1 Korintus 11

1Iwa iroru mar ongga didif duntunggom ojgomuja erek didif duroru mar ongga Kristus ontunggom sismeni gij mona ongga Ofa engker gu mebif ros. 2Didif dudou eskeira eteb rot iwa jeska idou ah keingg rot mar nomnaga ongga didif duncunc gu iwa sis fob. Noba iwa tein inroru mar koma nomnaga ongga didif dumftuftu rot gu iwa sis fob. 3Tina, didif dudou os jeskaseda iwa tein idou ebriyi gij rot teinefa rusnok rugif gu Allah rot tenten. Koma bera, runer rugif gu Yesus Kristus erek rerin ebirfaga. Noba rujager rugif gu rahiner erek rerin ebirfaga. Noba Kristus ougif gu Allah erek efen ebirfaga. 4Erek koma tina, orofosut orna egens ongga om eiteij gu Allah jah gu rusnok rufoukou efekesa, era agot rot mar ongga Allah oncunc gu ofa gij odou efesi gu rusnok enjgineg, beda ofa energi meifeti era topi tumu ebirfaga guru. Jeska koma erek ofa oh mojen gu Kristus ongga erek efen ebirfaga. 5Erek koma tein, orofosut ojaga egens ongga om eiteij gu Allah era agot rot mar ongga Allah oncunc gu ofa gij odou efesi gu rusnok rufoukou, tina ainsa koma tein ofa energi meifeti tumu ebirfaga guru, beda koma tein erek oska. Jeska ororu mifmin erebent gij mona insa kef bera mar ongga ofa ontunggom insa koma bera erek orocunc rot ojaga egens ongga ensiri jera egema efen mahina. Jefeda rujager rira meifeti ruround joug ribirfaga ojgomu. 6Didif dagot rot erek koma jeska erek ojaga egens energi meifeti tumu ebirfaga guru, beda koma bera oska morototuma erek ojaga egens ongga rusnok rahkena ebirfaga efeji nomnaga jeska fob ojgomu. Jefeda ongga oufa ekirsa bera, rujager rirgi meifeti joug ribirfaga gij mona ongga rua rugif gu Allah ojgomu. 7Tina, gij mona ongga runer rum riteij gu Allah, beda rinergi meifeti era topi joug ribirfaga guru. Beda rusnok nomnaga rimek rua fogora rumofra Allah ofoka erek aksa eteb. Jeska Allah ontunggom runer koma erek ereni jeni esinsa ojgomu. Tina gij mona ongga rujager rum riteij gu Allah, beda rua rirgi meifeti tumu ribirfaga ojgomu. Beda rusnok rimek rua tein fogora rumofra rerin rahiner rufoka erek aksa. Jeska koma orocunc rot oida rua rugif gu rerin rahiner. 8Erek koma jeska runa rinen jeska rujaga sismeni fog guru, tina rujaga rin jeska runa sismeni fob. 9Noba Allah onotunggom orna egens ongga sismeni koma jeska ojaga ocosu rot ofa guru. Tina Ofa otunggom ojaga ongga sismeni koma jeska orna bera ocosu rot ofa ojgomu. 10Erek koma jefeda rujager rirgi meifeti joug ribirfaga erek orocunc rot oida rua rugif gu rerin rahiner ojgomu. Noba malaikat-malaikat ongga riajga joug rusnok bera rimek oida rujager insa koma rugif gu rerin rahiner ojgomuja. 11Erek koma tina, osok gij rusnok ongga ruroru Tuhan bera ojaga onot gu esinsa guru, tina ofa oisum gij orna ojgomu. Noba orna tein onot gu esinsa guru, tina ofa tein oisum gij ojaga koma ojgomu. 12Jeska, erek didif danggot insa koma gu iwa oida, rujaga rin jeska runa rot sismeni. Tina ebeibeyaif bera runer rin jeska rujaga. Noba Allah esinsiyai bera ontunggom gegeka tein. 13Jefeda ahah didif diteij bera adaij nou iwa isinsa yuga ojga rot oida rujager ongga rum riteij gu Allah gij Mod Ari bera rira meifeti ruround joug ribirfaga ojgomu. 14Mimif musujohu rot oida runer ongga rerin ribirfaga efeji akseij bera ruroh mojen rot risinsa ojgomu. 15Tina erek rujager rerin ribirfaga efeji ongga akseij, beda mimif musujohu rot oida koma erek ongkoska eteb rot rua. Jeska Allah ontunggom rujager rerin ribirfaga efeji akseij jeskaseda ereij keingg ribirfaga nomnaga. 16Noba erek rineya ruga omosokuma rot mar insa koma, beda didif dagot rot oida memef era rusnok ongga Mod Ari enjgineg nomnaga tein mefmen erebent ongga erek koma ojgomu. Koma bera, rujager rirgi meifeti joug ribirfaga efeji gij mona ongga rua rum riteij gu Allah gij Mod Ari ojgomu. Memef bera mefmen erebent ongga toga jeska mar koma guru. 17Ebeibeyaif didif dudou os duftuftu iwa rot teinefa iwa isejah nou ikeba roti jera ij anggur efei morototuma. Tina osok gij mar insa koma bera didif dinesitit iwa rot guru. Jeska gij mona ongga iwa imohoturuma rot mar insa koma, beda iwa ineita mar koma rot iskusk enesi. Tina ongga okum ekirsa bera iwa ita mar ongga oska gij mona insa koma tein ojgomuja ros. 18Ongga sismeni bera, didif dig rot oida gij mona ongga iwa imohoturuma nou ikeba roti jera ij anggur efei morototuma, beda yuga omosokuma fogora imekebema gij ebic egens egens gu isinsa ojgomuja. Noba didif dusujohu rot oida mar koma ongga didif dig bera erek tenten ojgomu. Tina koma erek oska eteb. 19Jeska iwa imekebema gij ebic egens egens erek koma jeskaseda irocunc rot oida yeyin ebic egens koma bera tenten ei, noba ebic egema koma bera oska ojgomu ei! 20Jefeda, gij mona ongga iwa imohoturuma jeskaseda ikeba roti jera ij anggur efei, beda iwa isujohu rot oida koma bera erek ireisisi keingg isinsa rot mar ongga Tuhan ontunggom nou iwa sis fob. Tina iwa ineita mar koma rot tenten guri. Jeska gij mona insa koma bera iwa ita mar erek oska ojgomuja ros. 21Didif dagot erek koma jeska gij mona insa koma bera ineya idou eftirir keingg maat ofoukou ongga imorka fogora iwa it maat koma nomnaga gu isinsa ojgomu. Beda rineya ongga rufojingki rudou os rint maat, tina maat enadaij nou rua tein guri. Noba ineya inekeba yeyin anggur efei guru, tina iwa ij anggur efei koma nomnaga gu isinsa onjoros ibirfaga erebibei rot ojgomo. 22Wah, erek mosona ongk iwa beda iwa it maat jera ij anggur efei gij yeyin mod ojgomu, tina gij mona ongga iwa imohoturuma bera guru. Jeska iwa itunggom mar erek koma beda koma erek iwa yuga oruh rua ongga Kristen noba yuh mojen gu rua ongga rufojingki tein ojgomu. Beda iwa isujohu rot oida didif dimesitit iwa rot mona ongga iwa imohoturuma erek koma ei? Wah, menesitit iwa rot mar koma jinaga guru! 23Didif dagot mar erek koma, jeska mar ongga ai juens dumocunc gu iwa bera Tuhan oncunc gu didif sis fob. Koma bera, gij motu ongga Yudas odou emekikif jeska Yesus noba ocunc Ofa gu rusnok ongga rufogog, beda Yesus engker morototuma jera efen ruforoker rufok setka kungkob erfeka. Beda Ofa eita roti ofog egens. 24Noba Ofa ois oufamofa eteb gu Allah fogora Ofa etka roti koma. Beda Ofa agot gu efen ruforoker oida, "Roti kef bera erek difaga ongga didif dimaha gu rusnok ongga rufogog jeskaseda iwa imesma eiteij ah ongga efeinah. Gij mona kahma deika, beda iwa tein itka roti erek koma fogora it jeskaseda ireisisi keingg isinsa osok gij mar ongga Didif duntunggom nou iwa ojgomu." 25Erek koma beda nou ongga rua rint maat oisa fob, beda Ofa eita mok osku rot anggur efei noba agot gu rua oida, "Anggur efei ongga angh gij mok osku kef bera erek orocunc rot dedin dugufu ongga emeya nou iwa. Noba koma tein bera orocunc rot gu iwa oida mona efeinah ongga Allah anggen rot sis fob bera ecira fob. Gij mona kahma deika, beda iwa ij anggur efei erek koma jeskaseda ireisisi keingg isinsa osok gij mar ongga Didif duntunggom nou iwa." 26Noba orofosut mona ongga iwa itka roti noba ij anggur efei morototuma erek insa koma, beda koma erek orocunc rot Tuhan Yesus ongga anggos tumu mega salib nou mimif. Iwa itunggom mar erek koma ojgomuja onjoros mona ongga Ofa ongksons en. 27Erek koma jefeda, idu ongga ent roti jera enj anggur efei koma jeskaseda ereisisi keingg esinsa rot mar ongga Tuhan Yesus ontunggom nou ofa, tina ofa otunggom mar koma erek ebireira ojgomu, beda koma erek ofa oga oruh Tuhan Yesus ongga efen ogufu eya tumu mega salib nou mimif fob. 28Ongga tenten bera, orofosut osnok egens ongga odou os et roti jera ej anggur efei morototuma jera rusnok enjgineg jeskaseda ereisisi keingg esinsa rot Tuhan Yesus, beda ofa ohca joug odou efesi sismeni fog rot mar koma efen ofou nou rusnok ojgomu. Noba erek ofa osujohu rot oida kef bera erek mar ongga ofoufem ei, beda ofa et noba ej morototuma jera rua insa koma ojgomu. 29Tina erek ofa ent roti jera enj anggur efei morototuma jera rusnok enjgineg, noba ofa onohca joug odou efesi rot mar koma sismeni fog guru, beda Allah omofra mar okum eteb keingg ofa rot si. 30Noba, jeska rusnok rufoukou gu ifekesa rita mar erek ongga oska erek insa koma ros, jefeda rineya ongga marenir, noba rineya ongga ranggos fob. 31Tina erek mimif muhca joug misinsa mudou efesi sismeni fog rot mar insa koma, beda Allah onofra okum keingg mimif rot guru. 32Erek koma tina, Tuhan emera mar okum fogora omoroftuftu mimif ojgomu. Ofa omotunggom mar erek koma jeskaseda mimif mineja jah mahmei morototuma jera rusnok ongga rudou okoja Allah guru. 33Erek koma jefeda, edohuji, gij mona ongga iwa imohoturuma jeskaseda it roti jera ij anggur efei erek ereisisi keingg isinsa rot Tuhan Yesus, beda iker joug onjoros rusnok nomnaga riramecinma fog, fogora iwa imet maat koma morototuma. 34Noba erek rineya jeska iwa ongga mosona ongk rua gij mona insa koma, beda rua rit maat gij rerin mod efesi sismeni fog ojgomu. Jeska erek rua ruhoturu morototuma jera iwa jeskaseda rit maat ofoukou ojgomu, beda Allah omofra mar okum keingg rua rot mar insa koma si. Noba gij mona ongga didif dinja jah suma, beda didif dumoftuftu mar deika gu iwa.

will be added

X\