Romanos 7

1Erman, in chin yoline cyeye akeye ojtzki'n ley cyu'ne, ex ba'n cyu'ne ate ley at toclen ti'j xjal itz'xcu xjal. 2Porque ic tza'n jun xu'j at tchmil, toc tuj tcwent tchmil tu'n ley itz'xcu tchmil; pero ka ma cyim tchmil, tzokpi'ntl te xu'j twitz ju ley otok tz'oc mojbante cye. 3Cyja'tzun, ka ma moje' xu'j tuc'il juntl xinak itz'xcu tchmil, c'oquel tbi aj pajil; katzun ma cyim tchmil, tzokpi'ntl te xu'j twitz ley; masquetzun moje' tuc'il juntl tchmil mlay tz'oc k'o'n tbi aj pajil. 4Ax icxtzun cyeye erman, minti'tl toclen ley cyi'je, porque o cyim Crist tu'n cytzokpete, ba'ntzun tu'n cymoje'ye tuc'il Crist aju jatz ank'in cyxol cyimni, tu'ntzun kbinchante aju ba'n tuj twitz Dios. 5Tej na'nxtok kocslan, in kbincha'ntok aju tajbil kchibjal; masque in tma'n ley tu'n mi'n kbinchante il, pero mas nno'c tilil ku'n tu'n kbinchante, mer ic tza'n at jun to'yil ke. Cyja'tzun tzaj camic ki'j. 6Atzun ja'lo tzokpi'ntl ko', minti' toclen ley ki'j, ic tza'n cyimni ma ko oc twitz ley jatum tzyu'ntok ko' nej; cyja'tzun tzokpi'ntl ko' tu'ntzun kajben te Dios tuj ac'aj chwinklal tu'n Xewbaj, ex mya tu'n kten tjak' ojtxi ley aju tz'iban. 7¿Titzun oc kma'? ¿Ilpe aju ley? Mi'n. Pero minti'wtlo sel nnic'e ti'j il nokwit minti' saj tyec'un ley; ex minti'wtlo sel nnic'e ti'j ka mya ba'n tu'n tpon nc'u'je ti'j jun ti'xti te juntl nokwit minti' in tma'n ley: Mi'n pon tc'u'ja ti'j. 8Ate il axju mandamyent ajben tu'n, porque tcyakilju mya ba'n in pon nc'u'je ti'j, el tuj k'ancha'l tu'nju mandamyent; porque nokwit minti' ley, ate il minti' tipun, mer ic tza'n cyimni. 9Na'nxtok tel nnic'e ti'j ley, ba'n ntene nna'ne; pero tej tel nnic'e ti'j mandamyent, maxitzun el nnic'e ti'j ka at wile, ex cub nsentense tu'n ncyime. 10Cyja'tzun ma tz'el nnic'e ti'j jlu, aju mandamyent tzaj k'o'n tu'n tten kchwinklal, atzun weye, axju mandamyent cub k'onte nsentense tu'n ncyime. 11Porque ate il, axju mandamyent ajben tu'n te sbubl weye, ex ma chin cub byo'ne tu'n il nok tu'nju mandamyent. 12Cyja'tzun, ate ley ax toc xjan te, ex aju mandamyent xjan te, ex tz'aklxix ex ba'n te. 13Ba'n te ley. ¿Apetzunju ba'n cub byonte weye? Mi'n. Ate il cub byonte weye nok tu'nju ley ba'n, tu'n tyec'unjtz aju il, ka ilte, ex tu'n toc il puro ilxix tu'nju mandamyent. 14Porque ba'n ku'n, aju ley te Dios te; atzun weye in nbincha'ne aju tajbil nchibjale, c'a'yimaj kine tjak' tipumal il. 15Porque aju in nbincha'ne, minti' nne'l nnic'e ti'j; aju wajbile, minti' in bant wu'ne; ex aju nc'i'ye, atzunju in bant wu'ne. 16Pero ka ma bant wu'ne aju nc'i'ye; cyja'tzun nne'l nnic'e ti'j ax toc ba'n te ley. 17Cyja'tzun, mya akine in chin binchante jlu, ate il at wuje in binchante. 18Porque ba'n wu'ne minti' jun ba'n at wuje tuj nchibjale; wajbile tu'n nbinchanteye aju ba'n, pero minti' wipumale tu'n tbant wu'ne. 19Porque aju ba'n wajbile tu'n tbant, minti' in bant wu'ne; atzunju mya ba'n, aju mi'n wajbile tu'n tbant, atzunju in bant wu'ne. 20Katzun ma nbinchaye aju mi'n wajbile, mya akine in chin binchante, ate il at wuje in binchante. 21Cyja'tzun ma tz'el nnic'e wi'je tza'n ntene: wajbile tu'n nbinchanteye aju ba'n, pero aju mya ba'n tcub nwitze. 22Porque in chin tzalaje ti'j Dios tuj wanmiye; 23pero in nna'ne juntl ley tuj nximlale in k'ojin ti'j tley nnable, ex in chin ocx presine tu'n tjak' tley il aju at tuj nximlale. 24Bec'bilxix nwitze. ¿Alcye ctzokpilte weye teju nximlale lu in chinx ti'n tuj camic? 25O'cx te Dios tzokpil weye nok tu'n Jesucrist aju Kajaw. Chjonte Dios. Cyja'tzun, tuj jun tumel in chin ajbene te tley Dios tu'n nnable; atzun tuj juntl tumel tajbil nchibjale tu'n wajbene te tley il.

will be added

X\