Romanos 9

1Ax toc in nma'ne porque ocslal kine ti'j Crist, minti' in chin nic'ane yol; ax wanmiye in k'mante weye ka ax toc jlu ex in tzaj tyec'un Xewbaj Xjan. 2Nim nbise at ex cucx tchyo'n tuj wanmiye. 3Porque jacu wajbeye tu'n tcub nsentense tu'n nxi'ye tuj najen ex tu'n wel pa'ne ti'j Crist, nok tu'n cyclet ke wermaniye, akeju nxjalile junx wiyjile cyuc'il. 4Aj Israel ke, ex o tzaj k'o'n cyoclen te c'wa'lbaj. O ten t-spic'umal Dios cyxol, ex o bant ti'j jun yol tu'n Dios cyuc'il, ex o tzaj k'o'n tley Moisés cye, tuc'ix aju ajbebl te Dios, ex tcyakilju o tma Dios tu'n ttzaj tk'o'n cye. 5Cyc'wa'l kxe'chel ke, ex ti'j cyiyjil el Crist tej toc te xjal. Ate Crist ax Dioste tibaj tcyakil, ex in jaw nimsa'n tbi te jumajx. Icxwitju. 6Pero aju yol xi ttziyan Dios cye aj Israel minti' cyaj ten nok cucx, minti'wt ma japun, porque mya cycyakil keju elni itz'j ti'j Israel aj Israel ke. 7Ex mya nok tu'nju tiyjil Abraham ke ocwit che oquel cycyakil te tc'wa'l; porque otok txi tma'n Dios te Abraham: O'cx ke tc'wa'l Isaac che oquel te tiyjila, chi Dios te Abraham. 8Cyja'tzun tten, mya cycyakil ke tc'wa'l Abraham che oquel k'o'n te tc'wa'l Dios; nok o'cx che oquel te tc'wa'l ex te tiyjil Abraham akeju o che itz'j tu'nju yol tzaj ttziyan Dios te. 9Porque atzun yol lu tzaj ttziyan Dios te Abraham: Tuj juntl abk'i chin ule tuc'ila ex tzul itz'j jun tal Sara, chi tuj Tu'jil. 10Ex mya o'cxju, ax icx te Rebeca oc ten cabe tal tu'n jun xinak Isaac tbi, aju kxe'chel. 11Ex na'nxtok cyitz'j ke tal ex na'nxtok cybinchante aju ba'n ex ka aju mya ba'n, xi tma'n Dios jun yol te Rebeca: Aju tzicbaj c'oquel te tmajen tz'inbaj, chi Dios. Tma Dios icju tu'ntzun cucx tten t-ximbetz aju otok cub t-ximan, tu'n tjaw t-sc'o'n jun cyxol cabe, pero mya tu'n tak'unben c'wa'l tu'n tjaw sc'o'n, nok o'cx tu'nju ax Dios o txconte te, ex tu'ntzun tjapun aju yol tz'iban tuj Tu'jil: A Jacob o nc'ujlaye, atzunte Esaú el wic'une, chi Dios. 14¿Titzun cxel kma'n? ¿Myapelo tz'aklxix Dios? Tz'aklxix. 15Porque xi tma'n Dios te Moisés cyja': Ka waje tu'n ttzaj k'ak'an nc'u'je ti'j jun xjal, ctzajel k'ak'an nc'u'je ti'j; ex ka waje tu'n ttzaj tz'e'y wanmiye ti'j jun xjal, ctzajel tz'e'y wanmiye ti'j, chi Dios. 16Cyja'tzun, mya tu'nju tajbil xjal, ex mya tu'nju in tipuman tib, o'cx tu'nju in k'ak'an tc'u'j Dios ti'j. 17Porque in tma'n Dios tuj Tu'jil te rey Faraón: Tu'n jlu ma jaw nsc'o'ne tu'n toca te rey, tu'ntzun tyec'unjtz wipumale ti'ja ti'j ju oc nbincha'ye, ex tu'n tel tkanil nbiye tuj tcyakil twitz tx'otx', chi Dios. 18Cyja'tzun, ka tajbil Dios tu'n ttzaj k'ak'an tc'u'j ti'j junjun xjal, in tzaj k'ak'an tc'u'j cyi'j, ex ka tajbil Dios tu'n tcyuwsante tanmi junjuntl xjal, in cub tcyuwsa'n. 19Pero oclo tma'ya weye: Ka ic ttenju ¿tiku'ntzun in tma'n Dios ka at til xjal? Porque, ¿alcye jacu we' twitz ju tajbil? 20Pero aya wuc'il, ¿alcyetzuna tu'nju nno'c tmojtza'na yol tuc'il Dios? ¿Jacupelo tma jun c'il teju binchal te: ¿Tiku'n ma chin cub tbincha'na icju, chiwt? 21Aju binchal c'il ¿minti'pelo toclen ti'j ax xok'l tu'n tbinchante jun xar mejorxix que'yin ex juntl myaxix mejor que'yin? 22¿Titzun cxel kma'n? Masque o tajbe Dios tu'n ttzaj tyec'un tk'oj ex tu'n tel cynic' xjal ti'j ju tipumal, pero ic'x ti'j tu'n, tu'nju at nim tpasens cyi'j keju at ttzajel tk'oj cyi'j ex banimaj ke tu'n cyxi' tuj najen. 23Ic'x ti'j tu'n Dios nok tu'n ttzaj tyec'un tajwalil ma'xix cye keju in k'ak'an tc'u'j cyi'j ex banin ti'j tu'n tu'n cyten tuc'il tuj t-spic'umal. 24A jlu in tma'n ki'j, ako' txco'majtl ko' tu'n, mya o'cx cyxol xjal judiy, ax icx cyxol xjal mya judiy ke. 25Ic tza'n in tma'n tuj u'j tu'n Oseas: Ke xjal mya etzan wu'ne che oquel nk'o'ne te weye, ex akeju mya c'ujla'n wu'ne, oc che c'ujlanjtzel wu'ne. 26Ex tuj lugar jatum o k'manjtz cye: Akeye xjal mya etzan keye wu'ne nchiye, axtzun c'oquel cybi tc'wa'l Dios itz', chi Dios tuj Tu'jil. 27Ax icx te Isaías in jaw tk'ajk'ajel twi' cyuwxix cyi'j aj Israel, in tma'n: Masque ic cyajlal aj Israel ic tza'n ttxa tz'a'n ttzi mar, pero nok nic'xi junjun oc che cletel. 28Porque jurat cjapunel tyol Kman tu'n cycyaj xjal tjak' cysentens, ex tuj tumelxix cjapunel tu'n, chi Isaías. 29Ic tza'n o tma Isaías ojtxi: Nokwit minti' cyaj k'o'n kiyjil tu'nju Tajaw Tcyakil, mawtlo ko oc ic tza'n tnam Sodoma, ex ic tza'n tnam Gomorra, chi Isaías. 30¿Titzun oc kma' ti'j jlu? Ke xjal mya judiy ke minti'tok in che ximan ti'j tu'n cyoc te tz'aklxix, atzun keju ma che oc te tz'aklxix, nok tu'n cyocslabl ma che oc k'o'n te tz'aklxix. 31Atzun cye aj Israel lepch ke'ctok ti'j jun ley tu'n cyoc te tz'aklxix tu'n, pero minti' e xcye' ti'j tu'n tjapun cyu'n. 32¿Tiku'n? Porque lepch ke'ctok ti'j, mya tu'n cyocslabl, nok o'cx tu'nju cyak'unben, ic tza'n in tma'n ley. Cyja'tzun e jaw tolj ti'j ju abj tcub cywitz, 33ic tza'n in tma'n tuj Tu'jil: Cbel nk'o'ne jun abj tuj tnam Sión tu'n cyjaw tolj xjal ti'j ex tu'n cycub tz'ak; alcyetzunju ma tz'ocslan ti'j, mlay tzaj tch'ixwi, chi tuj Tu'jil.

will be added

X\