ማቲዎሴ 8

1ዬሱሴ ዹካፓ ኬዴ ዎዶና ሚርጌ ዴሬ ዒዛ ጊንጾ ሙኬኔ። 2ዬኖና ፔቴ ዑስካ ኬስካ ዶርዓ ዓርቄ ዓሲስኬይ ዬሱሴ ኮይላ ሙኪ ባሊቲና ሳዓ ሎኦማዖ፦ “ጎዳሢዮ! ኔ ኮዔቴ ታና ጌኤሻኒ ዳንዳዓኔ!” ጌዔኔ። 3ዬሱሴ ዒዛኮ ዑጾ ዓርቃዖ፦ “ጌኤሽኬ! ኔ ጌኤሽካንዳጉዲ ታ ኮዔኔ” ጋዓዛ ዬይ ዓሢ ቤዞና ዶርዓሢዳፓ ዻቂ ጌኤሽኬኔ። 4ዬካፓ ዬሱሴ፥ ዬኖ ዶርዔሎይዳፓ ዻቂ ጌኤሽኬ ዓሢም፦ “ሃያ ባኮ ዖኦማኣ ኬኤዚፖ፤ ጋዓንቴ ሃሢ ዓኣዺጋፓ ኔኤኒ ጌኤሽኬሢ ቄኤሳሢም ዻዌ፤ ሃሣ ቢያሢም ማርካ ማዓንዳጉዲ ኔኤኮ ዶርዓሢዳፓ ፖዒፆ ዛሎ ሙሴ ዓይሤ ዒንጎ ባኮ ፆሲም ዒንጌ” ጌዔኔ። 5ዬካፓ ዬሱሴ ቂፒርናሆሜ ካታሞ ጌላዛ ፄኤቶ ፖኦሊሶ ዓይሣ፥ ፔቴ ሮሜ ዓጪ ዓሲስኬይ ዒዛ ኮይላ ሙካዖ፦ 6“ጎዳሢዮ! ታኣኮ ማዻሢ ሓርጊንቲ ዎቢ፥ ሚርጌ ሜታዺ ጋራ ላሂ ዓኣኔ ታና ማኣዴ” ጌዒ ሺኢቄኔ፤ 7ዬሱሴ ማሃዖ፦ “ታ ዒዛ ሙኪ ፓሣንዳኔ” ጌዔኔ። 8ፖኦሊሶ ዓይሣሢ ጋዓንቴ፦ “ጎዳሢዮ! ታ ማኣሪ ኔ ጌላኒ ታ ጊኢጋ ዓሲቱዋሴ፤ ዬያሮ ሃካ ዓኣዖ ፔቴ ባኣዚ ጌዔ፤ ታኣኮ ማዻሢ ፖዓንዳኔ፤ 9ታኣኒ ታ ቶኦኪና ዎይሣ ዓሲም ዓይሢንታያ ሓሣ ታ ዴማ፥ ታኣም ዓይሢንታ ፖኦሊሴ ዓኣኔ፤ ዔያቶይዳፓ ፔቴሢ ‘ዴንዴ!’ ታ ጋዓዛ ዴዴንዳኔ፤ ባጋሢ ሃሣ ‘ሃኒ ዬዔ!’ ታ ጋዓዛ ሙካኔ፤ ታኣም ማዻሢ ‘ሃያ ታኣም ማዼ!’ ታ ጋዓዛ ዒ ማማዻኔ” ጌዔኔ። 10ዬሱሴ ዬያ ዋይዜ ዎዶና ዲቃቲ ሄርሻዖ ዒዛና ዎላ ዓኣዻ ዓሶ ኮይላ፦ “ጎኔ ታ ዒንሢም ጋዓኔ፤ ሃያ ጉዴ ዼኤፒ ጉሙርቂሢ ዓኣ ዓሲ ፔቴታዖ ዒስራዔሌይዳታዖ ታ ዴንቂባኣሴ። 11ዔሩዋቴ፤ ሚርጌ ዓሲ ዓባ ኬስካ ዛሎና ጌላ ዛሎናይዳፓ ሙኪ ዓብራሃሜና ዪሳቄና ሃሣ ያይቆቤና ዎላ ጫሪንጮ ካኣቱሞይዳ ሙዓኒ ዴዓንዳኔ። 12ጫሪንጮ ካኣቱሞም ጊኢጊንቴያታዖ ዙሎ ዹሞ ቤዛ ኬኤሪንታንዳይ ዓኣኔ። ዬካ ዬና ዓሳ ዬኤኪ ዓቺ ዻዓንዳኔ” ጌዔኔ። 13ዬካፓ ዬሱሴ ፄኤቶ ፖኦሊሶ ዓይሣሢም፦ “ዴንዴ፥ ኔ ጉሙርቄሢጉዲ ማዖንጎ” ጌዔኔ። ዬያ ዓሢኮ ማዻሢ ዬማና ፖፖዔኔ። 14ዒማና ዬሱሴ ጲፂሮሴ ማኣሪ ጌላዖ፥ ጲፂሮሴኮ ባይሳ ቆፂንቲ ላሂ ዓኣንቴ ዴንቂ፥ 15ዒዞኮ ኩጮ ዒ ካኣማዛ ቤዞና ቆሣ ዒዞኮ ሃይቄም ዔቂ ዒዛ ሾኦቺንሤኔ። 16ዬካፓ ሳዓ ዓማዛ፥ ዓሳ ፑርታ ዓያና ዓርቄ ሚርጌ ሃርጌ ዓሲ ዬሱሴ ኮይላ ዔኪ ሙካዛ ‘ኬስኬ’ ጌይሢና ሌሊ ፑርቶ ዓያኖ ኬሴም ሃርጊንቴ ዓሳ ቢያ ፖዔኔ። 17ዬያይዲጾና ፆሲ ማሊጾ ኬኤዛ ዒሲያሴ ዛሎና፦ “ዒዚ ኑኡኮ ዶርዓሢ ዔኪ ኑ ጊዳፓ ዳኬኔ” ጌይንቴሢ ኩሜኔ። 18ዬሱሴ ሚርጌ ዓሲ ዒዛ ኮይላ ቡኪ ዓኣሢ ዛጋዖ ዒዛኮ ጊንጾ ሃንታዞንሢ ባዞኮ ሶ ሱኮ ፒንቃንዳጉዲ ዓይሤኔ። 19ዒማና ፔቴ ሙሴ ዎጎ ዔርዛ ዓሲ ዒዛ ባንሢ ሙካዖ፦ “ዔርዛሢዮ! ኔ ዓኣዻ ቤዞ ቢያ ታ ኔኤና ዓኣዻንዳኔ” ጌዔኔ። 20ዬሱሴ ማሃዖ፦ “ዉኡካሢኮ ዎርቆ ዔቴ፤ ካፖኮ ሃሣ ማኣሪ ዓኣኔ። ዓሲ ናዓሢ ጋዓንቴ ላሂ ሃውሻንዳ ቤሲታዖ ባኣሴ” ጌዔኔ። 21ዒዛኮ ጊንጾ ሃንታዞንሢዳፓ ፔቴይ፦ “ጎዳሢዮ! ቤርታዺ ታ ዴንዲ ታ ዓዴ ሃይቄም ዱኡኪ ሙኮም” ጌዔኔ። 22ዬሱሴ ማሃዖ፦ “ኔኤኒ ታ ጊንጾ ሙኬ፤ ሃይቄ ዓሳ ሃይቄ ዓሶ ዱኡካንዳጉዲ ሃሼ” ጌዔኔ። 23ዬካፓ ዬሱሴ ዒዛኮ ጊንጾ ሃንታዞንሢና ዎላ ዋኣፆና ፒንቆ ጎንጎ ቶጊ ዴንዴኔ፤ 24ዬማና ዔርቲባኣ ዼኤፒ ባዚ ጉዳ ዔቂ፥ ዋኣፆና ፒንቆ ጎንጌሎ ዋኣፆ ኩንሢ፥ ዔኤዺሳኒ ዑኪ ሜታሴኔ፤ ዬሱሴ ጋዓንቴ ዒማና ጊንዒ ዓኣኔ። 25ዒዛኮ ጊንጾ ሃንታ ናኣታ ዒዛ ጴቻዖ፦ “ጎዳሢዮ! ኑ ኩዴኔ፥ ኑና ዓውሴ” ጌዔኔ። 26ዬሱሴ ዒማና፦ “ሓይ ዒንሢ ጉሙርቂጻ ፓጬ ዓሳ፥ ዓይጎሮ ዒንሢ ሃያይዲ ዒጊጬይ!” ጋዓዖ፥ ዔቂ ዢባሮና ዼኤፖ ጉዳሢና ጎሬም ቤዞና ቢያ ባካ ዚቲዮ ጌዔኔ። 27ዓሳ ጋዓንቴ ሚርጌና ዲቃቲ ሄርሻዖ፦ “ሃይ ዢባሮንታ ባዞንታ ቢያ ዓይሢንታሢ ዎዚጉዴ ዓሲዳይ?” ጌዔኔ። 28ዬሱሴ ጌሊላ ባዞና ፒንቂ ጌርሴኖኔ ዓጮ ሙካዛ ዒኢካ ፑርታ ዓያና ዓርቄ ላምዖ ዓሲ ዱኡፒ ካይዚዳፓ ኬስኪ ዒዛና ካኣሜኔ፤ ዬንሢ ሚርጌና ፑርታ ዓሲ ማዔሢሮ ዓይጎ ዓሲያ ዬኖ ጎይጾና ዓኣዻኒ ዳንዳዑዋያኬ። 29ዔያታ፦ “ፆሲ ናዓሢዮ! ኑኡና ዎላ ኔኤኮ ዓይጌ ዓኣይ? ዎዳ ሄሉዋንቴ ኔ ኑና ሜታሳኒ ሙኪያ?” ጌዒ ጌዒ ዒላቴኔ። 30ዔያታ ዓኣ ቤዛፓ ዻካ ሃኬ ዺቢ ቆሎ ጉዱንሢ ሄንቃኔ። 31ፑርቶ ዓያኖንሢ ዬሱሴ ኮራ፦ “ኔ ኑና ኬሳያ ማዔቴ፥ ሃሴኬ ጉዱንጾይዳ ኑ ጌላንዳጉዲ ኑና ዓይሤ” ጌዒ ዒዛ ሺኢቄኔ። 32ዬሱሴያ፦ “ዴንዱዋቴ!” ጋዓዛ፥ ፑርቶ ዓያኖንሢ ዓሶንሢዳፓ ኬስኪ ጉዱንፆይዳ ጌላዛ፥ ጉዱንጻ ቢያ ዔያታ ሄንቃ ማጎ ዓጮይዳፓ ዲርጊ ባዞይዳ ጌሊ ሙይንቴኔ። 33ጉዱንጾ ሄንቃ ናኣታ ጳሽኪ ካታሞ ዴንዳዖ፥ ማዔ ባኮ ቢያ ሃሣ ፑርቶ ዓያኖና ዓርቂንቴ ዓሶንሢዳኣ ማዺንቴ ባኮ ኬኤዜኔ። 34ዬካፓ ካታሞ ዓሳ ጉቤ ዬሱሴ ዛጋኒ ካታማፓ ሙኪ ዒዛ ዴንቃዖ ዔያቶኮ ዓጫፓ ዒ ኬስኪ ዓኣዻንዳጉዲ ዒዛ ሺኢቄኔ።

will be added

X\