Tito 1

1Akine Pablo, tmajen Dios kine ex apostl kine te Jesucrist, ma chin tzaj sama'ne tu'n Dios tu'n tcyuwsanjtz cyocslabl keju sc'o'maj ke, tu'n telxix cynic' ti'j ju yol axix toc, tu'ntzun tbant cyniman te Dios, 2ex tu'n tke' cyc'u'j ti'j tu'n tten cychwinklal te jumajx. Porque atxix ojtxi, na'nxtok ttzaj xe't ke tabk'iyil, tzaj ttziyan Dios tu'n tten kchwinklal, ex miban te Dios nic'an yol. 3Atzun ja'lo tujxix tk'ijlalil ma tzaj tchic'ba'n Dios tyol, aju Dios Clol ke ex atzunju ma tzaj k'mante tu'n t-xi npacba'ne ju yol lu. 4In xi ntz'ibane jlu teya Tito, axix toc nc'wa'le, junx kocslabl. Awt Kman Dios tuc'ix Kajaw Jesucrist aju Clol ke che tzaj k'onte xtalbil teya, [ex tzajwit k'ak'an cyc'u'j ti'ja] ex tu'n tke'xix tc'u'ja. 5Cyja'tzun xi nma'ne teya tu'n tcyaja tuj tx'otx' Cret, tu'n tcyaj bant ti'j tu'na aju atx taj, ex tu'n toc tk'o'na ansyan tuj junjun tnam, ic tza'n xi nma'ne teya. 6Ba'n tu'n toc te ansyan aju minti' tpaltil, ex nok junx t-xu'jil at, ex ka ocslal ke tc'wa'l ex ka minti' in che yolin xjal cyi'j tc'wa'l ka tzokpi'n ke tu'n cybinchante nok alcye cyajbil ex ka miban che bin. 7Porque aju cwentil tak'un Dios tuj tcwent ta' tcyakil tak'un Dios, cyja'tzun il ti'j tu'n tten minti' tpaltil, mya jawni twitz, mya jurat in jaw cyakpaj, mya c'al k'e'n, mya k'ojlel, ex minti' in pon tc'u'j ti'j jun cambabl mya tuj tumel, 8nok o'cx ba'n k'on posad, at tc'ujlalil ti'j ju ba'n, at tnabl, tz'aklxix, ba'nxix tten tchwinklal, ex tcwent tib, 9tzyu'nx tu'n aju yol axix toc ic tza'n o xnak'tzanjtz, icx te tu'n tk'onte cynabl mastl tu'n jun xnak'tzbil tz'aklxix ex tu'n tcub ti'j cynabl keju in che k'ojin ti'j. 10Porque at nimcu xjal miban che bin, in che yolin nokx gan, ex sbul ke, ic tza'n ke xjal judiy mas in che yolin. 11Il ti'j tu'n tmaket cytzi' jlu, porque in xitj cynabl enter jun ja xjal cyu'n, in cyk'o'n jun xnak'tzbil mya ba'n tu'n cycambante pwak mya tuj tumel. 12At jun pacbal cyxol aj Cret ax cyxjalil o tma: Ke xjal aj Cret cucx in che nic'an yol, ic tza'n jil ke, mya ba'n ke, cye che wa'n ex cy'aj ke, chi xjal. 13Ax toc aju yol tma xjal lu; cyja'tzun cyuwx cawinxa ke, tu'ntzun cyten tuj cyocslabl minti' cypaltil, 14ex tu'n mi'n t-xi cybi'n cyla'jbil xjal judiy, ex tu'n mi'n t-xi cyniman cyxnak'tzbil xjal akeju nne'l cypa'n cyib ti'j ju yol axix toc. 15Cycyakil keju sak tuj cyanmi, sak ta' tcyakil cyu'n; atzun cye keju najni cyanmi ex mya ocslal ke, tcyakil nno'c cyk'o'n te tz'il, ex ma tz'ilix tuj cynabl ex tuj cyanmi. 16In cyma'n ka ojtzki'n Dios cyu'n, pero tu'n cybinchben nne'l knic' cyi'j ka mya ax toc cyyol. Puro ic'bil ke ex miban che niman ex minti' cyajben tu'n cybinchante jun ba'n.

will be added

X\