ZACARÍAS 8

1Ate Kman aju Tajaw Tcyakil tzaj tma'n tkanil lu weye: 2Akine Dios aju Tajaw Tcyakil, atzun jlu in xi nma'ne: At nimxix nganiye ti'j tnam Sión ex ma tzaj nimxix ntx'u'jile cyi'j ke aj k'oj ti'j. 3Ja'lo chin ajel meltz'aje tuj Jerusalén tu'ntzun nnajane tuj. C'oquel k'o'n tbi tnam Jerusalén: Aju tnam jatum ate' ke xjal in japun tyol Dios cyu'n; ex aju witz etzan wu'ne, c'oquel tbi: Aju Witz Xjan. Akine Tajaw Tcyakil. 4Che bel ke' juntl maj ke tij xinak ex ke tij xu'j cyuj ke cay tuj Jerusalén, ex teyle junjun k'i'n tcy'ako'ch tu'n tlaj nimxix cyabk'iyil. 5Che nojel ke cay tuj tnam cyu'n ke tal k'a ex ke tal txin in che schan. 6Tuj tk'ijlalil tzul, tcyakil jlu c'oquel te jun binchben ma'xix t-xilen tuj cywitz ke xjal etzan wu'ne, akeju che cyjel ank'intl, atzun weye tuj nwitz mya jun binchben ma' t-xilen jlu. Akine Dios Tajaw Tcyakil in chin k'mante jlu. 7Ke xjal etzan wu'ne che cletel wu'ne tjak' cycawbil xjal ate' tuj tx'otx' tuj tjawitz k'ij ex tuj tx'otx' tuj telex k'ij, 8ex che ajetz wi'ne juntl maj tu'n cynajan tuj Jerusalén. Che oquel te jun tnam etzan wu'ne, atzun weye chin oquele te Cydios axix toc ex tz'aklxix kine. 9Atzun jlu in tma'n Kman aju Tajaw Tcyakil: Cyk'onque tilil ak'untl, akeye ma cybiye ja'lo aju o k'manjtz ojtxi cyu'n ke t-sanjel Dios atxix tej tcub ke' simyent tu'n tjaw binchet juntl maj tja Kman aju Tajaw Tcyakil. 10Ojtxi minti'tok chojbil twi cyc'u'j xjal ex mi ke alumaj. Ex tu'n cylaj ke aj k'oj, minti'tok ttxubtxajal at cyxol xjal ex ax kine otok chin cub k'onte k'oj cyxol xjal. 11Atzun ja'lo mlay nbinchatle cyi'j ke xjal che cyjel tentl tuj tnam lu ic tza'n o bant wu'ne ojtxi. A kine Dios Tajaw Tcyakil in chin k'mante jlu: 12Tuj txubtxaj che xe'l xjal awal, c'oquel twitz uva; ctzajel tk'o'n tx'otx' tawal ex ctzajel jbal cabalxix. Tcyakil jlu cxel nk'o'ne te cyetzbil ke xjal etzan wu'ne, akeju che cyjel ten. 13Akeye aj Judá ex aj Israel, ic tza'n o che yolin xjal mya ba'n cyi'je tej cytene cyuj ke nasyon, icxtzun che cletele wu'ne ja'lo ex che oquele te cy'iwbil. Mi'n che xobe, cyk'o'nc cyipune. 14Atzun jlu in tma'n Kman aju Tajaw Tcyakil: Cub nximane tu'n tcub nk'o'ne cycastiw cyxe'chele ojtxi tej ttzaj nk'oje cyu'n ex minti' ic'x ti'j wu'ne. 15Atzun ja'lo ma cub nximane tu'n nbinchanteye ba'n cyi'j aj Jerusalén ex cyi'j aj Judá. Cyja'tzun, mi'n che xobe. 16Atzun jlu tu'n cybinchanteye: Che yoline axix toc cyuc'il mastl, cybinchanxe cyi'j xjal tuj tumelxix ex tz'oc tililx cyu'ne tu'n tbant cyten xjal cyxolx oc cypon xtisil. 17Mi'n cub cyximane tu'n cybinchanteye mya ba'n cyi'j cyuc'ile ex mi'n txi cytziyane yol mya ax toc, porque tcyakil jlu nne'l wic'une. Akine Dios in chin k'mante jlu. 18Ate Kman aju Tajaw Tcyakil tzaj tma'n weye cyja': 19Aju tu'n tcub cyyo'ne we'yaj tuj tcyajin xjaw, tuj tjwe'yin, tuj twukin ex tuj tlaji'n, ja'lo c'oquel te tzalajbilxix cyeye ex te nink'ij tzalajbilxix cye ke tiyjil Judá. Che tzalajxe ti'j ju yol axix toc ex tu'n cytene ba'n cyxolxe. 20Atzun jlu in tma'n Kman aju Tajaw Tcyakil: Che ul nimcu c'loj xjal tzalu ex ke xjal najlke cyuj ke nintz tnam. 21Ke xjal tuj jun tnam che xe'l cyuc'il xjal tuj juntl tnam ex cxel cyma'n cye cyja': Ko' ke jyolte Kman aju Tajaw Tcyakil, ko' kanilte tu'n kcub tcy'iwla'n, che chilo. Ex atzun ke xjal tuj juntl tnam ctzajel cytzak'we'n cyja': Ax icx keye ko xe'le, che chilo. 22Che ul tuj Jerusalén nimcu tnam ex ke nasyon nim cyipun, che ul jyolte Kman aju Tajaw Tcyakil, che ul kanil te tu'n cycub cy'iwla'n tu'n. 23Tuj tk'ijlalil tzul, laj stranjer xjal cye mastl nasyon ctzajel cytzyu'n ttxa'n t-xbalun jun xjal judiy ex cxel cyma'n te cyja': Kaje ko'xe cyuc'ile, porque ma kbiye atzun ta' Dios cyuc'ile, che chilo.

will be added

X\