1 Aju bitz mas tbanilxix o bant tu'n Salomón. 2 K'ontza ch'in ntz'ube ttzi'ya. Aju tc'ujlalila masxix chi' twitz ta'l twitz uva, 3 tbanilxix tc'oc'jal perjum toc ti'ja, aju tbiya ba'n ic tten ic tza'n perjum nne'l kojl. Cyja'tzun at nimxix cygan k'apoj ti'ja. 4 Jurat chin ti'nxa tuc'ila. Chin ti'nxa cyuj ke tjaya, aya rey. 5 Akeye xu'j aj Jerusalén, k'ek xjal kine pero tbanilxix chin que'yine; k'ek kine ic tza'n ke xbalun ja ate' tuj tx'otx' Cedar, tbanilxix chin que'yine ic tza'n ke xbalun cycub ke te makbil tuj tja Salomón. 6 Mi'n tz'oc cyk'o'n cywitze wi'je tu'nju k'ek xjal kine, ex ka tu'nju ma tz'e'y ntz'umile tu'n k'ij. Ke nxibane tzaj cyk'oj wi'je, oc cyk'o'n kine te cwentil tkan cy-uva, atzunju weye tkan n-uva minti' in canine cwentil te. 7 Aya at nimxix nc'u'je ti'ja, k'mantza jatum in pastorina cyi'j ke t-ẍne'la. ¿Jatum in che'x ti'na ke ojlal oc tpon chilcuk'ij? ¿Tiku'n at tu'n nbete ic tza'n jun xjal nok in betje' junx cyuc'il cyẍne'l ke tuc'ila? 8 Ka minti' ba'n tu'na, aya tbanilxix que'yin cywitz mastl xu'j, lpe'ca ti'j jatum texlen cykan ẍne'l ex pastorina cyi'j ke tal tchipa junx cytxlaj cypach ke pastor. 9 Aya at-xix nc'u'je ti'ja, ic ttena te weye ic tza'n jun yew tbanilxix jawol tcarwaj rey Faraón. 10 Tbanilxix che que'yin ke tk'o'txa cyu'n ke tuj t-ẍcyina. Tbanilxix que'yin tkula cyu'n ke uwj tbanil tal abj perla cybi. 11 Jacu kbinchaye tuj t-ẍcyina k'an pwak ttx'otx'il ex tu'n tbaj lo'tzit ti'j tu'n sak pwak. 12 Acux in cub ke' rey ti'j mes, el juptz'aj tc'oc'jal perjum nardo tbi, k'i'n wu'ne. 13 Aju xinak c'ujla'nxix wu'ne ic tten ic tza'n jun bols tk'olil tze' mirra at tc'oc'jal toc ttzi nxu'que. 14 Aju xinak c'ujla'nxix wu'ne ic tten ic tza'n bech alheña tbi c'oc'jxix wen, in tzaj ch'iy cyxol tkan uva tuj lugar En-gadi. 15 Tbanilxix que'yina, aya at-xix nc'ujlalile ti'ja, tbanilxix que'yina. Ke tbak' twitza tbanilxix che que'yin ic tza'n che que'yin palom. 16 Tbanilxix que'yina, aya at-xix nc'ujlalile ti'ja, tbanilxix que'yina. 17 Aju tze' wi'ten, atzunju c'ajbel te viga twi' kja, atzun tz'lom tzaj, atzunju cjawix te twi' kja.
