CANTARES 6

1¿Jatumtzun ma txi' aju xinak c'ujla'nxix tu'na, aya tbanilxix que'yin cywitz mastl xu'j? ¿Tza'n ma txi'? Ko xe'le tuc'ila jyolte te. 2Aju xinak cujla'nxix wu'ne ma txi' tuj tkan tawal, tuj tkan bálsamo c'oc'jxix, ma txi' pastoril cye t-ẍne'l ex k'ilte bech. 3Weye aju xinak c'ujla'nxix wu'ne ex akine te te. In pastorin cyi'j ke t-ẍne'l cyxol tkan bech. 4Aya xu'j at-xix nc'ujlalile ti'ja, tbanilxix que'yina ex achbajilxixa ic tza'n ke nintz tnam Tirsa ex Jerusalén; xobajilxixa ic tza'n jun c'loj soldad cyja' cyxi' tuj k'oj. 5Mi'n cucx tzaj tque'yina wi'je, porque ma cub wi'je cyu'n ke tbak' twitza. Aju ttzmal twi'ya ic que'yin ic tza'n ke tal chip in che t'icpaj cywi witz tuj Galaad. 6Cycyakil twitz te'ya tz'aklxix ate', mer ic tza'n txkan ẍne'l matok tbajlen tx'jo'n cyi'j, teyle junjun yo'ẍ tal ex minti' jun miban alin. 7Ke tk'o'txa ic che que'yin ic tza'n cabe piẍ carnad ẍok' cyewan cyib tujxi ju txaybil twitza. 8Sesenta cybet ke xu'j rey, akeju t-xu'jil rey, 80 cybet keju toc cyoclen te tcabin t-xu'jil rey, ex nimcu cyajlal ke k'apoj, 9pero aju weye nxu'jil ic tten ic tza'n jun tal palom minti' tpaltil; o'cxcu jun at, minti' juntl ic tza'n te, o'cxcu te c'ujla'n tu'nju xu'j tzaj alinte te. Oc toc que'yin cyu'n k'apoj, in cyma'n tuj tzalajbil ta'; ex in jaw nimsa'n cyu'n ke xu'j rey, akeju t-xu'jil rey, ex cyu'n keju toc cyoclen te tcabin t-xu'jil rey. 10¿Alcyeju xu'j in lak'e' ttzaj ic tza'n in tzaj spic'e' t-xe cya'j? Tbanilxix que'yin ic tza'n que'yin xjaw, in koptz'aj ic tza'n tkan k'ij, xobajilxix ic tza'n jun c'loj soldad cyja' cyxi' tuj k'oj. 11In cu'xe jatum ta' tkan tze' nogal tu'n t-xi nque'yine cha'x c'ul ttzi tk'ab xak, tu'n toc nque'yine ka otok tzaj cyxul tkan uva, ex ka otok tz'oc cyxmacal carnad ẍok'. 12Te tibajxi ya minti' o nbiye ti o baj, nok o'cx tej nna'nteye ya otok chin jaxe tuj tcarwaj aju nejenel at tuj ntanmiye. 13Tajtz meltz'aja aya xu'j aj Sulamita, tajtz meltz'aja. Tajtz meltz'aja, kajbile tu'n toc kque'yine twitza.

will be added

X\