ZACARÍAS 1

1Tuj twajxakin xjaw te tcabin abk'i ttzyetlen tcawin rey Darío, tzaj tma'n Kman jun tkanil te t-sanjel Zacarías tbi, aju tcy'ajal Berequías ex tal tchman Ido. Tzaj tma'n Kman cyja': 2Akine Dios aju Tajaw Tcyakil tzaj nimxix nk'oje cyi'j ktzan cyxe'chele. 3Cyja'tzun, txi'ya te nxele ex k'manxa jlu cye xjal: Cyajtz meltz'aje wuc'ile ex jacu chin aj meltz'aje cyuc'ile, chi Dios, chicuya cye. Akine Dios in chin k'mante jlu. 4Mi'n cybinchaye ic tza'n cybincha ktzan cyxe'chele, akeju o k'manjtz cye cyu'n ke nsanjele ojtxi tu'n tcyaj cycolin be mya ba'n ex cybinchben mya ba'n, atzun cye minti' o cyajbe tu'n t-xi cybi'n nyole ex tu'n t-xi cyniman kine. Akine Dios in chin k'mante jlu. 5Atzun ja'lo ¿jatumtzun ate' ktzan cyxe'chele? ¿Cucxpetzun che ank'il ke nsanjele? 6O che japun ke nyole ex ke nleye xi nma'ne cye nsanjele cyi'j ktzan cyxe'chele; cyja'tzun e ajtz meltz'aj wuc'ile ex cyma cyja': Ate Kman aju Tajaw Tcyakil ma tbincha ki'j ic tza'nx cub t-ximan, tu'n tcub tk'o'n kcastiw ic tza'nx kbinchben, che chi. 7Akine Zacarías t-sanjel Dios, tcy'ajal Berequías ex tal tchman Ido, o nc'ame tkanil lu te Kman tuj 24 tajlal tjunlajin xjaw, aju xjaw toc tbi Sebat, tuj tcabin abk'i ttzyetlen tcawin rey Darío. 8At jun konic'an at jun tzaj yec'un weye mer ic tza'n tuj witzic': O wile jun xjal tjax tibaj jun chej cyak que'yin. Wa'l tcub tuj jun chk'ajlaj cyxol txkan tze' k'atxab ex ti'jxi attok juntl c'loj chej, at junjun cyak che que'yin, junjuntl sib cyi'j ex junjuntl sak che que'yin. 9Atzun weye xi nkanine cyja': Tat, ¿alcyetzun ke xjal lu cyjax cyibaj chej? Nchiye. Atzunte anjel aju in yolin wuc'ile tzaj ttzak'we'n: Cxel nyec'une teya alcye ke. 10Atzunte xinak aju wa'ltok cyxol tkan k'atxab tma cyja': Atzun ke jlu ma che'x t-sama'n Kman tu'n cyxi' betel tuj tcyakil twitz tx'otx', chi anjel. 11Atzun cye xjal cyjax cyibaj chej xi cyma'n te t-anjel Kman, aju wa'ltok cyxol tkan k'atxab, che chi cyja': Ma kox aje betel tuj tcyakil twitz tx'otx' ex ma kile ke xjal ate' tuj tzalajbil ex tuj txubtxaj. 12Atzunte t-anjel Kman tma: Nman, aya Tajaw Tcyakil, ma bant-xi 70 abk'i in k'ojina cyi'j aj Jerusalén ex cyi'j ke tnam ate' tuj Judá. ¿Jtojtzun ban ttzaj k'ak'an tc'u'ja cyi'j juntl maj? 13Atzunte Kman tzaj tma'n yol ba'n ex te k'ukbabl c'u'jbaj teju anjel aju in yolintok wuc'ile, 14ex tzaj tma'n anjel weye tu'n t-xi nma'ne jlu: Atzun jlu in tma'n Kman aju Tajaw Tcyakil: Tu'n tcyakil wanmiye in nc'ujla'ne aju tnam Jerusalén ex aju witz Sión. 15Cyja'tzun ma tzaj nimxix nk'oje cyi'j ke nasyon lu ate' tuj txubtxaj ja'lo. Weye nok ch'in nk'oje tzaj cyi'j ke xjal etzan wu'ne, atzun cye nasyon lu e ic' tibaj aju castiw xi nma'ne cye tu'n cybinchante. 16Cyja'tzun in xi nma'ne jlu: Ma chin ul meltz'aje tuj Jerusalén tuc'il tk'ak'bil nc'u'je ex cjawil binchet juntl maj njaye, ax icx ju tnam. 17Ax icx tzaj tma'ntl anjel weye: Ax icx k'manxa jlu: Ate Kman aju Tajaw Tcyakil chi in tma'n cyja': Cchmetel juntl maj nimxix k'inumabl cyuj ke tnam etzan wu'ne; cxel nk'ukba'ne juntl maj cyc'u'j aj Sión ex cjawil nsc'o'ne juntl maj aju tnam Jerusalén. 18At juntl tzaj tyec'un Kman weye mer ic tza'n tuj witzic', o wile cyaje cach. 19Xi nkanine te anjel aju in yolintok wuc'ile, ¿Ti cyxilen ke cach lu? nchiye. Atzun te tzaj ttzak'we'n: Ke cach lu, atzun in tma'n cyi'j ke nasyon e baj sputun cye ke xjal najlke tuj Judá, tuj Israel ex tuj Jerusalén, chi anjel. 20Te tibajxi tzaj tyec'un Kman weye cyaje tx'inol c'uxbil. 21Atzun weye xi nkanine: ¿Tiku'n ma che ul ke tx'inol c'uxbil lu? Nchiye. Atzunte anjel tzaj ttzak'we'n: Ke cyaje cach, atzun ke e baj cysputunte ke xjal najlke tuj Judá ex mi a'l jun ten tipun tu'n tk'ojin cyuc'il. Atzun ke tx'inol c'uxbil lu ma che ul xobtzal cye ex tu'n tel cyi'n cyipumal ke nasyon e baj sputunte cye ke xjal najl tuj Judá, chi anjel.

will be added

X\