Efêse 6 - Mambila for Cameroon - 2001 Edition - Bible.is

1 Bí bɔ̀ huaán, seé bi`i toò Fehtoò beèh né sòn bɔ̀ tele bi`i mé meí bi`i ŋgweê, te dilí ye. 2 Né te mvù Càŋe ménâ nyagá den ndɔ, ye: Ŋgwé sòn tele yeè mé meí yeè ma. Bèh joloò Càŋ dé toò jɔ̀gɔ̀ mé ndéb né teèn baá ye bú hên, 3 ye mɔ wò né mân bɔɔ́, wò nde né samésé den, cieé yeè maga ye ká te wɔ́ŋe ndɔ. 4 Mé bí bɔ̀ tele huaân ndɔ, bí té bɔ̀ huaán temé bɔ́ yúlá, bí léb sér bɔ́ ndéb, bí né bɔ́ mé temé Fehtoò beèh lè soró nyegé. 5 Bí bɔ̀ kwer, bí ŋgwé sòn bɔ̀ tele seê bi`i, bí vèh bɔ́ veèh, bí né toò bɔɔ̀n lòù ndelé seér. Bí bɔ́ lòm seé bɔɔ̀n mé temé cén faá né seé Kristò nɔ. 6 Bí té léláŋ njolò nùàr bɔ́ húɔ́m lòm, ye te bɔ́ keí bí, bí dɔɔ́ŋ bɔ́ sér faá bɔ̀ kwer Kristò nɔ. Bí njèh dɔɔ́ŋ bɔ́ gí mé temé cén faá Càŋ gwaán nê nɔ. 7 Bí seé bɔɔ̀n bɔ́ lòm mé kàgà-ndòn bi`i faá né seé Fehtoò beèh nɔ, bí té túé ye né lom seé dé bɔ̀ nùàr. 8 Bí kɔ́ɔ ye, nuaá mé né seé teèn bɔɔ́ yií dɔɔ́ŋ, né mene kwer, mene kwer sam, nde né sàgà beè Nùà Dueè mé seé sâ kwa ma. 9 Bí bɔ̀ tele seê, bí bɔ́ yí mé bɔ̀ kwer bi`i teèn ménâ ndɔ, bí té bɔ́ lòù mgbálé. Bí kɔ́ɔ ye, ké te vulúu bí bɔ́ dɔɔ́ŋ né gi mé Tele cên, à dé seèn nùàr lòù gè`i bèh. 10 Mè tueé lɔ né ye bí a, bí bílí dèn gí beè Fehtoò beèh, te bí taré nyegé mé terreb dé seèn. 11 Bí yoòr wèh sù kwá sér bɔ̀ njèh taâb mé né beè Càŋ, te bí kwa nyegé terreb, bí njebá taáb mé táhòrò nùà kɔ́ŋkɔɔ̀ŋ, à bí bèlè cú. 12 Bí kɔ́ɔ ye, béh taáb sâ mé nùàr líé njí ŋgwéh, béh lie njií né mé bɔ̀ càŋ tándulu ké ter ka vulû, béh lie njií mé kunduŋ wɔ́ŋ cib`i bɔ́ bɔ̀ terreb ká teèn hihiné mene. 13 Mɔ né mân, bí beè njébá lòm mé bɔ̀ njèh taâb dé Càŋ, te loù mé cieé veên nde jueè teèn, bí kwa terreb, bí weh Sátàn seé; bí kɔ taáb, sâ bí née ter njebá den ye. 14 Bí mélá dèn gí te gule; bí dèn lòm bɔ̀ gècên bɔ̀, sâ né kàndá bi`i, bí teneè cám kwá cí. Dene dilî né cɔ̀gɔ̀ taâb bi`i, bí yoòr vùɔ̀b kwá cí. 15 Bí yílá Njàgà Bagaà mé feh mene seè, te nùàr dɔɔ́ŋ kwa dɔlê. Bí yílá ménâ, sâ né débágá bi`i, bí gulè yí kwá cí. 16 Bí kwá njí dèn temé yoòr Fehtoò beèh, kɔ̀ bi`i né cí, te cií nyegé bí, sàŋ bí s`iè cú. Táhòrò né mene bí sàŋ yoòr si njií, nde né mbaá nyimé le. 17 Bí gwàn lòm dé gwaân ye Càŋ né bí yili sɔm; tàm taâb bi`i né cí. Bòù-taâb bi`i né ŋgòr Càŋ; bí wèh s`iè beè. Cúcuí Ŋagâ haá né bí kɔɔ́. 18 Bí dùà dèn Càŋ cu dɔɔ́ŋ mé Cúcuí seèn lè, bí té sòn mé bú dù. Bí dèn làŋ ndɔ, bí né tég njebá taré, bí né Càŋ felè bɔ̀ nùàr seèn dɔɔ́ŋ dua laré. 19 Bí né bú felè mò dua ndɔ; bú a, há mè njàb ŋgòr mé né teèn yilá, mè tueé cí, te mè se ŋaré nyegé Njàgà Bagaà mé lé naâ bèh naâb leér den doô, mè njeré dé`i vèh cú. 20 Mè la née mene ká gwà cib`i ye, mé njéh mene, Yeésò Kristò mè sie kwaá né nùà tebê, ye mè a, sè Njàgà Bagaà seè. Bí dùà Càŋ felè mò, te mè se lom mé terreb faá gwaán nê nɔ. 21 Yíé-temé beèh Tisîk mé né seé Fehtoò beèh teèn bɔɔ́ yií, tueé nde né bí dene mò kɔɔ́, te bí den mé njàgà mò tieè. 22 Mè bú ké yoòr bi`i tétég tema njií né dé cî, te bí kɔ gèh dene beèh, temé die bí lè. 23 Tele beèh Càŋ bɔ̂ Fehtoò beèh Yeésò Kristò a, há làrè bɔ̀ mbaábi dɔlê dɔɔ́ŋ; bɔ́ a, bɔ́ te bí gwaán kuú lètenè bi`i, bí kwaá njií ŋeí temé yoòr bɔɔ̀n dé ŋeî. 24 Bɔ̀ɔ́ mé né gi Fehtoò beèh Yeésò Kristò dé kè`i cên gwaán dɔɔ́ŋ, húɔ́m temé Càŋ a, ká s`iè gí bɔ́ beè.

Efêse 6 - Mambila for Cameroon - 2001 Edition - Bible.is - MCUTBL

Annotations