ZACARÍAS 6

1Ax icx o wile cyaje carwaj te k'ojbil ate' cyxol cabe witz, ic che que'yin ic tza'n k'an c'uxbil. 2Aju tnejel carwaj jawo'ntok cyu'n chej cyak cyi'j; aju tcabin jawo'ntok cyu'n chej k'ek cyi'j; 3aju toxin jawo'ntok cyu'n chej sak cyi'j; aju tcyajin jawo'ntok cyu'n chej sib cyi'j ex nimxix cyipun. 4Xi nkanine te anjel aju in yolintok wuc'ile: —Tat, ¿ti t-xilen jlu? Nchiye. 5Atzunte anjel tzaj ttzak'we'n: —Ake jlu, aketzun cyaje cyk'ik' in che etz twitz Kman aju Tajaw Tcyakil twitz tx'otx'. 6Aju carwaj jawo'n cyu'n chej k'ek cyi'j cyja' cyxi' tuj tx'otx' tuj tbank'ab k'ij, aju carwaj jawo'n cyu'n ke chej sak cyi'j cyja' cyxi' tuj tx'otx' tumlal telex k'ij, ex aju carwaj jawo'n cyu'n chej sib cyi'j cyja' cyxi' tuj tx'otx' tuj tnayaj k'ij, chi anjel. 7E je'xtzun ke chej sib cyi'j, nimxix cygan tu'n tbaj cybetin tuj tcyakil twitz tx'otx'. Xi tma'n anjel cye: Cybetin baje tuj tcyakil twitz tx'otx', chi. Ex o cybincha icju. 8Te tibajxi jlu, tzaj sch'in anjel wi'je, tzaj tma'n weye cyja': —Akeju e je'x tuj tx'otx' tuj tbank'ab k'ij ma chewix tk'oj Kman cyu'n tuj ju tx'otx' ma chixin. 9Tzaj tma'n Kman tkanil lu weye: 10—Chmo'n jawa ch'in oyaj cyxol Heldai, Tobías ex Jedaías, akeju e'x k'i'n tuj Babilonia ex o che ajtz meltz'aj. Ex ax tuj k'ij lu txi'ya tja Josías aju tcy'ajal Sofonías. 11Ti'j ju sak pwak ex k'an pwak cjawil tchmo'na, binchama ke coron, ex k'on jaxa jun tuj twi' Josué aju tnejel pal ex tcy'ajal Josadac. 12Ex k'manxa te cyja': Ate Kman aju Tajaw Tcyakil chi cyja': Lu xinak aju toc tbi T-xul, ti'j ctzajel jlet jun t-xul, ex atzunte cjawil binchante juntl maj aju tja Kman. 13Cjawil tbincha'n juntl maj tja Kman ex oc tc'ma' nimbil ic tza'n jun rey. Cbel ke' tuj tk'ukbil tu'n tcawin, cbel ke' pal ttxlaj ju tk'ukbil ex cmojebel cyyol cycabil. 14Ax che cyjel ten ke coron tuj tja Kman te nabl cye Heldai, Tobías, Jedaías ex Josías aju tcy'ajal Sofonías. 15Che ul ke xjal te najchak onil tu'n tjaw binchet juntl maj tja Kman; c'eleltzun cynic'e ti'j, ate Kman aju Tajaw Tcyakil ma tzaj samante weye. Cbantel jlu ka ma txi cynimane tyol Kman aju Cydiose.

will be added

X\