1 Korintus 13

1Ongga oufamofa ekirsa bera iwa idou okora rot rusnok enjgineg. Jeska erek didif difesij mar gij rusnok ruga era malaikat-malaikat oga, tina didif dudou onokora rot rusnok enjgineg guru, beda dedin diteij ah bera erek oska ojgomu ros. 2Noba erek didif dedin owesa efek jeskaseda danggot rot mar ongga Allah oncunc gu didif gij dudou efesi gu rusnok enjgineg ni, era dudou ebriyi eteb gij mar ongga en jeska Allah ongga angh endemi jeska rusnok enjgineg ros tein ni, era dudou efesis rot mar ofoukou doska ni, era dudou ororu Allah rot ahais doska fogora direjgei Ofa rot mar ongga eteb, beda Ofa otunggom mar koma ojgomu ni, erek didif dita mar insa koma nomnaga, tina dudou onokora rot rusnok enjgineg guru, beda didif dunok dufoka gij jinaga guru. 3Erek koma tein, erek didif dikeba dedin mareibra nomnaga gu rusnok ongga rufojingki ni, noba didif daha disinsa jeskaseda dita difera okora rot Allah oga ni, tina dudou onokora rot rusnok enjgineg guru, beda didif dinesma dufons jeska Allah rot mar insa koma nomnaga jinaga guru. 4Rusnok ongga rudou okora rot rusnok enjgineg bera ruin keingg risinsa rudou efesi rot rua. Noba rudou eriagamaga rot rua tein. Rua rudou eneftirir keingg rot rusnok enjgineg rerin mareibra guru ni, rua runofra risinsa rufoka erek aksa guru ni, rua rinesitit risinsa rifaga rot mar tein guru ni, 5rua runofos efek rot rusnok enjgineg guru ni, rua runohca mareibra rot risinsa ojgomuja guru ni, rerin rifena onosok ebeirens rot mar ongga rusnok enjgineg ranggot guru ni, rua rinedemdemi mar ongga oska ojgomuja gij rudou efesi rot rusnok enjgineg guru ni, 6rua runotut rot rusnok ongga rutunggom mar ongga oska guru, tina rudou okora rot rua ojgomu ni, rudou efaga ouka rot rusnok ongga rutunggom mar ongga oufamofa ojgomu ni, 7rua ruin keingg risinsa rudou efesi rot mar ongga rua ringk jeska rusnok enjgineg ongga rua rusujohu rot bera oida erek oska ni, rua rudou eredi rot oida rerin ruhujir rumotunggom mar ongga oufamofa ojgomu ni, rua tein ruisum gij rot oida rerin ruhujir insa koma rumororu mar ongga oufamofa odudu ni, rua rudou eneskes rot rusnok guru, tina rudou okora rot rua ojgomuja ni. 8Mona ongga rusnok rudou omokorema bera onoisa guru, tina ecira rot mona ongga ah aibin ojgomuja. Noba ebeibeyaif rusnok risma owesa efek jeskaseda ragot rot mar ongga Allah oncunc gu rua gij rudou efesi skoita rusnok enjgineg tein. Tina gij mona kahma bera mar insa koma tein omoisa soska ojgomu. Noba ebeibeyaif rusnok risma owesa efek jeskaseda rifesij mar gij oga egens ongga rua risinsa rinejginaga rot enesi. Tina gij mona kahma, beda rusnok runocosu rot mar insa koma deika guru. Ebeibeyaif rusnok risma rudou ongga efesis eteb gij mar jeskaseda ruftuftu Allah efen rusnok osok gij meidu ongga Ofa ontunggom nou rua. Tina gij mona kahma bera rusnok runoftuftu rot mar insa koma deika guru. 9Jeska ebeibeyaif bera mar ongga mudou ebriyi gij rot Allah bera erek oskiyai ojgomu ros. Noba mar ongga Allah oncunc gu rusnok jeskaseda rua ragot rot gu rusnok enjgineg tein bera erek oskiyai ros. 10Tina gij mona ongga Allah ontunggom mar nomnaga jeskaseda ah jeni erek Ofa odou os rot, beda owesa efek koma ongga Allah eita gu rusnok egens egens gij mona ebeibeyaif bera munocosu rot deika guru. Jeska gij mona insa koma bera mudou emebriyi gij mar insa koma nomnaga si. 11Didif dudou os durocunc rot mar ongga dinagot ainsa kef. Sis mona ongga didif duforokai ros bera didif danggot mar erek ruforokai ranggot mar ojgomu ni, didif dusujohu rot mar gij dudou efesi tein erek ruforokai rusujohu rot mar ojgomu ni, dudou ebriyi gij mar erek ruforokai rudou ebriyi gij ojgomu ni. Tina ebeibeyaif bera didif durna fob, jefeda didif dineita mar insa koma nomnaga erek ruforokai rita deika guru. 12Koma tein erek kansinam ongga osnok egens ek efena gij. Tina kansinam koma erek ofumfumf, jefeda ofa enek efena rot koisoisa guru. Erek koma rot mimif ongga ebeibeyaif tein. Mimif minejginaga rot Allah erek koisoisa enesi. Tina gij mona kahma bera mimif mudou emebriyi gij mar nomnaga si. Jeska ebeibeyaif mudou enebriyi gij mar nomnaga enesi. Tina gij mona kahma bera mudou emebriyi eteb gij Allah, erek ofa odou ebriyi eteb gij mimif ebeibeyaif. 13Jefeda onjoros mona insa koma bera mimif mita mar ofoka orgomu ongga erek ofoufem ekirsa jeska mar nomnaga. Koma bera, mimif mudou ororu Allah rot tenten ojgomuja ni, noba mimif muisum gij Ofa rot mar nomnaga ongga Ofa anggen rot nou mimif ojgomuja ni, noba mudou omokorema ojgomuja ni. Noba mar egens ongga ekirsa jeska mar orgomu insa kef bera, mimif mudou omokorema ojgomuja.

will be added

X\