CANTARES 8

1Nokwit nxibane ex awt el ch'iya ti'j tim ntxu'ye. Cyja'tzun oc tcneta wu'ne tuj cay, jacwitlo tz'el ntz'ubane twitza ex mi a'l jun jacu xmayin wi'je. 2Jacwitlo txi wi'ne tja ntxu'ye, ex jacwitlo tz'ocx wi'ne tuj tja, ex jacwitlo aya tz'oc te xnak'tzal weye. Jacwitlo txi nk'o'ne tc'a'ya ta'l twitz uva tbanilxix ex ta'l twitz carnad ẍok'. 3E tocx tk'o'n xinak tnayaj tjak' nwi'ye, ex tu'n ntzaj tchle'n tu'n tbank'ab. 4Akeye xu'j aj Jerusalén, cytziyantze weye tu'n mi'n tel cyi'ne twatl ju xu'j at-xix nc'ujlalile ti'j. Cyk'onxe ambil te tu'n ttan nok nic'xi or taj tu'n tel twatl. 5¿Alcye ju xu'j cyja' ttzaj tuj lugar minti' cynajbil xjal tuj, pakl tjax twi t-semil ju xinak c'ujla'nxix tu'n? 6Seyarin oca ti'j tanmiya tu'n nbiye, seyarin oca ti'j tk'aba tu'n nbiye. Aju c'ujlalil mlay tzic'x ti'j ic tza'n camic minti' nnic'x ti'j; mlay tz'el wi'ne nganiye ti'ja ic tza'n jun xjal mlay tz'el ti'j tu'n tcyim. Aju c'ujlalil ic tten ic tza'n tkan k'ak' nim tipun. 7Aju c'ujlalil mlay yupj cyu'n mar mi cyu'n nima. Ka at jun ma tzaj tk'o'n tcyakil tk'inumabl tu'n tlak'et ju c'ujlalil tu'n, noklo xmaybil jacu tc'am. 8Aju txin tal kitz'in na'nx cych'iy ke tim. ¿Ti oc kbincha' ti'j ka at jun xjal ma tzul kanilte tu'n toc te t-xu'jil? 9Nokwit ic tten ic tza'n jun muro, jacwitlo jaw kbincha'n jun ja ma' twa'l tibaj, sak pwak ttx'otx'il; nokwit ic tten ic tza'n jun tlamel ja, jacwitlo tz'oc kk'o'n tz'lom wi'ten ti'j. 10Ic ntene ic tza'n jun muro, ke wime ic cyten ic tza'n ke ja ma' cywa'l. Cyja'tzun ic ntene tuj twitz ju xinak c'ujla'n wu'ne ic tza'n jun xjal in cnet xtalbil tu'n. 11Attok tkan t-uva Salomón tuj lugar Baal-hamón. Cyaj tk'o'n tuj cycwent junjun ak'nal ti'j; octzun tpon tyemp tu'n tjaw chmet twitz, cjawil cychmo'n ex teyle junjun ctzajel tk'o'n jun mil sak pwak te. 12Atzun jun mil sak pwak c'oquel te teya, Salomón, ex 200 cye ke ak'nal ti'j, atzun weye wawal ax kine cwentil te. 13K'ontza ambil tu'n t-xi nbi'ne tk'ajk'ajel twi'ya, aya najl cyxol tkan bech. Cyajbil kamiw tu'n cybinte tk'ajk'ajel twi'ya. 14Chuxa, aya xinak c'ujla'nxix wu'ne, chux kelina ic tza'n jun masat, ic tza'n jun tal ttxu masat in kelan cywi witz jatum in che ch'iy ke bech at cyc'oc'jal.

will be added

X\