CANTARES 3

1Tuj ncoẍbile te konic'an in jyone ti'j ju xinak c'ujla'n wu'ne. In jyone ti'j ex minti' cnet wu'ne. 2Entons in jaw we'ye ex baj nbetine enter tnam, in jyone cyuj cay ex cyuj plas ti'j ju xinak c'ujla'n wu'ne. In jyone ti'j ex minti' cnet wu'ne. 3Xi nkanine cye xk'ukil in che bet tuj tnam: ¿Minti'pe ma cyile aju xinak c'ujla'n wu'ne? Nchiye. 4Matok ch'in wel-len lak'e'ye cyi'j ke xk'ukil tej tcnet wu'ne aju xinak c'ujla'n wu'ne. Tzaj ntzyu'ne tk'ab ex minti' xi ntzokpi'ne ex xi wi'ne tuj tja ntxu'ye. 5Akeye xu'j aj Jerusalén, cytziyantze jun yol weye nok tu'n cylaj ke masat ex ke tal masat te tjak' c'ul, mi'n tz'el cyi'ne twatl ju xu'j at nc'ujlalile ti'j. Ba'n tu'n ttan nok nic'xi or taj tu'n tel twatl. 6¿Alcye tzul aju cyja' tjatz tuj lugar minti' cynajbil xjal tuj, lu in lak'e' ttzaj tuj txkan sib, tuj t-sibel tk'olil tze' mirra tbi, tuj t-sibel storac ex tuj t-sibel tcyakil txcaj perjum? 7Atzunju tcarwaj Salomón tocx cyxol 60 soldad akeju mas cyuwxix cyc'u'j ate' cyxol aj Israel; 8cycyakil soldad lu k'i'mlex spad cyu'n ex nimxix cynabl tuj k'oj; teyle junjun tocsa'n t-spad tc'u'j te colbil cye ka at jun xobil konic'an. 9Cub tbincha'n rey Salomón jun tcarwaj cyi'j tze' tbanilxix ate' twi witz Líbano. 10Sak pwak ke tkan, atzun jatum nna'j keje' puro k'an pwak; aju tk'ukbil tocsa'n jun xbalun ti'j puro ẍjulin que'yin; te tujxi binchamaj tu'n cyc'ujlalil ke xu'j aj Jerusalén. 11Akeye xu'j aj Sión, cyetze que'yilte rey Salomón. Tjax tcoron aju tbincha ttxu' tu'n tajben te tej tmoje' tuj ju k'ij tej ttzalaj nimxix.

will be added

X\