ZACARÍAS 9

1Atzun tkanil lu o tma Kman ti'j tx'otx' Hadrac ex ti'j tnam Damasco, porque toc twitz Kman cyi'j cycyakil xjal, ax icx cyi'j cycyakil c'loj cyiyjil aj Israel. 2Ax icx ti'j tnam Hamat aju tvesin tib tuc'il tnam Damasco, ax icx ti'j tnam Tiro ex Sidón, masque at nimxix cynabl. 3Jaw cybincha'n aj Tiro ja te cycolbil cyib ex baj cychmo'n nimxix k'an pwak ex sak pwak. 4Pero c'elel ti'n Kman tcyakilju at cye, cbelex t-xo'n cyk'inumabl tuj mar ex c'oquel tk'o'n tk'ak'al tcyakil tnam. 5Octzun tcyil ke xjal ate' tuj Ascalón, ctzajel nimxix cyxobil. Ax icx keju ate' tuj tnam Gaza cbajel cyxkutz'in cyib tu'n ta'w, ax icx keju ate' tuj tnam Ecrón che tzajel lu'lun tu'n tchi tu'nju otok naj aju k'ukl cyc'u'j ti'j. Cymel aju rey tuj tnam Gaza ex minti' xjal cyjel ten tuj tnam Ascalón. 6Tuj tnam Asdod che najal ke xjal t-smon tib cyiyjil. Chi Kman in tma'n cyja': Cbel nk'o'ne cycastiw aj Filistey tu'n mi'n cucx tjaw cyniman cyib. 7Mlay txi cychyo'ntl chibj tuc'ix tchc'el, icx aju chibj mya k'o'n cye tu'n t-xi cychyo'n. Pero cyxol ke xjal lu at junjun che cyjel ten tu'n cyc'ulun weye ex che oquel te nejenel cyxol aj Judá ex che c'metel aj Ecrón ic tza'n o bant cyi'j aj Jebusey atxix ojtxi. 8Atzun weye chin bel tene xk'ukil tu'n tclet aju tnam etzan wu'ne, tu'ntzun mi'n cyoctz ke aj k'oj cyxol aj Israel. Mlay che ajtz meltz'aj juntl maj ke xjal o che yajlante cye, porque akine chin bel tene xk'ukil cyi'j, chi Kman. 9Chi Kman in tma'n cyja': Che tzalajxe nim akeye aj Sión. Che sch'ine tuc'il tzalajbil akeye aj Jerusalén. Lu cyreye tzul cyuc'ile, in tbincha'n aju tz'aklxix ex tzul clolte cyeye; mans ex tzul tjax tibaj jun bur, tal jun ttxu bur. 10Tu'n che bajel naj ke carwaj in che ajben tuj k'oj cyu'n aj Efraín, ax icx ke chej in che ajben tuj k'oj cyu'n aj Jerusalén. Che bajel ttokin ke xobl plech in che ajben tuj k'oj. Che tel ke nasyon tuj txubtxaj tu'n cyreye. A ccawil tibaj tcyakil, ctzajelx ke' tcawbil ttzi' jun mar ex cpol baj ttzi' juntl, ctzajelx ke' ttzi nima Éufrates, cpol baj ttxa'npun tx'otx'. 11Chi Kman in tma'n cyja': Tu'nju o txi ntziyane jun nyole cyeye ex o cyaj bant ti'j tu'n cychc'el alumaj, che colpetele wu'ne ex che eletz ntzokpi'ne ke pres cycu'x tuj jul minti' a' tuj. 12Akeye o che'x k'i'n pres tuj juntl part, ex lu keye in che ayon, ja'lo cyaj meltz'aje tuj cycolbil cyibe. Ex in xi nma'ne cyeye, mas nim ncy'iwbile cxel nk'o'ne cyibaje tu'nju o tzic'x cyu'ne. 13Ic che oquel aj Judá wu'ne ic tza'n ke xobl plech in che ajben cyu'n soldad tuj k'oj, ex ic che oquel aj Efraín ic tza'n ke plech. Ic che oquel aj Sión ic tza'n spad, ex cxel nk'o'ne cyipumal tu'n cyxi' k'ojlel cyuc'il aj Grecia, chi Kman. 14Cbel tyec'un tib Kman cyibaj ke xjal etzan tu'n ex che tzajel t-xo'n ke tplech ic tza'n tkan k'ancyok. Ate Kman Dios c'oquel k'ajtzante chun ex tzul tuj jun cyk'ik' nne'tz tuj tnayaj k'ij. 15Ate Kman aju Tajaw Tcyakil c'oquel tcwentin ke xjal etzan tu'n, ex che najel ke aj k'oj cyi'j cyu'n. Cbajel cywaban cyximlal ke aj k'oj, akeju in che tzaj xo'nte abj cyi'j, che jawil sch'in mer ic tza'n c'al k'e'n ke, ex c'elel cychc'el ke aj k'oj cyi'j cyu'n ic tza'n tchc'el jun alumaj tcu'x tuj jun lak tu'n t-xi k'abaj twi altar te jun chojbil. 16Tuj tk'ijlalil tzul che cletel tu'n Kman Dios ke xjal etzan tu'n, ic tza'n ke ẍne'l cwentin ke wen tu'nju pastoril cye. Che koptz'ajel tuj ttx'otx' Kman ic tza'n ke tbanil abj in che koptz'aj ti'j tcoron jun rey. 17Tbanilxix che oquel que'yin. Tu'nju nimxix twitz triw ex nimxix ta'l twitz uva, che ch'iyil ke cu'xun ax icx ke k'apoj.

will be added

X\