ZACARÍAS 11

1Aya tx'otx' Líbano, jakom ke tpwertila ex e cycub baj tz'e'y tu'n k'ak' ke tkan wi'ten ate' ti'ja. 2Cyjaw ok'e akeye tze' tzaj, tu'nju ma che ic' tz'ak ke wi'ten ex ma che cub baj tilj ke tze' tbanilxix che que'yin. Che wuyine akeye tze' c'ol tuj tx'otx' Basán, tu'nju ma baj naj aju chc'ul pim. 3Nim in che ok' ke pastor porque ma baj naj cywabl ke alumaj aju tbanilxix. In binjtz tk'ajk'ajel cywi' ke balun in che tzanun tu'nju ma baj naj tpimil chc'ul at ttzi nima Jordán. 4Atzun jlu tzaj tma'n Kman Dios weye: Che tcwentin oca ke ẍne'l banimaj cyi'j tu'n cycub byo'n. 5In che cub byo'n cyu'n ke lak'ol cye ex minti' nnu'l ti'j cyc'u'j ka at cyil ti'j, ex ke c'ayil cye in cyma'n cyja': Chjonte Kman, ma ko oque k'inun, che chi. Ke pastoril cye misicyer in tz'e'y cyc'u'j cyi'j. 6Tu'ntzun jlu mlay tzaj k'ak'an nc'u'je cyi'j ke xjal najlke tuj tx'otx' lu, nok o'cx cxel nk'o'ne teyle junjun tuj tk'ab tuc'il ex tuj tk'ab t-rey. Atzun ke jlu che bajel xitunte cytx'otx' ex mi jun ccletel wu'ne tuj cyk'ab. Akine Dios in chin k'mante jlu. 7In octzun tene cwentil cye ke ẍne'l banimaj cyi'j tu'n cycub byo'n, akeju tuj bis ate'. Tzaj njyo'ne cabe cy'ako'ch; jun oc nk'o'ne tbi Xtalbil ex atzun juntl oc nk'o'ne tbi Mojbabl Tibil. 8Ex tuj junx xjaw el wi'ne cyak'un ox pastor otok baj npasense cyu'n ex in che ic'untok wi'je. 9Xi nma'ne cye ke ẍne'l cyja': Mlay chin octle te pastor cyi'je. Ka at jun ma cyim, e tcyim. Ka at jun ma cub naj, e tcub tnaj. Atzun keju che cyjel ten, e tbaj cychyon cyib, nchiye cye. 10Tzajtzun wi'ne aju ncy'ako'che toctok tbi Xtalbil ex cub ntokine te jun techal ka otok cub tk'uchin Dios tyol aju otok cyaj bant ti'j tu'n cyuc'il cycyakil nasyon. 11Tuj k'ij lu cub k'uchj aju yol otok cyaj bant ti'j ex ke lak'ol ẍne'l, akeju in che que'yintok wi'je, el cynic' ti'j ka a Kman k'mante aju in banttok wu'ne. 12Xitzun nma'ne cye cyja': Ka ba'n tuj cywitze, cychjontze twi nc'u'je, ex ka mi'n, cucxju, nchiye. Ex tzaj cyk'o'n 30 sak pwak twi nc'u'je. 13Tzaj tma'n Kman weye cyja': K'inxa pwak lu ex k'o'n cu'xa tuj tcubil k'inumabl tuj njaye. Xitzun wi'ne keju 30 sak pwak ex cu'x nk'o'ne tuj tcubil k'inumabl tuj tja Kman, o'cxtzun ch'in twi nc'u'je tzaj cyk'o'n. 14Te tibajxi cub ntokine aju tcabin cy'ako'ch, aju toctok tbi Mojbabl Tibil, te jun techal ka otok cub xitj aju cymojbabl cyib aj Judá cyuc'il aj Israel. 15Tzaj tma'n Kman weye cyja': Atzun ja'lo, k'o'nc tiba ic tza'n jun pastor minti' tnabl. 16Porque c'oquel nk'o'ne jun pastor tuj tnam lu, aju pastor lu minti' taj cyi'j ẍne'l tzpetni ke, ex mi'n jyon cyi'j keju o che'x naj ex mi'n che oc tk'anan keju o che c'ixbi ex mi'n txi tk'o'n cywa keju ocni cyi'j, nok o'cx cxel tchyo'n cychibjal keju mas ulni cynabl ex c'elel tcowpi'n tpas cykan. 17Ay bec'bil twitz ju pastor minti' tnabl, in che cyaj tcolin ke ẍne'l. Cuchiwt c'ixbi tk'ab ex tbak' twitz tuj tbank'ab tu'n spad. Cuchiwt tz'oc tzkij tk'ab ex bi'xwit cyaj moẍix tbak' twitz te jumajx.

will be added

X\