ZACARÍAS 13

1Tuj tk'ijlalil tzul cjaketel jun twi a' tu'n ttx'jet cyil ex cytz'ilil ke tiyjil David ex keju najl tuj Jerusalén. 2Ex cyuj cycyakil cytanmi aj Israel che elel wi'ne ke tilbilal tu'ntzun mi'n ttzaj na'ntl cybi. Ax icx c'elel wi'ne tuj cytanmi akeju nno'c cyk'on cyib te nsanjele ex cycyakil keju cyajbil tu'n cyc'ulun cywitz tilbilal. Akine Dios in chin k'mante jlu. 3Entons, ka at jun ma tz'oc tk'on tib te nsanjele, ax ke tman che k'malte te cyja': Il ti'j cymela tu'nju ma yolina nic'aj yol tuj tbi Kman, che chilo. Ax ke tman che oquel xayunte te tu'n tcyim oc toc tk'on tib te nsanjele. 4Tuj tk'ijlalil tzul, akeju nno'c cyk'on cyib te nsanjele ctzajel cych'ixwi oc cypacban ti'j ju in tzaj yec'un cye mer ic tza'n tuj witzic'. Mi jun c'oquel tk'o'n t-ẍjo'w tu'n t-sbun ic tza'n ẍjo'w in ajben cyu'n ke nsanjele, 5nok o'cx teylex te junjun cxel tma'n cyja': Mya t-sanjel Dios we kin, nok jun ak'nal xjal kine. Atxix tej c'wa'lxtok kine in chin ak'nane tuj cojbil, che chilo. 6Katzun at jun ma tzaj kaninte te: ¿Ti cyxilen ke tbantlen ẍil ate'c ti'j t-ximlala? ka chi, atzun te cxel ttzak'we'n: O chin oc c'ixbisa'ne tuj cyja ke wamiwoye. 7Ate Kman aju Tajaw Tcyakil chi in tma'n cyja': We'ctza aya spad, toc tzokpaja ti'j ju xjal toc te pastor wu'ne ex toc te onil weye. Byoncuya ju pastor, atzun ke ẍne'l che elel sputj ex atzun weye chin oquel tzokpaje cyi'j ke tal ẍne'l. 8Keju najl tuj tx'otx' lu che elel pa'n tuj ox c'loj, cabe c'loj che najel, atzun toxin c'loj cyjel ank'in. 9C'oquex nk'o'ne toxin c'loj tuj k'ak', che bajel nsaksa'ne ic tza'n in baj sakset sak pwak, ex c'ic'el nwitze cyi'j ic tza'n nne'l nic'baj ti'j k'an pwak. Octzun che cubsal nwitze ex atzun weye ctzajel ntzak'we'ne. Cxel nma'ne cye cyja': Akeye xjal etzan wu'ne, ex atzun cye ctzajel cytzak'we'n cyja': Ate Kman, atzun Kdios, che chilo. Akine Dios in chin k'mante jlu.

will be added

X\