GALԐSEAA DIMA 2

1Yuumpii ni anaasi nyaaŋŋa, man ni Baanabasi daa laa n-labi Gyɛrusalɛm, ka n daa zaŋŋi Taituusi m-paasi ka ti daa kyaŋŋi. 2Din daa kyɛ ka n kyaŋŋi daa nyɛ la Naawunni ŋↄn daa kasigi n-ti ma, ni, n kyɛma. N daa zaŋŋi n lahabasuŋŋu maa yɛla n-wulisi ba, Naawunni lahabasunseaa man daa moonni n-tiri ninvugseeba ban pa Yɛhudiyadima la. N daa wulisi lala lahabaari m mammaŋŋa, n-ti baseeba ban daa nyɛ ninvugtibsa la'aŋŋu dima puuni la kↄkↄa, dama n daa bu boori man daa pun tum tunseesi la, bee, man daa na tumni tunseesi maa, daa yi leebi tunyↄya. 3Amaa n dↄlinkpeaa Taituusi, halli ni ŋↄn daa nyɛ Griika doo maa zaa yↄri, u daa bu nya mugsi gunibu zugu. 4Ay! - di daa nyɛ la yↄmsigu dima maa zugu, baseeba ban daa ma'ai ziri, ni, ba nyɛ la ban niŋi yɛdda: niriba wa daa kpɛ ti saani na, ni ba ti sↄ'ai m-baŋŋi ti yↄlisimma yɛla maa - tin mari yↄlisinseaa Yisa Masiiya dↄligu zugu la - dama ba daa boori la ba zaŋŋi ti n-leebi daaba. 5Amaa ti daa bu kyɛ nini n-ti ba, halli beela, ni ti ti kyɛ ka Naawunni yɛlimaŋni lahabasuŋŋu maa kpalim m-bɛ ya saani n-ti ya. 6Amaa ninvugseeba ban daa bɛ ni kaman zuguraandima la muna - man mun ba'a ka ba zuguraantiri yɛla ni, zaŋŋi n-kyaŋŋi ban daa nyɛ seem; dama Naawunni bu gamsiri n-tibgri niriba - zuguraandima wa daa bu zaŋŋi yɛlipaaliseaa m-paasi ma. 7Amaa ba daa baŋŋiya, ni, Naawunni daa zaŋŋi la lahabasuŋŋu mooligu n-ti ma, ni n deaai n-zaŋŋi m-moonni n-tiri ban pa Yɛhudiyadima maa, kaman ŋↄn daa pun zaŋŋi mooligu wa n-tisi Piita, ni u zaŋŋi m-mooli n-ti Yɛhudiyadima seem la. 8Naawunni daa kyɛ ka u yiiko puuni ka Piita daa niŋi tuumu n-ti ban nyɛ Yɛhudiyadima maa, ka Ŋↄn daa kyɛ ka man gba daa leebi tuumu lala n-tisi ban pa Yɛhudiyadima maa. 9Ba daa baŋŋiya, ni, Naawunni zaŋŋi la lahabasuŋŋu n-ti ma, u wurilim zugu - di nyɛ la Gyeemsi, ni Siifasi Piita, ni Gyↄni, ninvugseeba niriba ŋↄn gↄsiri hoo ti la'aŋŋu duu zaantↄlisi. Ka lala maa zugu ka ba daa gbaai n nuu - man ni Baanabasi zaa - n-wulisi, ni, tin ni ban nyɛ la bunyinni: ka daa sakki, ni, mani ni Baanabasi yɛ n-tumni n-tiri la ban pa Yɛhudiyadima, ka ban mun tumni n-tisiri ban nyɛ Yɛhudiyadima maa. 10Ni, see ka ti teaari ba faradima maa yɛla, din nyɛ man gba ŋↄn boori n niŋi seelli la ni nimbirimoaa. 11Amaa Siifasi ŋↄn daa ti kyɛ Antiyↄkku na, n daa galim u pam paalu ni, dama ŋↄn daa siri kur tumni seem maa daa bu tu. 12Halli ŋↄn Siifasi daa la'amni n-diri ni ti mabiseeba ban pa Yɛhudiyadima maa pↄi, amaa Gyeemsi ŋↄn daa tum dↄseeba na la, ka ba daa ti paai na, di saha ka u daa zↄri la dabeem zaŋŋi n-kyaŋŋi ban daa boori gunibu yɛla la zugu, ka daa naayi labi nyaaŋŋa n-wↄligi u maŋŋa ka kyɛ ti mabiisi wa. 13Ka lala daa kyɛ ka ti mabiisi ban nyɛ Yɛhudiyadima maa m-paasi u zugu daa la'am m-bɛ u birikↄnsi beebu ni; halli ka Baanabasi gba daa dↄli ba birikↄnsi soori maa. 14Man ŋↄn daa ti nya ka ba daa bu dↄli lahabasuŋŋu maa soori ni yɛlimaŋni, n daa zɛ la ba zaa tooni nti yɛli Siifasi, ni, "Nyin nyɛ la Yɛhudiya nira, amaa ka i bɛ la ban pa Yɛhudiyadima maa beesigu, ka bu ŋmani Yɛhudiyadoowa. Ka di kyaŋŋi la wula ka i boori i mugsi ban pa Yɛhudiyadima maa ka ba bɛ ni kaman Yɛhudiyadima?" 15Tirim muna - ba dↄ'ai ti la Yɛhudiyadima, ka pa la ban pa Yɛhudiyadima, tin boonni seeba, ni, 'ala'akyi dima' la. 16Ti baŋŋiya, ni, nira m bɛ yɛlimaŋni daana Naawunni tooni la ŋↄn kur niŋi Yisa Masiiya yɛdda zugu, ka pa la fukumsi zaalikpana ŋↄn wulisi seem dↄligu zugu. Ka dizugu ti niŋi Kirisita Yisa yɛdda, ni ti leebi la yɛlimaŋni dima lala yɛdda zugu, pa zaalikpana dↄligu zugu: dama sↄsↄ ku toaai m-bɛ yɛlimaŋni daana kasikasi, zaalikpana dↄligu zugu. 17Tↄ, ka dinŋↄna ti kpaŋŋni ti mansi ni ti yi taalli ni Naawunni saani hoo yɛlimaŋni dima, ka di nyɛ la tin la'am ni Kirisita la zugu; ka di saha ka ti nya m-baŋŋi, ni, ti nyɛ la ala'akyi dima, kaman ban pun pa Yɛhudiyadima la ŋↄn nyɛ seem. Kala, dinŋↄ wulisiya, ni, Masiiya zɛ la ala'akyi tumpu nyaaŋŋa? Ay - soori ka ni gba! 18Ka n yi piili n-yɛ m-mɛ man daa pun tɛ zaalikpanseesi m-basi la, dinŋↄna n wulisiri m mammaŋŋa yɛla, ni, n nyɛ la ŋↄn burigi zaaligu. 19Fukumsi zaaligudima ŋↄn bɛ ni zugu, n daa kpi n-ti zaaligu wa yɛla; din yɛ kyɛ ka n ti bɛ ni n-tiri Naawunni. Man pun la'am n-kpi Kirisita Masiiya dↄpulli maa zugu. 20Dinzugu di laa m-pa la mani m bɛ ni, amaa di nyɛ la Kirisita m bɛ ma ni zugu. Nyↄvuriseaa ni man bɛ duniya wa ni pampaŋŋↄa, Naawunni Bii maa yɛdda zugu ka m bɛ ni, dama u wuri ma pam ka daa yiisi u nyↄvuri n-tisi man zugu. 21Man mun ku sakki, ni, n za'asi Naawunni piini suma wa. Amaa di yi nyɛ la fukumsi zaaligudima zugu ka nira nin toaai n-yi taalli puuni Naawunni saani hoo yɛlimaŋni daana, dinŋↄna Kirisita Masiiya kum maa daa ka gbinni!

will be added

X\