RUT 1

1Tuj tk'ijlalil tej cycawin ke jwes cyibaj aj Israel, at jun maj tzaj nim we'yaj cyxol cycyakil aj Israel. Attok jun xinak aj Belén tuj cytx'otx' cyiyjil Judá xi' jun tyemp najal tuj cytx'otx' aj Moab tu'n tlaj we'yaj, tuc'ix t-xu'jil, ex cyuc'ix cabe tcy'ajal. 2Aju xinak lu Elimelec tbi, atzun t-xu'jil Noemí tbi, ex atzun ke tcy'ajal, Mahlón tbi jun, atzun juntl Quelión tbi. Aj Efratey ke jlu, ex ax juntl tbi tnam Belén. E pontzun tuj cytx'otx' aj Moab ex ax e cyaj ten najal. 3Cyimtzun Elimelec aju tchmil Noemí, atzunte Noemí cyaj ten meba xu'j cyuc'il cabe tal. 4E moje'tzun ke cabe tal Noemí cyuc'il cabe txin aj Moab; Orfa tbi jun, atzun juntl Rut tbi. Pero tej tbant laj abk'i cyponlen tuj cytx'otx' aj Moab, 5e cyim Mahlón ex Quelión, atzunte Noemí cyaj ten meba xu'j, minti'tl tchmil ex minti'tl tal. 6At jun k'ij o tbi Noemí ka otok tzaj k'ak'an tc'u'j Kman cyi'j aj Israel, ex ya minti'tok we'yaj tuj tx'otx' Judá. 7Etztzun Noemí cyuc'ix cabe tlib tuj lugar jatum najlketok, ex cub be cyu'n tu'n cypon juntl maj tuj tx'otx' Judá. 8Matok in che bet, xi tma'n Noemí cye cabe tlib: —Cu cyaje cyjaye, ex ax cycyaj tene tuc'il cytxu'ye; awt Kman binchante xtalbil cyeye, ic tza'n ma cybinchaye weye ex cye ktzan wale, 9ex awt Kman onin cyeye tu'n tcnet juntl cychmile, ex tu'n cytzalaje tuj cyjaye cyuc'il cychmile, chi Noemí cye. Bajtzun tk'olben tib Noemí cyuc'il ke tlib ex el ttz'uban cywitz, atzun cye elibaj e oc ten ok'el 10ex xi cyma'n te: —Mi'n. Ko xe'l keye tuc'ila max tuj ttanmiya. 11Atzunte Noemí xi tma'n juntl maj cye tlib: —Cu cyaje, wal. ¿Tiku'n cyajbile tu'n cyxi'ye wuc'ile? Ya minti'tl we wal ctzajel tu'n cymoje'ye cyuc'il. 12Cu cyaje cyjaye, porque weye mlay chin najantle tu'nju ma chin tijine. Ex masque atx tumlal tu'n nnajane tuj ak'bil ja'lo, ex tu'n cytzaj mastl wale, 13pero baka jacu cyyoye ocxi cych'iy tu'n cynajane cyuc'il. ¿Cucxpetzun che bel tene tu'n mi'n cynajane ex tu'n cyayone ocxi cych'iy ke wale? Mi'n, akeye wal, mlaylo bant icju. Ate Kman ma tzaj samante nim yajbil weye, ex mas nim in chin bisune ic tza'n cyeye, chi Noemí. 14Atzun cye elibaj e oc ten ok'el juntl maj ex bajtzun tk'olben tib Orfa tuc'il tlib ex el ttz'uban twitz; atzunte Rut ax cyaj ten tuc'il tlib. 15Atzunte Noemí xi tma'n te Rut: —Que'yinxa, lu Orfa ma tz'aj tuj ttanmi ex tu'n tc'ulun twitz tdios, ax icx teya taja tuc'il. 16Atzunte Rut xi ttzak'we'n: —Mi'n tzaj tma'na weye tu'n tcyaj ncolina ex tu'n tel npa'n wibe ti'ja. Chin xe'le tuc'ila nok jaxja ma txi'ya ex junx chin najale tuc'ila. Aju ttanmiya c'oquel te ntanmiye ex aju Tdiosa c'oquel te Ndiose. 17Jatum cymela, axtzun chin cymele, jatum cbelex maku'na, axtzun chin belex maku'ne. Awt Kman cub k'onte ncastiwoye cyuwxix ka ma tz'el npa'n wibe ti'ja, ka mya tu'n camic, chi Rut. 18Tejtzun tel tnic' Noemí ti'j ka axix toc otok cub t-ximan Rut tu'n toc lpe' ti'j, ya minti' k'ajt mastl. 19Cyja'tzun e je'x cycabil tuj cybe tejxi cycanun tuj Belén. Tejtzun cyocx tuj Belén, bi'x e labin xjal cyi'j ex in cyma'ntok ke xu'j cyja': —¿Maj atzun Noemí jlu? 20Atzunte Noemí xi ttzak'we'n: —Ya mi'n tz'oc cyk'o'ntle nbiye Noemí; ja'lo cyk'onque nbiye Mara, porque ate Dios, aju at tipumal tu'n tbant tcyakil tu'n, ma tzaj tk'o'n jun yajbil ma'xix wibaje. 21Tej wexe tzalu, nimcu xi wi'ne, pero tej ma chin ul meltz'aje, minti' ch'in k'i'n wu'ne, tu'nju iclo tajbil Kman. ¿Tiku'ntzun c'oquel cyma'ne nbiye Noemí?, porque ma tzaj yajbil ex nim mya ba'n wi'je tu'n Kman aju at tipumal tu'n tbant tcyakil tu'n, chi Noemí. 22Cyja'tzun tten ajtz Noemí tuj Moab tuc'ix tlib aju Rut tbi, aju aj Moab. Tej cypon tuj Belén matok in xe't tu'n tjaw chmet twitz sebad.

will be added

X\