojgomuja. Fogora mimif ongga mimfena ebah ros bera mimeita mifaga ongga efeinah deika tein. 53Mar insa koma emecira erek koma sismeni fog jeskaseda mimif miferwei mifaga ongga etefa rot mifaga ongga enetefa deika guru. Noba mimif mimeferwei mifaga kef ongga emagos rot mifaga ongga enagos deika guru. 54Gij mona ongga mimif mimferwei mifmin mifaga erek koma fob, beda mar ongga runggu gij Mar Efeyi Ebsi sis fob bera emah gij efera fob si. Mar koma bera agot oida, "Mimif mifaga ouka eteb noba misitit rot muga eteb gu Allah, jeska Ofa omfra mar okum keingg rusnok ongga rufogog rot Ofa fogora rijeseiseifa fob." 55Noba mar egema ongga angh gij Mar Efeyi Ebsi bera agot oida, "Allah onsuwa mimif jeska mar ongga otunggom mimif fogora magos sis fob. Jefeda mimif minemeesa rot manggos deika guru. Jeska mimif tein miker rot mona ongga ah aibin ojgomuja." 56Rusnok rimeesa nou ragos jeska rua rimesma okum rot mar ongga oska ongga rua runtunggom gij mona ongga rifena ebah ros. Noba rua rimesma mar ongga okum koma jeska rua runororu hukum Allah guru. 57Tina mimif muis oufamofa eteb gu Allah jeska mar insa koma nomnaga enecirej mimif deika guru. Jeska mifmin Tuhan Yesus Kristus anggos tumu mega salib nou mimif jeskaseda orosuna rot mifmin mar ongga oska jeska mudou efesi fob. 58Edohuji ongga dudou okora rot, jeska mimif mijginaga rot oida mimedebecki jeska manggos si, jefeda iwa ita idou ahais ojgomu rot mar ongga iwa itunggom nou Tuhan. Iwa ita mar erek koma ojgomuja, jeska iwa ijginaga rot oida mar nomnaga ongga iwa intunggom nou Tuhan bera omofij iwa si. Jeska mar koma bera erek ofoufem ojgomu nou iwa.

will be added

X\