1 ፔቴ ኬሊ ጴፂሮሴና ዮሓኒሴና ፆሲ ሺኢቆ ዎዳ ሄሌም ጌኤዦ ማኣሪ ዓኣዼኔ፤ ዬና ዎዳ ማሢ ዶምቦልሳ ዎዴ ማዓኣናኬ። 2 ዒማና ጌኤዦ ማኣሮ ጌሎ ካራ “ሚዛጲ ካራ” ጌይንታ ቤሲ ዓኣኔ፤ ዒዞ ቤዜሎይዳ ሾይንቴማፓ ዓርቃዖ ዎቦ ማዔ ዓሲ ዓኣኔ፤ ዬያ ዓሢ ዓሳ ቢያ ኬሊ ዔኪ ሙኪ ሙኪ ዒኢካ ጌሣኔ፤ ጌሤስካፓ ዒዚ ዒኢካ ዴዒ ጌኤዦ ማኣሮ ጌላ ዓሳ ዒዛም ዔኤቢ ዒንጋንዳጉዲ ሺኢቃኔ። 3 ጴፂሮሴና ዮሓኒሴና ጌኤዦ ማኣሪ ጌላሢ ዬይ ዓሢ ዛጋዖ ዔኤቢ ዒንጎም ዔያቶ ሺኢቄኔ። 4 ዔያታ ጋዓንቴ ዓሢ ኮሺ ዛጌስካፓ ጴፂሮሴ ዓሢ ኮራ፦ “ሂንዳ ኑ ባንሢ ዛጌ” ጌዔኔ። 5 ዎቦ ዓሢ ጋዓንቴ ታኣም ዔኤቢ ዒንጋንዳሲኑዋይ ጌዒ ኮሺ ዔያቶ ዛጌኔ። 6 ጴፂሮሴ ጋዓንቴ፦ “ቢራና ዎርቄና ታኣኮ ባኣሴ፤ ታኣኮ ዓኣማ ታ ኔም ዒንጋንዳኔ፤ ‘ናዚሬቶ ዬሱስ ኪሪስቶሴ ሱንፆና ዔቂ ሃንቴ’ ” ጌዒ፥ 7 ሚዛቆ ኩጮ ዓሢኮ ዓርቂ ዔቂሴኔ፤ ዓሢኮ ቶኮና ጪጊጮና ቤዞማና ዶዴም፥ 8 ላዓ ጌዒ ዔቂ ዔያቶና ዎላ ሓንቲ ጌኤዦ ማኣሪ ጌሌኔ፤ ሴካ ሓንጋ ጌዒያ ሃንቲ ሃንቲ ሓሣ ኮኦሚ ኮኦሚ ፆሲ ጋላቴኔ። 9 ዓሳ ቢያ ዒዚ ፆሲ ጋላቲ ጋላቲ ሃንታሢ ዛጌኔ። 10 ጌኤዦ ማኣሮ ጌሎ ካራ “ሚዛጲ ካራ” ጌይንታ ቤዛ ዴዒ ሺኢቃሢ ዒዛ ማዔሢያ ዔያታ ዔሬኔ፤ ሓሣ ዒዛይዳ ማዺንቴ ባኮ ዛጋዖ ዲቃቲ ሄርሺሢ ዓርቄኔ። 11 ዬይ ዻቄ ዓሢ ጴፂሮሴና ዮሓኒሴናይዳፓ ታ ዱማዻዓ ጌዒ ዴንዶ ዒፂ “ሴሎሞኔ ዴማ ሃንታ፥ ዼኤፖ ዛምፓሢ” ጌይንታ ቤዞይዳ ዓኣንቴ፥ ዓሳ ዲቃቲ ሄርሺሢና ዒዞ ቤዜሎ ዔያቶ ባንሢ ጳሽኪ ሙኬኔ፤ 12 ጴፂሮሴ ዓሶ ዛጋዖ፦ “ዒስራዔሌ ዓሲዮቴ! ሓያ ባኮ ዒንሢ ዓይጎሮ ዲቃቲ ሄርሻይ? ዓይጎሮ ዒንሢ ሓያይዲ ፔቶ ጊዥ ጌዒ ኑና ዛጋይ? ኑኡኒ ሓያ ዓሢ ኑ ዎልቄና ሓሣ ኑ ኮሺ ማዻያ ማዒ ዔቂሲ ሃንቲሴያ ዒንሢ ኮራ ማላ? 13 ጋዓንቴ ዓብራሃሜኮ፥ ዪሳቄኮ፥ ያይቆቤኮ ፆዛሢ ሓሣ ቤርታኣ ኑ ዓዶንሢ ፆዛሢ ፔኤኮ ናዓሢ ዬሱሴ ቦንቼኔ፤ ዒንሢ ጋዓንቴ ዒዛ ሓይቃንዳጉዲ ጲላፆሴም ዓኣሢ ዒንጌኔ፤ ጲላፆሴ ዒዛ ሓሻኒ ኮዓዛ ዒንሢ ‘ኑ ዒዛ ኮዑዋሴ’ ጌዔኔ። 14 ዒንሢ ጌኤዣሢና ፂላሢ ማዔሢ ‘ኑ ዒዛ ኮዑዋሴ’ ጌዒ ፔቴ ዓሶ ዎዼ ዓሢ ቡሊንታንዳጉዲ ጲላፆሴ ኮራ ዒንሢ ሺኢቄኔ። 15 ዒንሢ ሼምፖ ዒንጋያ ማዔሢ ዎዼንቴ፥ ፆሲ ዒዛ ሓይባፓ ዔቂሴኔ፤ ዬያ ባኮኮ ኑኡኒ ሓሢ ማርካኬ። 16 ሓይ ሓሢ ዒንሢ ዛጋ ዓሢ፥ ቤርታኣ ዒንሢ ዒዛ ዔራ ዓሢ ዻቂ ዶዴሢ ዬሱሴ ሱንፆና ጴዼ ጉሙርቂሢናኬ፤ ዬሱሴ ሱንፆ ጉሙርቂፆና ዒንሢ ቢያሢኮ ቤርቶይዳ ዻቂ ዓሲ ማዒ ዒዚ ጴዻኔ” ጌዔኔ። 17 ጴፂሮሴ ሓሣ ኬኤዛዖ፦ “ዒሾንሢዮቴ! ዬሱሴይዳ ዒንሢ ማዼ ባኮ ዒንሢኮ ሱኡጎ ጉዲ ዒንሢያ ዔሩዋዖ ማዼሢ ታ ዔራኔ። 18 ፆሲ ጋዓንቴ ዬያ ማዼሢ ‘ዒዛም ዱማዼ፥ ሜሲሔ ሜቶ ዔካንዳያ ኮይሳኔ’ ጌይንቲ ፆሲ ማሊፆ ኬኤዛ ዓሶ ዛሎና ኬኤዚንቴሢ ኩማንዳጉዲኬ። 19 ዓካሪ ጎማ ዒንሢኮ ዓቶም ጌይንታንዳጉዲ ጎሞ ቡኡፁዋቴ፤ ፆሲ ባንሢያ ማዑዋቴ፤ 20 ዬያይዴቴ ዒንሢም ጎዳይዳፓ ዓያና ዛላና ዶዲሢ ዎዴ ሙካንዳኔ፤ ፆሲ ቤርታዺ ዒዛ ዶኦሬ ሜሲሔያ ዒንሢም ዳካንዳኔ። 21 ዒዚ ጫሪጮይዳ ዴዓኒ ኮይሳሢ ጌኤሺ ማዔ፥ ፆሲ ማሊፆ ኬኤዛ ዓሶ ዛሎና ፆሲ ቤርታዺ ኬኤዜሢጉዲ ዓጪ ካራና ቢያ ዓካዻንዳ ዎዳ ሄላንዳኣናኬ። 22 ሙሴያ ኬኤዛዖ ‘ፆሲ ታና ኬሲ ዒንሢም ኬኤዚሳሢጉዲ ዒንሢኮ ጌርሲንሢ ባኣካፓ ፆሲ ማሊሢ ኬኤዛያ ኬሳንዳኔ፤ ዬይ ኬኤዛ ባኮ ቢያ ዋይዙዋቴ፤ 23 ዬይ ፆሲ ማሊፆ ኬኤዛሢ ኬኤዛ ባኮ ዋይዙዋይ ቢያ ዴራፓ ዱማዺ ባይቆንጎ’ ሂዚ ጌዔኔ። 24 ፆሲ ማሊፆ ኬኤዛ ሳሙዔሌይዳፓ ዓርቂ ፆሲ ማሊፆ ኬኤዛ ዓሳ ቢያ ሓኖ ዎዶ ዛሎ ኬኤዜኔ። 25 ፆሲ ማሊፆ ኬኤዛ ዓሶ ዛሎና ኬኤዚንቴ ሓጊ ማዓንዳ ዎዛ ዒንሢሮኬ፤ ዬያ ጉዲ ፆሲ ዓብራሃሜም ‘ሳዖይዳ ዓኣ ዴራ ቢያ ኔ ዜርፆና ዓንጂንታንዳኔ’ ጌዒ ኑኡኮ ዓዶንሢና ዎላ ጫኣቄ ጫኣቁማ ዒንሢማኣ ማዓያኬ፤ 26 ዬያሮ ፆሲ ቤርታዺ ፔ ናዓሢ ዳኬሢ ዒንሢምኬ፤ ዬያ ፆሲ ማዼሢ ዬይ ናዓሢ ዒንሢ ፔቴ ፔቴሢ ፑርቶ ጎይፃፓ ማሂ ሓሣ ዒንሢ ዓንጃንዳጉዲኬ” ጌዔኔ።
